Read Beembe Nga 4 Bible Online

Nga 4 - Beembe bible

Nga 4

¹Mu lumalu me nyileele ti: mu ntaangu yonso yiri mukondiri-saala wakiri mwaa-mwaana, lo wahele kusobokono na nkutu mu ntoono ti mosi, lu hayuku nde mfumu mu byobinso.

²Ngo kasi, lo wuri kunsa lutumu lwa babuukisi na batwaalisi, natee kukuka kiteesu kya leeriri taayi dyaandi.

³Beetu se bwobumosi, bu twaba twakiri mwaa-baala, twaba kunsa bunkutu bwa misamu mya nsi.

⁴Ngo ntaangu bu yakuka, Nzaambi waheeke Mwaana waandi, wabutuka mu wa mukyeetu, na watumuma mu Mangisi,

⁵mpisi heki, kakuula bari kunsa Mangisi, na tutaambuleenu kiteesu kya kuba baala.

⁶Ngo bukuri beenu luri baala, Nzaambi waheeke Mpeeve ya Mwaana waandi, munsa mitima myeetu, yiri mu kubikisa ti: «Aba, ho Taata!»

⁷Mu didyo, ye wahele kubweese kuba nkutu ngo wuri mwaana; na mbuti ye wuri mwaana, lo wuri se mukondiri-saala mu Nzaambi.

⁸Kasi mu ntaangu yayikulu, bu lwaba lwahele kuyaaba Nzaambi, beenu lwaba bankutu, kuri bibyo biri byahele kuba Nzaambi mu ngwanwa.

⁹Ngo mu lumalu, bu lumwaayaaba Nzaambi, dibvuriri bubwete diri lumwaayabakana kuri Nzaambi, dyaburi beenu lubweese kubvutuka kuri bitotolo byahele makwa na byabuunu, mu nzala kubweese kuba bankutu kuri byo?

¹⁰Beenu luri mu kwebvumina biluumbu, mangoondo, mantaangu na mamvula.

¹¹Ngo me nyiri na boomo mu ntoono beenu, ti mpasi dzi nyiri nyamono mu beenu, dzikwiisa kuba kwaandi dzabuunu.

¹²Bampaangi, me nyikuyingukila, beeneenu bunu me, bukuri me se, nyiri bunu beenu. Beenu lwahele kunyirikila ntoono ti mosi yayibi.

¹³Beenu luyaari ti, me nyaluyaabisiri Musamu Wamubwete, mu lwatete, kuri lo nyabeele mu muswinyi.

¹⁴Mu ntoono nyutu me, beenu lwakoto mu mpasi, ngo lwasii nyaafuna me na kundobokolo mante ko, kasi beenu, lwantaambula bunu Mbasi Nzaambi, bunu Kiristo Yesu.

¹⁵Hango lwambwe lwa beenu hari luri? Mukwongo, me lo nyiluteeriri kimbaangi ti, mbuti bwakuka, nkani haba beenu lwaketi kuhokolo miisu myeenu na kumpa myo.

¹⁶Buri me mutaatu beenu nkitukiri, bukuri me nyiri mu kululeele ngwanwa?

¹⁷Bo bari na kuheme mu beenu, ngo kari mu kusaka bubwe bwa beenu ko. Bo batiiri kulutatula na me, mpisi heki beenu luba na kuheme mu bo.

¹⁸Diri dyadibwete, mu kuba na kuheme mu mamabwete, mantaangu momanso, nkani ka munu mu mantaangu mari, me nyiri ha busu bwa beenu ko.

¹⁹Baala baami, me nyiri mu kubweese kumono misoongo mya mbutulu, natee kuyirima Kiristo munsa beenu.

²⁰Me mbee ntiiri kwaandi kuba na beenu lumalu, na kuyiinga nzoonsulu yaami, bukuri me nyidunga mu ntoono beenu.

²¹Leelee meti me, beenu lutiiri kuba kunsa Mangisi, buri beenu lwahele kuyuka mamo maleele Mangisi?

²²Mukwongo, diri dyatinu ti: Abalaami wabuta baala boolo, mosi mu mukyeetu wa nkutu, wakaka mu mukasi wahele kuba nkutu.

²³Ngo wunde wu kabakiri mu nkutu wabutuka mu muswinyi, kasi wunde wu kabakiri mu mukasi wahele kuba nkutu, wabutuka bunu bwaba lusiilulu.

²⁴Bakyeetu babo bari bunu nkuma: bari mu kusoongo ndelusunu dzoolo. Lulelusunu lwamosi lwafumuna ku mulaandu wa Sinayi, mu mbutukulu ya bunkutu, ngo Angara.

²⁵Angara mulaandu wa Sinayi mu nsi ya Arabya; nde wafwanikina na Yerusalemi dya lumalu, bukuri nde na baala baandi, bankutu bari.

²⁶Yerusalemi dya ku yulu diri na bunsaalisi, dyo diri nguri beetu.

²⁷Mukwongo, diri dyatinu ti: «Keembe kwaaku, ye wa kisita, wuhelaa kubuta! Fula miloolo mu kiminu, ye wuhelaa kumono misoongo mya mbutulu; bukuri mukyeetu wafuukila bvuriri baala na mukyeetu wuri na mulumi.»

²⁸Ngo bampaangi, beenu se luri baala ba lusiilulu bunu buri Isaki.

²⁹Ngo bunu buri mu ntaangu yayikulu, wabutuka mu muswinyi, wakwaamisini wabutuka mu mpeeve, bunubwo se buri mu lumalu.

³⁰Ngo Matinu nki mari mu kuleele? «Binga nkutu na mwaana waandi, mpisi heki mwaana nkutu kahele kukondolo saala, bo na mwaana mukyeetu wahele kuba nkutu.»

³¹Hango-nkuumbu, bampaangi, beetuneenu ka turi baala ba mukyeetu wa nkutu ko, ngo baala ba mukyeetu wahele kuba nkutu.