Read Beembe Fil 3 Bible Online

Fil 3 - Beembe bible

Fil 3

¹Mu misiiri ngo miri, bampaangi baami, monee kiminu mu Mfumu. Me nyahele kuholo-bito mu kulutinina misamu myomimosi mimyo, miha nsiitu kuri beenu.

²Seenee madyeele mu bambwa, seenee madyeele mu bisari byabibi, seenee madyeele mu nteendulu bubakala yampya.

³Mukwongo, bateende bubakala ngo beetuneenu, tusaambilaa mu Mpeeve ya Nzaambi, tumonaa kimweese mu Kiristo Yesu, na tuhelaa kusiila nsiitu mu muswinyi,

⁴ti bukuri me-meene nyasiila nsiitu se mu muswiini. Mbuti muutu mukimi wutsima ti wasa nsiitu mu muswinyi, lo me mvuriri na nde.

⁵Me banteendiri bubakala kiluumbu kya mpoomo, nyiri mu kitsuumbu kya Isaheli, mu kaanda dya Benyamini, Muhebeleho wabutuka mu Bahebeleho. Mu mitariri mangisi, me Mufarisi,

⁶mu kifiki, me mukwaamisi dibuundu, mu mitariri nsungumunu mu mangisi, me nyiri na mi banseembele ko.

⁷Kasi bibyo byaba ndaandu kuri me, me nyamono kuri ti byafuukila, mu ntoono Kiristo.

⁸Ngo kasi nyimono se ti byobinso byafuukila, ha busu bwa nyaabulu yibvuriri bunene mu Kiristo Yesu, Mfumu yaami. Mu ntoono nde, byobinso bi nyaba na byo nyamana kubibwoongolo, na me nyibimono bunu bitiiti byaloosu, mpisi heki me mbaka Kiristo,

⁹na bamwiinina me mu nde, kuri nyahele na nsungumunu ya me-meene, yiri kubakila kari mu mangisi ko, ngo yiri kubakila mu kanyi mu Kiristo, yifumunaa kuri Nzaambi, yatuunguma ha yulu kanyi.

¹⁰Me ntii kuyaaba nde, na kuyaaba mpinu dza mfulukulu yaandi, na kuba kintwaari mu mpasi dzaandi, mu kunama kifwaani kya nde mu lufwa lwaandi,

¹¹mbuti bwakuka ti me se ntubuka mu mfulukulu ya bafwa.

¹²Pele, me nyahele kuleele ti mwaabakila bunu pe mwaatubuka ha ndilu, ngo nyiri mu kudzumuna mu nsiitu ya kwekwaata, bukuri me se Kiristo Yesu wayeki wankwaata.

¹³Bampaangi, me-meene ngo wuri nyitsima ti nyakiri kukwaata pe; ngo musamu mosi me mbinikini: kudzimikina myominso miri ku mambisa, mu kunama miri ku mankula,

¹⁴nyiri mu kudzumuna mu kutubuka ha ndilu, mu kubaka kimbwanga kya mbila ya ku yulu, ya Nzaambi mu Kiristo Yesu.

¹⁵Ngo beetu-banso bu turi baatu bayirima, tubeenee na mbeelu ya bubwo; na mbuti luri mu kiteesu kya mbeelu yikimi, lo Nzaambi sa kaluyaabisa dyo.

¹⁶Ngo mu ha tumwaatubukee hamaha, tudyaatilee ha kimosi.

¹⁷Bampaangi, beenee bakwesombosolo me, talee bakwedyaatila mu kifwaani ki luri mu kumono mu beetu.

¹⁸Mukwongo, bunu bu nyaba kweluleelaana mu ntaangu ngo ntaangu, na mu lumalu se nyiluleele kunsa kidilu ti, balaka bakwedyaatila mu butaatu bwa kuruwa dya Kiristo.

¹⁹Nsukulu bo ngo mfuukulu, Nzaambi bo ngo mwooyo waaku, na nkeembu bo kumwiina kunsa mya nsoni myaaku, bo bakwenama mya nsi.

²⁰Mukwongo, bula bweetu ngo mayulu, kukwo kuri Mubvuukisi wu turi mu kwekiinga, Mfumu Yesu Kiristo.

²¹Nde mbasi-tsuku wukitula nyutu yeetu ya manyoongi, kuri yiba bunu buri nyutu ya nde ya nkeembu, bunu buri mpinu dzi kari na dzo, mu kusuusa byobinso kunsa lutumu lwaandi.