Read Beembe 2 Kol 5 Bible Online

2 Kol 5 - Beembe bible

2 Kol 5

¹Mukwongo, beetu tuyaari ti, mbuti nzo yeetu ya musaampu ya ha butoto ha yitsyaamukini, lo turi na nzo ya mantaangu momanso kuri Nzaambi mu mayulu, yahele kuba yatuungu mu myooko mya baatu.

²Mu didyo beetu tukwekuuma, na turi na musoongo walaka mu kulwaata nzo yeetu ya ku yulu,

³kuri heki, ti hayuku twahele kulwaata kinkuta, bahele kutumono kimpene.

⁴Mukwongo, bu turi munsa musaampu wumawu, tukwekuuma kunsa kilemu, bukuri twahele kutya kusyonono kinkuta, ngo tutiiri kulwaata kikimi ha yulu, mpisi heki bikoofwa biba byadyaama kunsa bumwooyo.

⁵Wunde watuyirika mu kutaambula mamo ngo Nzaambi, nde watuha bidiimbu bya Mpeeve.

⁶Ngo beetu twaluula mu nsiitu mu mantaangu momanso, na tuyaari ti, bu turi mu nyutu yimayi, turi ku bunzeense la na Mfumu;

⁷bukuri beetu mu kanyi turi mu kwedyaatila, nkani ka mu mwiinunu ko.

⁸Beetu twaluula mu nsiitu, na tumono kuri ti, bubvuriri bubwete mu kupala mu nyutu yimayi, na kweende mu kudzakala kuri Mfumu.

⁹Hango-nkuumbu, beetu di tutiiri mu kubweeye kuri nde, ti tuba mu nyutu yi, bunu pe tupala mu yo.

¹⁰Bukuri beetu-banso tuyelemini kuteleme ha busu bwa mutsuundu wa Kiristo, mpisi heki muutu-muutu kataambula, museendu wa ma kari kayirika, mu nyutu yaandi, mamabwe bunu pe mamabi.

¹¹Ngo bu tuyaari buri kibvumi kya mfumu, beetu tusakaana kuri ti baatu babakula dyo. Nzaambi wutuyaari nkati kwafwaana; na me nsimini ti mu mitima myeenu beenu se luyaari kwafwaana.

¹²Beetu twahele na nzala kubweese kuba, na ntumunu mu beetu-meene kuri beenu, ngo tutiiri kuluha mpwaani, ya kuba na kimweese mu ntoono beetu, mpisi heki luba na mvutu ya kuha kuri babo bakwesa kimweese kya ku mbasi, nkani ka kya mitima ko.

¹³Mukwongo, mbuti beetu twabeeri madzeeke, lo mu ntoono Nzaambi; ngo mbuti turi na madyeele, lo mu ntoono beenu.

¹⁴Bukuri ntiilu ya Kiristo yatusweeteke, na tuyaari dyo mu ngwanwa ti, muutu mosi kitsu wafwiila mu bobanso, ngo bobanso se bafwa.

¹⁵Nde wafwiila mu bobanso, mpisi heki bamwooyo bahele kubweese kuba bamwooyo mu bo-meene, ngo mu wunde wafwiiri na wafulukiri mu ntoono bo.

¹⁶Hango-nkuumbu, kubandika lumalu beetu twahele kuyaaba muutu mu muswinyi; na mbuti twayaaba Kiristo mu muswinyi, lo mu lumalu twahele bweese kumuyaabila bubwo.

¹⁷Hango-nkuumbu, mbuti muutu wuri mu Kiristo, lo nde kiyiriki kyamoono; byabikulu byayeki byaluta, byamoono byayiingina.

¹⁸Byobinso byafumuna kuri Nzaambi, nde wabweese kusa nyukusunu ha kakati dya beetu, na nde-meene mu Kiristo, na watuha kisalu kya kubweese kwesuusa nyukusunu.

¹⁹Mukwongo, Nzaambi waba mu Kiristo, mu kubweese kusa nyukusunu ha kakati dya nsi na nde-meene, kwahele kutaangula baatu lumvuki lwa bo, na kusuusa mu beetu maampu ma kubweese kusa nyukusunu.

²⁰Beetuneenu ngo turi bamonikisi ba Kiristo, buni ti Nzaambi wuri mu kulusyaamisa mu beetu; beetu tuluyiingikila mu nkuumbu ya Kiristo, taambulee kubweese kuyukusuna na Nzaambi.

²¹Wunde waba wahele na masumu, nde wamusa ngaa-masumu mu ntoono beetu, mpisi heki mu nde, tubeenee nsungumunu ya Nzaambi.