Read Beembe 2 Kol 3 Bible Online

2 Kol 3 - Beembe bible

2 Kol 3

¹Buri tubweese kubaandika kusaka lutumu mu beetu-meene? Hoti bunu babamosi, turi na nzala mukaanda wa ntumunu wa kulusoongo, bunu pe kululoombo?

²Mukaanda beetu ngo beenu, watinu mu mitima myeetu, wayabakana na wataangu kuri baatu bobanso.

³Nkati diri dyayabakana ti, beenu ngo mukaanda Kiristo wu turi twatubula beetu, wahele kuba watinu mu ntiinta yapiinda, ngo mu Mpeeve Nzaambi yamwooyo; wahele kuba watinu mu bibari bya malweende, ngo mu mabaya ma mitima mya muswinyi.

⁴Yiyo ngo nsiitu yi turi na yo, mu Yesu Kiristo kuri Nzaambi.

⁵Ka kuri ti lo tuyirikiri kitotolo mu makwa ma beetu-meene ko, ngo makwa meetu mafumunaa kuri Nzaambi,

⁶nde watuha makwa mu kuba bisari bya lulelusunu lwamoono, kari mu kisoni ko, ngo Mpeeve, bukuri kisoni kidzusaa, kasi Mpeeve yihaanaa bumwooyo.

⁷Ngo mbuti kisalu kya lufwa, kyatinu mu bisoni ha yulu malweende kyabakiri nkeembu, yiri baala ba Isaheli baba bahele kubangisina kusungumina kisoosi ku busu bwa Moose bwaba semaana, mu mwaa-ntaangu yantele,

⁸lo kisalu kya Mpeeve sa kyabvula nkeembu.

⁹Mukwongo, mbuti kisalu kya kukesele baatu mukanu kyabakiri nkeembu, lo kisalu kya kululukisa baatu sa kyabvula nkeembu.

¹⁰Mukwongo, bibyo bi bakeembisiri, byasii baka nkeembu yayelemene na nkeembu yibvuriri bunene yimayi ko.

¹¹Bukuri, mbuti bibyo byahele kudziingila byabakiri nkeembu, lo bibyo bidziingulaana sa byabvula nkeembu.

¹²Bu turi na nsiitu dza bubwo, ngo turi mu kwesalila mu nsiitu dzodzinso.

¹³Beetu twahele kusa bunu Moose, waba fukaana nsaanda ku busu bwaandi, mpisi heki baala ba Isaheli bahele kumono nsukulu ya bibyo byahele kudziingula.

¹⁴Ngo kasi bo bari kunsa lubu. Natee mu kiluumbu ki, bo bu bataangaa lulelusunu lwalukulu, lo nsaanda yiyo yahele kuyisika, bukuri yo kuyisikila mu Kiristo.

¹⁵Ngo kasi natee mu kiluumbu ki, bo bu bataangaa mikaanda mya Moose, lo nsaanda yafuka mitima mya bo.

¹⁶Ngo, «babaanaa basyeetukiri kuri Mfumu, lo nsaanda yiyisikiri.»

¹⁷Mfumu ngo Mpeeve, haho hari Mpeeve ya Mfumu, haho se hari bunsaalisi.

¹⁸Beetu-banso bari busu bwahele kufuka nsaanda, nkeembu ya Mfumu yiri mu kuseme mu beetu, bunu ti mu lumweenye, mu kifwaani kikyo turi twakituka mu nkeembu na nkeembu, mu Mfumu wuri Mpeeve.