Read Beembe 2 Kol 6 Bible Online

2 Kol 6 - Beembe bible

2 Kol 6

¹Ngo bukuri tukwesala kintwaari na nde, beetu tulusyaamisa mu kuhele kuhololo kwa buunu, bweese bwa Nzaambi buluri lwataambula.

²Bukuri nde wuleele ti: «Mu ntaangu yayelemene, me nyikuhaanaa mvutu, mu kiluumbu kya mvuukulu, me nyikubakisaana.» Mono mu lumalu, yi ngo ntaangu nkati yayelemene; mono mu lumalu, ki ngo kiluumbu kya mvuukulu.

³Beetu twahele kubumisa muutu makya mu ntoono ti mosi, mpisi heki kisalu kihele kuba kyasaanu.

⁴Ngo kasi mu myominso, beetu tutiiri kumonokono beetu-meene bunu bisari bya Nzaambi, kunsa kifiki kyalaka, mu mpasi, mu manyoongi, mu kinkuukulu,

⁵mu biwa, mu maboroko, mu nwanusunu, mu bisalu byamakwa, mu kwekyeelele bwiisi, mu maloomi,

⁶mu nsyemukunu, mu nyaabulu, mu nkindusulu-mutima, mu mbweeyulu-mutima, mu Mpeeve Yangisi, mu ntiilu yahele bumpitu-bumpyoongo,

⁷mu maampu ma ngwanwa, mu mpinu dza Nzaambi; mu kuba na binwaanunu bya nsungumunu, bya kooko kwalubakala na bya kooko kwalumoso,

⁸mu nkeembu na mu nsaanunu, mu mvuumfu yayibi na yayibwe, bunu bangaa-mpya koomosoko turi bangaa-ngwanwa,

⁹bunu ba bahele kuyaaba koomosoko twayaabakana kwalaka; bunu beki mu kufwa koomosoko turi mwooyo, bunu ba bari mu kulata ngo bahele kubadzusa;

¹⁰bunu bari mu ngebe, koomosoko bari mu kiminu; bunu bari kunsa buwelu bwa makwa, koomosoko bakwekabula busina; bunu bahele na kitotolo, koomosoko bari na byobinso.

¹¹Beetu twadzoonsiri kuri beenu, bari Korinto, mitima myeetu myabeeri myadzibulu na pwelelee.

¹²Beetu twahele kaanga mitima mu beenu, ngo beenu-meene lwakaanga mitima myeenu.

¹³Me nyiludzoonsolo bunu baala baami, beenu se mu kuha mvutu, dzibulee mitima.

¹⁴Yaa luba mu kihaangu kimosi na bangooyi ko; mukwongo, nki byantwaari ha kakati dya nsungumunu na bubayi, bunu pe nki byantwaari ha kakati dya buungi na mampimbisi?

¹⁵Nkya nyukusunu yiri ha kakati dya Kiristo na Belyari, bunu pe nki byantwaari ha kakati dya ngaa-kanyi na mungooyi?

¹⁶Nkya nyukusunu yiri ha kakati dya Nzo ya Nzaambi na biteki? Bukuri beetuneenu turi Nzo ya Nzaambi yamwooyo, bunu bwaleele Nzaambi ti: «Me sa nzakala ha kakati dya bo, na me sa nyeyende na bo, Me sa mba Nzaambi bo, na bo sa baba baatu baami.»

¹⁷Hango nkuumbu, Mfumu ti: «Paleenu ha kakati dya bo, na haambikiseenu na bo. Yaa lubelemene kitotolo ti kimosi kya sumuka ko, na me sa nyalutaambula.

¹⁸Me sa mba Taayi kuri beenu, na beenu sa lwaba baala ba babakala, na ba bakyeetu kuri me, Mfumu Ngaa-mpinu wuleele.»