Read Beembe 2 Kol 9 Bible Online

2 Kol 9 - Beembe bible

2 Kol 9

¹Mu mitariri kisalu kya mbakusulu bangisi, me nyahele kumono mufunu mu kulutinina.

²Mukwongo, me nyaari kifiki kya beenu, na mu kyo me nyiri na kimweese mu beenu kuri bari Makedonya. Bari ku Akaya beki bayirima kuholosono mubvu wayooko, na kuheme kwa beenu kwaheeri nsyamusunu kuri balaka mu bo.

³Ngo me nyaluheekiri bampaangi babo, mpisi heki kimweese kya beetu mu beenu, kihele kuba kya buunu mu ntoono yiyo, na kuri ti beenu luba bayirima, bunu bu nyabee leele;

⁴mu kubata kuri ti, mu nsiitu dza bubwo beetu tufwa nsoni, mu kuhele kuleele ti beenu lufwa nsoni, mbuti heki bari Makedonya biisaana kintwaari na me, bamwii kuri ti beenu lwahele kuyirima.

⁵Ngo me nyamwii mufunu, mu kuloombo kuri bampaangi babo, mpisi batekesele kwiisa kuri beenu na batekesele kuyirikisa bikabu bya lubakusu bi luri lwasa nsiilulu, mpisi heki lubakusu lulwo luba bunu kikabu kya bunsaalisi nkani ka kya lukakutu ko.

⁶Yaabee ti: Wunde wukuna mwaa-kwantele sa katolo se mwaa-kwantele, na wunde wukuna kwalaka sa katolo se kwalaka.

⁷Mpisi muutu kaha bunu bu kari katsima kunsa mutima waandi, kwahele nyoongunu bunu pe mu kukwiikisa; bukuri Nzaambi tiiri wunde wuhaanaa mu kiminu.

⁸Nzaambi wakuka mu kululuulusa mu mabweese ma bitsuumbu-bitsuumbu, mpisi heki mu mantaangu momanso beenu luba na byakuka, na luba se na bya mansaalisi mu kweyirika momanso mamabwe,

⁹bunu bu diri dyatinu: «Nde kookabulaa, nde koohaanaa kuri bawelu, nsungumunu yaandi yinamitina kwakinkulu.»

¹⁰Wunde wuhaanaa nsaangi kuri mukuni, na byandya bya kudya, sa kaluha nsaangi, sa kafunisa dzo, na sa kamenise bimbutu bya nsungumunu yeenu.

¹¹Beenu sa lwaba bisina mu myominso, mpisi lweha bikabu bya bitsuumbu-bitsuumbu, bisa kuri ti mu kisalu kya beetu, baatu babvutula matoondo kuri Nzaambi;

¹²bukuri kisalu kikyo kya ntolulu bikabu, kari lunu lubakusu kiha kuri bangisi ko, ngo se kisa kuri ti, baatu babvutula matoondo malaka kuri Nzaambi.

¹³Bamonaa bubwe bwa kisalu kikyo, bo sa bakeembese Nzaambi, mu ntoono kutumuma ku luri mu kusoongo beenu, mu Musamu Wamubwete wa Kiristo, na mu kukabula lubakusu lweenu kintwaari na bo, na baatu bobanso.

¹⁴Mu nsaambulu dza bo mu beenu, bo sa basoongo musoongo walaka wu bari na nde, mu ntoono bweese bwa mansaalisi bwaluha Nzaambi.

¹⁵Matoondo kuri Nzaambi mu ntoono kikabu kyaandi kyankimukunu!