Read Beembe Efe 3 Bible Online

Efe 3 - Beembe bible

Efe 3

¹Mu ntoono yiyo, me Pawulo, nyiri boroko dya Yesu Kiristo, mu beenu makaanda.

²Kampe beenu lwayukiri, bunu buri kisalu kya bweese bwa Nzaambi kibari baha me, mu ntoono beenu.

³Me nyataambula mpaanu mu nyabusulu, bunu bu nyatekisiri kulutinina mu bukufi.

⁴Lumanaa kutaanga, beenu sa lwabakula nkya madyeele me nyiri na mo, mu mitariri mpaanu dza Kiristo,

⁵dziri mu biseendu byalabuka, basii yaabisa dzo kuri baala ba baatu ko, ngo mu lumalu, Mpeeve mwaayaabisa dzo kuri bantumu baandi bangisi, na kuri babikiri.

⁶Mu nzila ya Musamu Wamubwete, makaanda se meki bakondiri ba saala mu kintwaari, bari mu nyutu mosi, na bataambula ha kimosi na Bayudayo, lusiilulu luri mu Yesu Kiristo.

⁷Mu ntoono Musamu Wamubwete, me nyayeki kisari, bunu buri kikabu kya bweese bwa Nzaambi bu baheeri kuri me, bunu buri kisalu kya mpinu dzaandi.

⁸Kuri me wu bvuriri buntele mu bangisi bobanso, bari baha bweese bumabu, bwa kuyaabisa kuri makaanda busina bwa Kiristo bwahele mbangukulu,

⁹na mu kuyirika kubaangula kuri bobanso bunu buri kisalu kya mpaanu ki bari basweeke, kuholosono mu mibvu, mu Nzaambi, wuri nde muyiriki bitotolo byobinso.

¹⁰Mu lumalu, mu nzila ya dibuundu, batumi na bamfumu ba kinsongi-yulu bamwaayaaba madyeele ma Nzaambi ma bitsuumbu-bitsuumbu,

¹¹bunu buri bitaasi bya mpisi mibvu, bikari kayirika mu Kiristo Yesu, Mfumu yeetu.

¹²Mu kanyi mu nde, beetu turi na bunsaalisi bwa kudzoonso na kukokosolo kuri Nzaambi mu nsiitu dzodzinso.

¹³Hango, me nyiloombo ti yaa luholo-bito ko, mu ntoono mpasi dzaami, dzi nyiri mu kwemono me mu beenu; mpasi dzidzo ngo nkeembu yeenu.

¹⁴Mu didyo, me nyitsukuma ha busu bwa Taata,

¹⁵kuri nde, mpisi kaanda ku mayulu na ha butoto, diri dyataambula nkuumbu.

¹⁶Nde, mu Mpeeve yaandi, kaluha makwa mu muutu wa kunsa-kati, bunu buri busina bwa nkeembu yaandi mu mpinu.

¹⁷Nde kadzakisa Kiristo kunsa mitima myeenu mu kanyi, na luba lwamene myaansi na lwatuunguma kunsa ntiilu,

¹⁸mpisi heki luba na makwa, ma kubakula mu kintwaari na bangisi, bunu buri bunene, bula, nzangumunu na musundu,

¹⁹luyaaba ntiilu ya Kiristo, yalutula nyaabulu. Mu bubwo beenu luba lwaluula natee mu nduululu yoyinso ya Nzaambi.

²⁰Kuri wunde wakuka mu kuyirika, kwakinkulu, ha yulu momanso ma tuloombaa bunu pe ma tutsimaa, bunu buri mpinu dzikwesala mu beetu,

²¹kuri nde kuba nkeembu, mu dibuundu na mu Kiristo Yesu, mu ntoono biseendu byobinso, mu bibvu ngo bibvu, bunubwo. Amene.