Read Beembe Kol 2 Bible Online

Kol 2 - Beembe bible

Kol 2

¹Mukwongo, me ntiiri ti beenu luyaaba, nkya mudziingu me nyiri mu kwenwaana, mu ntoono beenu, mu ntoono bari ku Lahodikya, na mu ntoono babo bakiri kidziri kya me kumono pe mu muswinyi.

²Me ntiiri ti mitima mya bo miba myasyaamusu, baba babvuutuna mu kintwaari kunsa ntiilu, na mu kubaka busina bwobunso bwa nduululu ya madyeele, mu nyaabulu mpaanu dza Nzaambi, ngo Kiristo,

³mu nde mwaswekeme busina bwobunso bwa madyeele, na bwa nyaabulu.

⁴Me nyiri mu kuleele mamo, mpisi heki muutu kahele kaluwumuna mu nzoonsulu dza lupyelu.

⁵Mukwongo, mbuti heki mu nyutu ya muswinyi me nyahele kuba na beenu, ngo mu kimpeeve nyiri kintwaari na beenu, lo me nyimono kiminu, mu kumono ti beenu luri na bunkete, na luri babukekete mu kanyi dyeenu mu Kiristo.

⁶Ngo bu lwayeki lwataambula Kiristo Yesu Mfumu, dyaatilee mu nde,

⁷bu lwayeki lwamene myaansi, lwatuungu mu nde, na lwasyaamusu mu kanyi, bunu bu bari baluyikisa, bvutuleenu matoondo ha yulu matoondo.

⁸Seenee madyeele, muutu mu beenu kahele kubwa mu mweete wa madyeele ma nzoonsulu, na mu mawunu mabuunu, bunu buri kikulu kya baatu, na bunu buri bitotolo bya nsi, byahele kuba mu Kiristo.

⁹Bukuri mu nyutu ya nde, mwadzakala nduululu yoyinso ya kinzaambi,

¹⁰na mu nde beenu lwayeki lwaluula mu byobinso, nde wuri Mfumu ha yulu bobanso bari na kimfumu na bari na lutumu.

¹¹Mu nde se, beenu bari baluteende bubakala, mu nteendulu yahele kuba ya myooko mya baatu, ya nyubukulu nyutu ya muswinyi, ngo mu nteendulu ya Kiristo.

¹²Beenu baludziikiri mu mampeembe kintwaari na nde, mu mbotokulu; mu nde se, beenu bari balufukisa mu kanyi, mu mpinu dza Nzaambi wamufulukisi mu bafwa.

¹³Beenu lwaba lwafwa mu ntoono lumvuki lweenu, na bukuri lwaba lwahele bateende bubakala mu muswinyi weenu, ngo Nzaambi walusa bamwooyo kintwaari na Kiristo, mu kuluhemesene lumvuki lweenu lwolunso.

¹⁴Nde wayaala mukaanda wamubi wa mfuundulu bunu buri mangisi, wayisila nde mu kumukomono ha kuruwa.

¹⁵Bu kasyoonono kimfumu kya bakuutu na batumi, wabayanika mu kuba basaana ha busu bwa baatu, wabakoko bunu maboroko kunsa ndulukulu yaandi.

¹⁶Ngo yaa kuba na muutu wulutsuundisa mu ntoono byandya na nwiinunu ko, bunu pe mu ntoono munkeembu, bunu pe mu ntoono ngoondo yamoono, bunu pe mu ntoono kiluumbu kya mpuumunu.

¹⁷Byobinso bibyo kini kifwaani kya bitotolo bikwiisa ku mankula; ngo byangwanwa biri mu Kiristo.

¹⁸Yaa lutala ko ti babo bakwemono kiminu mu kiteesu kya nkulukulu, na mu kwesaambila bambasi, baluwuungula. Bo bakwekengese bitotolo kwa buunu, na bakwesiika mu bitsimi bya kimuutu kyaaku.

¹⁹Bo bahele kukaangama na mutu, bwakaangama nyutu yoyinso, mu biyikulu na misiinga mya nyutu, kuri nyutu yikwebuuka mu mbuukulu yifumunaa kuri Nzaambi.

²⁰Mbuti beenu lufwa na Kiristo mu mya nsi, dyaburi beenu luri mu kwetumuma mu mya nsi bunu ti beenu luri mwooyo mu mya nsi?

²¹"Yaa holo, yaa biimba, na yaa belemene ko,

²²byobinso bibyo bikoofuuka mu kubisalila, bunu buri mangisi na nyikusulu dza baatu.

²³Byobinso bibyo bisoongo madyeele mu nsambukulu, mu nkulukulu, na nkwamusunu nyutu; koomosoko byahele na ndaandu, ti hayuku biyukitisaa muswinyi.