Read Beembe Efe 6 Bible Online

Efe 6 - Beembe bible

Efe 6

¹Baala, tumumeenu mu Mfumu kuri bataayi na banguri beenu, bukuri mamo masuunguma.

²«Bvumina taayi dyaaku na nguri yaaku», lulwo ngo lutumu lwatete luri na lusiilulu:

³«mpisi heki ye ba mu lwambwe, na ba na kidziingu kyakila ha butoto.»

⁴Bataayi, yaa lwebakisa baala beenu nkesi ko, ngo babuukiseenu kunsa nyikusulu na mandoongi ma Mfumu.

⁵Bankutu, tumumeenu kuri bamfumu beenu ba muswinyi, mu kibvumi na mu ntekutulu, kunsa nkulukulu mutima, bunu ti kuri Kiristo.

⁶Kari hana ha miisu mya bo ko, bunu ti mu nzala kubweeye kuri baatu, ngo bunu bankutu ba Kiristo bari mu kuyirika kutya kwa Nzaambi, mu mutima wamutsiina.

⁷Basalileenu mu mutima-bubwete, kuri bunu beenu lusalila Mfumu nkani ka baatu ko,

⁸bu luyaari ti mpisi muutu, mbuti yirikiri mamabwe, lo sa kamataambula kuri Mfumu, ti kaba nkutu bunu pe kahele kuba nkutu.

⁹Beenu se bamfumu, yirikeenu bwobumosi kuri bankutu beenu, mu kuhele kwesalila kibakala, bu luyaari ti, na bo na beenu luri na Mfumu yiri mu mayulu, na kuri nde kimpengeki kyo pe.

¹⁰Mu misiiri ngo miri, yendee lwebakila makwa mu Mfumu, mu makwa ma mpinu dzaandi.

¹¹Lwateenu binwaanunu bya Nzaambi, mu kubangisina kuteleme na ngwii ha busu bwa biyiriki bya dyabulu.

¹²Bukuri kikiindu ki turi na kyo, kari kya kunwaanisa muswinyi na makila ko, ngo kasi kya kunwaanisa bakuutu, batumi, na bamfumu ba nsi ya mampimbisi yimayi, kya kunwaanisa mampeeve mamabi mari ku kinsongi-yulu.

¹³Hango-nkuumbu, holeenu binwaanunu bya Nzaambi, mpisi heki lubangusina kusa bunkuri mu kiluumbu kyakibi, na kuba bateleme na ngwii, bu lumeeni kuyirika momanso.

¹⁴Telemeenu na ngwii, lwateenu ngwanwa ngo musweele mu luketu lweenu, na lwaateenu nsungumunu ngo kinkuta kya mu ntulu kya mukaanda kibulu.

¹⁵Lwaateenu se masapaatu mu miilu, ngo malwangukila ma kunata Musamu Wamubwete wa kiyeengi.

¹⁶Mu mpisi diba, kwaateenu kikakusulu kya kanyi, mu kyo beenu lubangusina kudzimisa misomono mya mbaawu mya Ngaa-bubi.

¹⁷Na taambuleenu mpu ya kiseengu ya mvuukulu, na mbeesi yayila ya Mpeeve ngo Maampu ma Nzaambi.

¹⁸Mu nsaambulu dza bitsuumbu-bitsuumbu na ndoombulu, saambileenu mu ntaangu ngo ntaangu mu Mpeeve. Mu didyo, beenee naana, beenee na kifiki, loombee mu bangisi bobanso,

¹⁹na mu me se, mpisi heki me bampa dyaambu dya kuleele, mu ntaangu yintiiri kudzibula munwa waami, mu kuyaabisa mu bunsaalisi mpaanu dza Musamu Wamubwete.

²⁰Mu Musamu wunde, me nyiri mumonikisi wuri mu bikonyi, mpisi heki me nzoonsolo, mu bunsaalisi bunu bu nyelemini kuyikisa.

²¹Me ntiiri ti beenu se luyaaba misamu mitariri me, mi nyiri mu kusalila. Tikiko, mpaangi ya mutima, na kisari kyakwiikama mu Mfumu, sa kaluyaabisa myominso mimyo.

²²Me nyamuheekiri kuri beenu mu ntoono yiyo, mpisi heki beenu luyaaba misamu mitariri beetu, na kasyaamisa mitima myeenu.

²³Kiyeengi, ntiilu na kanyi bifumunaa kuri Nzaambi Taata, na kuri Mfumu Yesu Kiristo biba kuri bampaangi.

²⁴Bweese buba kuri bobanso, batyaanaa Mfumu yeetu Yesu Kiristo, mu ntiilu yiri yabiiyaa ko.