Read Beembe 2 Kol 10 Bible Online

2 Kol 10 - Beembe bible

2 Kol 10

¹Me Pawulo, nyilusyaamisa me-meene mu bundeembu, na mu mutima-bubwete wa Kiristo. Bakweleele ti, me nyiri na nsoni habaanaa nyiri ha kakati dya beenu, ngo kasi nyakasuka habaanaa nyiri la na beenu;

²me nyisaambila mu kuri ti, mpele kuba nyakasuka ha nyikwiisa kuri beenu, mu kitsimi kya kusoongo ti nyakasuka, ha busu bwa bakweleele ti, beetu tukwedyaatila mu kimuutu.

³Mukwongo, mu kimuutu turi mu kwedyaatila, ngo kari mu kimuutu turi mu kwenwaanina ko.

⁴Bukuri binwaanunu bituri mu kwenwaanina kikiindu, biri bya kimuutu ko; ngo kasi bya mpinu dza Nzaambi, byakuka mu kutsyaamuna bisweemunu bya makwa. Beetu tukwetsyaamuna nzoonsulu dzadzibi,

⁵na mpinu dzodzinso dza masiiku dzikwetungukula nyaabulu ya Nzaambi, mpisi tukitula bitsimi bya baatu kuri heki batumuma kuri Kiristo,

⁶na tuba twayirima mu kuseembe babo bahele kutumuma, mu ntaangu yiri beenu-banso lumwaamana kutumuma.

⁷Yirikee kutala bitotolo bunu bu biri. Mbuti muutu wumono dyo ti nde wuri wa Kiristo, lo kayirika kuyaaba ti nde bukari wa Kiristo beetu se turi ba Kiristo.

⁸Mukwongo, ti bukuri me nyasii mwaa-kimweese mu bumfumu bwa tuha Mfumu, mu kulutuunga nkani ka mu kulutsyaamuna ko, lo me nyiri na nsoni mu mimyo ko.

⁹Me ntii kumonokono, buni ti me nyilusa boomo mu mikaanda myaami ko;

¹⁰bukuri bakweleele ti, mikaanda mimyo miri na musundu na mya makwa, koomosoko nde-meene mu kumumono wahele na makwa, na nzoonsulu dzaandi dzahele kitotolo.

¹¹Ngo mpisi wunde wuleele bubwo lo kayaaba ti: bu nyiri me mu maampu ma nyitina mikaanda kuri nyiri la, bunu bubwo se nyiri mu biyiriki ha busu bwa beenu.

¹²Beetu ka tutsiitsa kuba nsiisa, bunu pe kusaka nsobokoso, dzi turi na dzo na baatu bamosi, bakweha ntumunu mu bo-meene ko. Baatu babo bahele kubakula, bukuri bo bakweteese bambaasi mu kiteesulu kya bo-meene, na bakwesaka nsobokoso ha kakati dya bo-meene.

¹³Beetu ngo bari twahele kusa kimweese kwa mansaalisi, ngo beetu kusiila bunu buri kiteesu kya kisalu kya tuha Nzaambi, mu kutubuka natee kuri beenu.

¹⁴Mukwongo, beetu twahele kuluta mandilu, ngo beetu twatubuka na Musamu Wamubwete wa Kiristo natee kuri beenu.

¹⁵Beetu twahele kusa kimweese kya mansaalisi mu bisalu bya ŋani, ngo beetu turi na nsiitu ti kanyi dya beenu dihamisaana, lo kisalu kya beetu se sa kyahamisa kubuuka bunu buri kiteesu ki turi twatsima,

¹⁶mu kweyaabisa Musamu Wamubwete mu mankoonsi mabvuriri la na beenu, kwahele kusa kimweese mu biteesu bya ŋani mu bisalu byeki byayirima.

¹⁷Ngo kasi, «wunde wutiiri kusa masiiku, lo kasa masiiku mu Mfumu.»

¹⁸Mukwongo, kari wunde wusalaa mu ntumunu ya nde-meene bateela kimbaangi ko, ngo wunde wasala mu ntumunu ya Mfumu.