Read Beembe Nga 3 Bible Online

Nga 3 - Beembe bible

Nga 3

¹Sa beenu bari Ngalatya bimpuumbulu! Na waluloko? Buri kari ha miisu mya beenu, bari bayirika kubaangula bunu bu bakomini Yesu Kiristo ha yulu kuruwa ko?

²Yaabiseenu me ntoono mosi: Mpeeve yi luri lwataambula, haho mu biyiriki bya mangisi, hoti mu ma luri lwayuka ma kanyi?

³Nkati ngwanwa ti beenu bimpuumbulu luri? Bu lwabaandikiri mu Mpeeve, ngo mu lumalu lweki manisa mu muswinyi?

⁴Buri momanso ma luri lwayika mamo mabuunu? Heki mbuti ngwanwa ti mabuunu!

⁵Wunde wuri mu kuluha Mpeeve, na wuri mu kweyirika bimaangu ha kakati dya beenu, haho mu biyiriki bya mangisi, hoti mu Maampu ma luri lwayuka ma kanyi?

⁶Ngo bukuri Abalaami kasaana kanyi mu Nzaambi, mu didyo bari bamutaangula mamo bunu nsungumunu,

⁷lo yaabeenu ti, babo bari na kanyi ngo baala ba Abalaami.

⁸Matinu bu matekisiri kuyaaba, ti Nzaambi wululukisaana bahele kuba Bayudayo mu kanyi, matekisiri se kuyaabisa Musamu Wamubwete wumawu kuri Abalaami ti: «mu ye makaanda momanso sa maba masakumunu.»

⁹Mu kiteesu kikyo, baatu bari mu kanyi, bari basakumunu ha kimosi na Abalaami ngaa-kanyi.

¹⁰Bobanso bari mwooyo mu biyiriki bya Mangisi, bari kunsa mpopi; bukuri dyatinu ti: «Mpisi wunde wahele kukwiikama, mu kukukisa momanso matinu mu mukaanda Mangisi, lo kaba kunsa mpopi.»

¹¹Diri dya ngwanwa, kuri muutu ko wuba walulukusu ha busu bwa Nzaambi, mu Mangisi, bukuri diri dyatinu se ti: «Ngaa-kusuunguma sa kaba mwooyo mu kanyi.»

¹²Ngo Mangisi mahele kufumuna mu kanyi; kasi: «Wunde wumakukisa sa kaba mwooyo mu mo.»

¹³Kiristo watukuula mu mpopi ya Mangisi, bu kabwilikila mpopi mu ntoono beetu, bukuri dyatinu ti: «Mpisi wunde wu bari bamanika ha yulu muti, lo kabwilikila mpopi.»

¹⁴Mu bubwo, mu Kiristo Yesu, lusakumunu lwa Abalaami luri lwatubuka natee kuri bahele kuba Bayudayo, mpisi heki tutaambuleenu Mpeeve yi bari batusa lusiilulu mu kanyi.

¹⁵Bampaangi, me nyidzoonso bunu budzoonsolaana baatu: mu misiku mya muutu mu masaala, kuri muutu mukimi wutsiitsa kuyisila bunu mpe kuteeteke ntoono ti mosi ko.

¹⁶Nsiilulu basii dzo kuri Abalaami na kuri wapalila mu nde. Bahele kuleele ti: «kuri bapalila mu nde», bunu ti kuri baatu balaka, ngo kuri muutu mosi, «na kuri wapalila mu ye», ngo Kiristo.

¹⁷Me bu nyiiri mu kuleele ti: lulelusunu lwa Nzaambi lu katekesele kukaanga, ka lutsiitsa kuba lwayaalu kuri Mangisi ko mayisa, ha mambisa ma nkama na makuumi matatu ma mibvu, mu kubwiisa lusiilulu.

¹⁸Mukwongo, mbuti saala kubakula mu mangisi, lo ka dibweese kufumuna mu lusiilulu ko; ngo mu lusiilulu Nzaambi kari kaha bweese kuri Abalaami.

¹⁹Ngo Mangisi ma nki kwaandi? Mo mari mu kubweeseme mu kuri ti lumvuki lumonokono, natee kukwiisa kiseendu ki basiiriri lusiilulu. Bambasi bayaabisa Mangisi mamo mu kooko kwa munkabu-kati.

²⁰Munkabu-kati mbuti kibari kimosi, lo nde pe; ngo Nzaambi nde-kaka wuri.

²¹Buri Mangisi mari kitaatu na nsiilulu [dza Nzaambi]? Pele, kuri ti bele ko! Mukwongo, mbuti kuri ngisi yi baheeri yakuka mu kuha kidziingu, lo ngwanwa nsungumunu yikwiisikilaa mu Mangisi.

²²Ngo kasi, Matinu masoongo ti, bobanso bakaangama kunsa masumu, mpisi heki mu kanyi mu Yesu Kiristo, lusiilulu luba lwaha kuri bangaa-kanyi.

²³Tekesele kanyi dikwiisa, beetu twaba munsa boroko dya mangisi, batuduka ha kimosi, mu ntoono kanyi dyaba dyayelemene kuyabakana.

²⁴Mu didyo, Mangisi maba mukebi weetu natee ha yisiri Kiristo, mpisi heki mu kanyi, tuba twalulukusu.

²⁵Kanyi bu dyayisa, beetu twasaala kunsa lutumu lwa mukebi ko.

²⁶Mukwongo, beenu-banso luri baala ba Nzaambi, mu kanyi mu Kiristo Yesu,

²⁷bukuri, beenu-banso lwabotoko mu Kiristo, na lwalwaata Kiristo.

²⁸Kwa saala Muyudayo ko, Muhelene ko, nkutu ko, muutu wuri na bunsaalisi ko, kwahele bakala, kwahele mukyeetu, bukuri beenu-banso luri mosi mu Kiristo Yesu.

²⁹Mbuti beenu luri ba Kiristo, lo lwapalila mu Abalaami, bakondiri ba saala bunu buri lusiilulu.