Read Beembe Kol 1 Bible Online

Kol 1 - Beembe bible

Kol 1

¹Me Pawulo, ntumu Kiristo Yesu mu kutya kwa Nzaambi, na Timoteho mpaangi,

²kuri bampaangi bangisi na bakwiikama mu Kiristo, bari ku Kolosayi, bweese na kiyeengi kuri beenu bifumunaa kuri Taayi dyeetu Nzaambi biba na beenu.

³Beetu tubvutula matoondo kuri Nzaambi, Taayi dya Mfumu yeetu Yesu Kiristo, bu tusaambilaa mu beenu mantaangu momanso.

⁴Beetu twayukiri badzoonsolo mu kanyi di luri na dyo mu Kiristo Yesu, na mu ntiilu yi luri na yo mu bangisi bobanso,

⁵mu ntoono nsiitu yibari balusweekele mu mayulu, yi luri lwatekesele kuyuka, mu maampu mangwanwa ma Musamu Wamubwete.

⁶Musamu meene watubuka natee kuri beenu, bwobumosi se kari mu nsi yansiina, wuri mu kwebuta bimbutu na wuri mu kwebuuka; bunubwo se kari mu kwesala mu beenu, kuholosono kiluumbu ki luri lwayuka, na ki luri lwabakula bweese bwa Nzaambi kunsa ngwanwa.

⁷Epafara, nduku yeetu ya kisalu ya Mutima, bunubwo se kari kaluyikisa, nde wuri kuri beenu kisari kyakwiikama kya Kiristo.

⁸Nde wamonikisi kuri beetu, ntiilu yaluha Mpeeve.

⁹Mu didyo se beetu, kuholosono kiluumbu kitwayukiri mamo, twahele kuhoto kusaambila mu beenu, na kuloombo kuri ti, luba lwaluula mu nyaabulu ya kutya kwaandi, mu madyeele momanso na mbakukulu ya kimpeeve,

¹⁰kuri ti beenu lwedyaatila mu nzelu yayelemene mu Mfumu, mu kubweeye kuri mu myominso, mu kubuta bimbutu mu mpisi kiyiriki kyakibwete, na kubuuka mu nyaabulu ya Nzaambi.

¹¹Mu bubwo beenu luba na mpinu mu myominso bunu buri makwa ma nkeembu yaandi, mu kuba na kifiki na kukiindisa mutima mu myominso. Mu kiminu,

¹²bvutuleenu matoondo kuri Taata, wasa kuri ti luba bakuka mu kutaambula kikuuku kya saala dya bangisi kunsa buungi.

¹³Nde watupalisa mu lutumu lwa mampimbisi, na watunata mu Kimfumu kya Mwaana wa ntiilu yaandi.

¹⁴Mu nde, beetu turi na nkuululu na mpemisi ya masumu.

¹⁵Kiristo ngo kidzisi kya Nzaambi wuri bamumonaa ko. Nde ngo watete wabutuka mu biyiriki byobinso,

¹⁶bukuri mu nde, bitotolo byobinso bari babiyirikila, mu mayulu na ha butoto, bi bamonaa na biri bamonaa ko, ti mamboloko, ti bumbyaasi, ti bimfumu, ti lutumu. Bitotolo byobinso mu nde, na mu ntoono nde, bari babiyirikila.

¹⁷Tekesele byobinso biba, lo nde wuri, na bitotolo byobinso biri na kidziingu mu nde.

¹⁸Nde ngo mutu nyutu, nyutu ngo dibuundu. Nde wuri mbandukulu, watete wafuluka mu bafwa, mpisi heki mu byobinso nde kaba watete.

¹⁹Bukuri Nzaambi watiiri kudzakisa nduululu yoyinso ya kinzaambi kyaandi mu nde,

²⁰na mu kasa nyukusunu ya bitotolo byobinso mu nde, na mu ntoono nde. Nde wasa kiyeengi ha kakati dya bitotolo biri ha butoto na biri ku mayulu, mu makila ma mwaana waandi ha lukuruwa.

²¹Beenu se mu ntaangu yaluta, lwaba banzeense na bataatu mu bitsimi, mu ntoono biyiriki byabibi.

²²Kasi mu lumalu, Nzaambi wasa nyukusunu mu lufwa lwa mwaana waandi mu nyutu ya muswinyi, mpisi kalumonokoso bangisi, bahele mi babaseembele, na bahele na mi babafuundila, ha busu bwaandi.

²³Ngo luyelemini kunamitina kuba batuunguma, na kuba na keketee mu kanyi, kwahele kusasika mu nsiitu ya Musamu Wamubwete wu luri lwayuka, wu bari bayaabisa kuri biyiriki byobinso ha butoto, na wu nyayeki me Pawulo kisari.

²⁴Mu lumalu, me nyimono kiminu, kunsa mpasi mu ntoono beenu, na me nyiri mu kukukisa mpasi dza mbamunu Kiristo, mu muswinyi waami, mu ntoono nyutu yaandi, ngo dibuundu.

²⁵Mu dyo, me nyayeki kisari, bunu buri bitsimi bya Nzaambi, bikari kaha kuri me, mu ntoono beenu, mu kukukisa maampu ma Nzaambi,

²⁶mpaanu dza Nzaambi dzaba dzasweeku, kuholosono mu mibvu na mu biseendu, dzeki dzayabakana mu lumalu kuri bangisi baandi.

²⁷Kuri bo, Nzaambi katiiri kuyaabisa, ha kakati dya makaanda, bunu buri busina bwa nkeembu ya mpaanu yimayi. Mpaanu yiyo ngo Kiristo mu beenu, nsiitu ya nkeembu.

²⁸Nde beetu turi mu kweyaabisa, mu kulubula mpisi muutu, na kuyikisa mpisi muutu, mu madyeele momanso, mpisi muutu kaba nyirimunu yakuka mu Kiristo.

²⁹Mu bubwo se, me nyiri mu kubama, mu kwenwaana bunu buri makwa maandi, mari mu kwesala mu me, mu mpinu.