Read Beembe Nga 1 Bible Online

Nga 1 - Beembe bible

Nga 1

¹Me Pawulo ntumu, kari bu tiiri baatu bunu pe muutu ko, ngo bu tiiriri Yesu Kiristo na taayi Nzaambi wamufulukisa mu bafwa.

²Mu kintwaari na bampaangi bobanso bari na me, turi mu kutina kuri mabuundu ma mu nkoonsi ya Ngalatya.

³Bweese na kiyeengi, bifumunaa kuri Taayi dyeetu Nzaambi, na kuri Mfumu Yesu Kiristo, biba na beenu.

⁴Yesu Kiristo wayekiri nyutu yaandi mu ntoono masumu ma beetu, mpisi heki katukuula mu ntaangu yayibi yimayi, bunu buri kutya kwa Nzaambi wuri Taayi dyeetu.

⁵Kuri nde kuba nkeembu mu mibvu ngo mibvu! Amene.

⁶Me nyimono dyo dya nkimukunu, ti mu mawasu-mawasu, beenu lutekele mbisa, kuri wunde waluteele mbila mu bweese [bwa Kiristo], mu ntoono Musamu mukimi Wamubwete.

⁷Mukwongo, kuri Musamu mukimi ko, mbuti ka bangaa-kisaangila ko, batiiri kukitula Musamu Wamubwete wa Kiristo.

⁸Ngo ti hayuku beetu, bunu pe mbasi ya ku mayulu wuluyaabisiri Musamu Wamubwete wasoboko na wunde wu turi twaluyikisa, lo kabwilikila mpopi!

⁹Bunu bu twaleele, na mu lumalu nyibweese kuleele ti: mbuti muutu wuluyaabisa Musamu Wamubwete wasoboko na wunde wu luri lwataambula, lo kabwiilikila mpopi!

¹⁰Mukwongo, mu lumalu, me nsalila makwa mu kuyirika ma tiiri baatu hoti ma tiiri Nzaambi? Buri haho mbweeyulu kuri baatu nyisaka? Mbuti mbee nyakiri kwesaka mbweeyulu kuri baatu, lo nketyee kuba nkutu Kiristo ko.

¹¹Kuri beenu bampaangi nyiyaabisa ti: Musamu Wamubwete wu nyiri nyayaabisa kari bu tiiriri baatu ko.

¹²Nyahele se kutaambula nde kuri muutu; kuri muutu ti mosi se ko wanyikisa nde, ngo me nyataambula nde mu nyabusulu ya nde-meene Yesu Kiristo.

¹³Beenu lwayukiri bwaba ndyaatulu yaami, mu ntaangu yi nyaba mu Nzaambi Bayudayo. Me nyakwaamisa dibuundu dya Nzaambi mu kiteesu kyabvulila, na nyadibamisa.

¹⁴Mu kinzaambi kya Bayudayo, me nyaba mvuriri kiteesu na ba turi kiseendu kimosi, ba kitsuumbu kya me. Me nyaba nyakaangama kwalaka mu kikulu kya bakuutu baami.

¹⁵Ngo [Nzaambi], wansoolo kuholosono mu mwooyo nguri yaami, wanteele mbila mu bweese bwaandi, bu kamono dyo ti dyadibwete,

¹⁶mu kumonokoso Mwaana waandi kuri me, mpisi heki me nyimuyaabisa ha kakati dya makaanda; ha nsi na nsi, me nyasii loombo ndoongi kuri muutu ko.

¹⁷Me nyasii kweende se ku Yerusalemi kuri bantumu batekisiri mu kisalu na me ko, ngo me nyateleme na nyayende ku nsi ya Arabya, na nyabweese kubvutuka ku Damasiko.

¹⁸Tumi, mibvu mitatu bu myaluta, me nyatoomboko ku Yerusalemi mu kuyaabisina na Kefa, na nyadzakala kuri nde biluumbu kuumi na bitaanu.

¹⁹Me nyasii mono bantumu bakaka ko, ngo wuni Yakobo, mpaangi Mfumu.

²⁰Ma nyiri mu kutinina beenu, nkati ha busu bwa Nzaambi, me nyahele kusa mpya.

²¹Tumi, ha nyeki kweendana, mu nkoonsi ya Sirya na ya Kilikya.

²²Mabuundu ma Kiristo ma ku Yudaya, maba mahele kunyaaba mu kidziri.

²³Ngo bo bunu bu bayukiri ti: «Wunde waba kwetukwamisaana mu ntaangu yayikulu, mu lumalu weki kweyikisa kanyi di kaba kwebamisaana haba tete.»

²⁴Mabuundu mamo masiika Nzaambi mu ntoono me.