Read Beembe 2 Kol 2 Bible Online

2 Kol 2 - Beembe bible

2 Kol 2

¹Mukwongo, me nyamwiini dyo ti bwabubwete, mu kuhele kubweese kwiisa kuri beenu, mpisi luhele kukoto mu ngebe.

²Bukuri, mbuti me nyilukotisiri mu ngebe, lo na wubweese kuha me kiminu, mbuti kari wunde wumwaakotoso mu ngebe ko?

³Me nyatinini mimyo, mu kubata kuri ti babo baketi kuha me kiminu, bankotoso mu ngebe mu ntaangu yi nyikwiisa. Me nyirikiri kuyaaba ti, kiminu kya me, kya beenu-banso se.

⁴Mukwongo, mu mpasi dzalaka na mutima kinkuukulu, na mu mansangasa malaka me nyalutinini; kari mu kulukotoso mu ngebe ko, ngo mu kuri ti luyaaba ntiilu ya bunsaalisi yi nyiri na yo mu beenu.

⁵Mbuti kuri muutu wasakisiri ngebe, lo kari me kakotisiri mu ngebe ko, ngo babamosi mu beenu, bunu pe beenu-banso mbuti nyahele kusa mansaalisi.

⁶Muutu wa bubwo wayelemene kutaambula biŋaŋunu kuri baatu balaka.

⁷Beenu ngo bari, siilee wa bubwo mpemisi, na muboondeenu mpisi kahele kudyaama kunsa ngebe dzibvuriri bunene.

⁸Hango-nkuumbu, me nyilusyaamisa mu kusoongo kimbaangi kya ntiilu yeenu mu nde.

⁹Bukuri mu bubwo me nyalutinini, mpisi me nyilutsiitsa, mu kuyaaba, kari beenu luri na bintambukulu mu myominso.

¹⁰Beenu lusiilaa muutu mpemisi, lo me se nyimusiriri mpemisi; mukwongo, mpemisi ngo yiri me nyasa, na mbuti nyasiila muutu mpemisi mu musamu, lo mu ntoono beenu, ha busu bwa Kiristo,

¹¹mpisi heki tuhele kubwa mu mawunu ma Satana, bukuri bitsimi bya nde tubiyaari.

¹²Me nyatubuka ku Torowasi, mu kweyaabisa Musamu Wamubwete wa Kiristo, na Mfumu wanzibukila mweelu,

¹³ngo mpeeve me yaba yahele na kidzuunu, bukuri nyasii mono Tito mpaangi yaami ko, hango, me nsiisaana bari ku Torowasi, ha nyeki kweendaana ku Makedonya.

¹⁴Matoondo kuri Nzaambi! Nde wuri mu mpisi ntaangu wutululukisaa mu Kiristo, na wukwepukulaa mu mpisi kibeendu, mfuku ya nyaabulu yaandi mu beetu.

¹⁵Bukuri beetuneenu ngo mfuku yayibwete ya Kiristo, kuri Nzaambi, ha kakati dya babvuuka na badziimbila;

¹⁶mu bamosi mfuku ya lufwa yihaanaa lufwa, mu bakaka mfuku ya bumwooyo yihaanaa bumwooyo. Ngo na wakuka mu mimyo?

¹⁷Mukwongo, beetu turi bunu bakaka bakweyarika maampu ma Nzaambi ko; ngo kasi mu ngwanwa, mu nkuumbu ya Nzaambi na ha busu bwaandi, beetu turi mu kwedzoonsolo mu Kiristo.