Read Beembe 2 Kol 7 Bible Online

2 Kol 7 - Beembe bible

2 Kol 7

¹Ngo banduku ba mutima, bukuri turi na nsiilulu dza bubwo, tutsyeemekeenu mu mamviindu momanso ma muswinyi na ma kiluunsi, na tukukiseenu bungisi kunsa kibvumi kya Nzaambi.

²Taambulee beetu mu mitima myeenu; beetu twasii yirikila muutu mamabi ko, twasii maana kuholo bya muutu ko, na twasii diila muutu manene ko.

³Me nyahele kuleele bubwo mu kulukesele mukanu; bukuri me nyatekisiri kuleele ti, beenu luri mu mitima myeetu, ti mu lufwa ti mu bumwooyo.

⁴Me nyiri na nsiitu yalaka mu beenu, nyiri na kimweese kyalaka mu beenu, me nyaluula mu mboondulu, me kiminu kyabuukula kunsa mpasi dzeetu dzodzinso.

⁵Mukwongo, beetu tutubukaana ku Makedonya, twasii baka ntaangu ya kuwuumisa manyutu meetu ko, ngo kasi, kwokunso mpasi na mpasi; nwaanunu ku mbasi, boomo kunsa mitima.

⁶Ngo Nzaambi wuboondaana bakuluka, watuboondiri mu nyisulu Tito,

⁷kari munu mu nyisulu nde ko, ngo se na mu mboondulu yi kabakiri nde kuri beenu; nde watuyaabisiri musoongo wu luri na nde, bidilu byeenu, na kuheme ku luri na kwo mu me, na mu didyo me nyabweesiri kumono kiminu kibvuriri bunene.

⁸Ngo mbuti me nyalumonisini ngebe mu mukaanda waami, lo me nyahele kunyoongo mu didyo; lu ti hayuku nyanyoongini ha nyamwii kuri ti, mukaanda wunde waluhee ngebe mu mwaa-ntaangu.

⁹Mu lumalu, me nyimono kiminu; kari bukuri beenu lwamwii ngebe ko, ngo bukuri lwamwii ngebe mu kuyiinga madyeele; mukwongo, beenu lwamwii ngebe bunu buri kutya kwa Nzaambi, mpisi heki mu kibari kya beetu, beenu luhele kutaambula mamabi.

¹⁰Bukuri ngebe dza ntiilu ya Nzaambi, dzibutaa nyiingulu madyeele, mu kubaka mvuukulu kwahele kunyoongo; ngo kasi ngebe dza nsi dzibutaa lufwa.

¹¹Sa monee mu lumalu, nkya kifiki ngebe dza ntiilu ya Nzaambi dzibutiri mu beenu: nkya mampemisi, nkya minyoongi, nkya boomo, nkya musoongo, nkya kuheme, nkya maseembu! Mu myominso beenu lwasoongiri ti, lwahele na kibila mu musamu wunde.

¹²Ngo mbuti me nyalutinini, lo kari mu ntoono muyiriki-mamabi, bunu pe mu ntoono wunde wu bari bayirikila mamabi ko, ngo mu kusoongo ha busu bwa Nzaambi, kuheme ku luri na kyo mu beetu.

¹³Mu didyo, beetu twabakiri mboondulu. Ha yulu mboondulu yiyo, beetu twabweesiri kumono kiminu kyalaka, mu kiminu kyabeeri na Tito, bukuri beenu-banso lwadzuunisini bitsimi byaandi.

¹⁴Ngo mbuti ha busu bwa nde, me nyasoongiri kimweese mu ntoono beenu, lo me nyasii mono nsoni mu mimyo ko, ngo kasi bunu buri ngwanwa yoyinso yi turi twaleele kuri beenu, bunubwo se kimweese ki twasoongiri kuri Tito mu ntoono beenu, kiri kyangwanwa.

¹⁵Nde wuri na musoongo walaka mu beenu, mbiki ti ha kabaambuka nde mwooyo mu kutumuma kwa beenu-banso, na bu lwasiiri mu kumutaambula mu kibvumi na mu ntekutulu.

¹⁶Me nyimono kiminu, bu nyiri na nsiitu mu beenu mu myominso.