Read Beembe 2 Kol 8 Bible Online

2 Kol 8 - Beembe bible

2 Kol 8

¹Beetu tuyaabisa kuri beenu, bampaangi, bweese bwa Nzaambi bwataamburi mabuundu mari ku Makedonya.

²Kunsa mpasi dzi bari babwanikina na dzo, kiminu kya bo kya mansaalisi, na buwelu bwa bo bwa musundu, byabwookoso busina mu mpeelu bikabu bya bo,

³bunu bwaba lubaku lwa bo, me nyi bateele kimbaangi ti, bo baheeri mu kiteesu kyalutila lubaku lwa bo, mu bunsaalisi.

⁴Bo batuyingukiri kwalaka, kuri ti bo se babaka bweese bwa kuha lubakusu, mu kisalu kitariri bangisi.

⁵Bo bayirika ma lutila kiteesu ti na ma twaba twatsima beetu, bo batekisiri kuha mitima kuri Mfumu, tumi kuri beetu mu kutya kwa Nzaambi.

⁶Hango-nkuumbu, beetu twasyaamisini Tito, mpisi kamana kisalu kya lubakusu kikyo, ki kamwaabaandika kuri beenu.

⁷Ngo bukuri beenu luri na byobinso byabuukula: kanyi, lungweensu, nyaabulu, kuheme mu myominso, na ntiilu yi luri na yo mu beetu; lo beenee se babuukula mu bweese bubwo.

⁸Me nyahele kuluha lutumu, kasi me nyiludzoonsolo mu kuheme kya bambaasi, mu kuri ti beenu se lusoongo bungwanwa bwa ntiilu yeenu.

⁹Mukwongo, beenu luyaari bweese bwa Mfumu yeetu Yesu Kiristo: nde waba kisina, kasi mu ntoono beenu, walwaata buwelu, mpisi heki mu buwelu bwaandi, beenu luba bisina.

¹⁰Me nyiluha kitsimi kya mu mimyo: mukwongo, myayelemene mu beenu mimami, beenu lwaba batete kari munu mu kutolo lubakusu ko, ngo na mu kubaka kitsimi kya bubwo, kuholosono mu mubvu wayooko.

¹¹Ngo mu lumalu, kuundulee kisalu kikyo, mpisi heki mamo ma lutiiri kukukisa, bunu buri lubaku lweenu, mayelemene na kifiki kya kutya kweenu.

¹²Bukuri mbuti bitsimi biri byabibwete, lo bataamburi kikabu, bunu buri bi tubakiri nkani ka mu bi tuheriri kubaka ko.

¹³Mukwongo, ka kuri ti beenu ngo bari lukoto mu mpasi, heki bakaka babaka lubakusu ko, ngo kasi mu kusa nsiisa;

¹⁴mu ntaangu ya lumalu, bibyo bi luri na byo bya mansaalisi, sa byabakisa babo bahele na kitotolo, mpisi heki ha luba beenu se kuri kitotolo pe, bi baba na bo bya mansaalisi bibakisa beenu, mpisi heki kuba nsiisa,

¹⁵bunu buri matinu: «Wunde waba na byalaka, kasii ba na bya mansaalisi ko; na wunde waba na byantele, kasii ba na bi kaheriri ko.»

¹⁶Matoondo kuri Nzaambi, wasa mu mutima Tito, kuheme kwokumosi na ku turi na beetu mu beenu.

¹⁷Nde wataamburi mbila yeetu mu kuheme kwokunso, na nde-meene wabakiri kitsimi kya kwiisa kuri beenu.

¹⁸Beetu twaheekiri mpaangi mosi, yikweyende kintwaari na nde, mpaangi yiyo mabuundu momanso mari mu kumusiikaana, mu dyaambu ditariri Musamu Wamubwete.

¹⁹Kari minimyo ko, ngo mabuundu mamo mamusooriri se mu kweyende na beetu, mu kisalu kya lubakusu ki turi mu kwesala, mu kusaka nkeembu ya Mfumu nde-meene, na mu kusoongo kifiki kyeetu.

²⁰Beetu tukwebata maseembu, mu mitariri bwa kusalila mboongo dzalaka dzi bari batuha;

²¹bukuri beetu tutiiri kuyirika mamabwe, kari hani ha busu bwa Mfumu ko, ngo se na ha busu bwa baatu.

²²Beetu twaheekiri mpaangi yeetu mu kweyende na bo, mu mantaangu malaka, beetu twamutsitsiri, mu kumono buri kuheme kyaandi, ngo mu lumalu kuheme kwaandi kweki kwabvulila mu ntoono nsiitu dzalaka dzikari na dzo mu beenu.

²³Ti hayuku mu ntoono Tito wu turi kintwaari, mbaasi yaami ya kisalu ku luri beenu; ti hayuku bampaangi beetu, bantumu ba mabuundu, bobanso bakwesala mu nkeembu ya Kiristo.

²⁴Yirikee kusoongo, ha busu bwa mabuundu, kidiimbu kya ntiilu yeenu, na kimweese kyeetu mu beenu kuri bo.