Read Beembe Kol 3 Bible Online

Kol 3 - Beembe bible

Kol 3

¹Mbuti beenu lwafulukusu na Kiristo, lo sakeenu bya ku yulu, kukwo kwadzakala Kiristo ha lubakala lwa Nzaambi.

²Bvuleenu kusaka bya ku yulu, nkani ka bya ha butoto ko.

³Bukuri beenu lwafwa, na kidziingu kyeenu kyasweeku kintwaari na Kiristo mu Nzaambi.

⁴Mu ntaangu mbasi-tsuku yi monokono Kiristo, nde wuri kidziingu kyeenu, beenu se kintwaari na nde sa lwamonokono mu nkeembu.

⁵Ngo hoteenu kusalila bifu bya nsi: buyala, nsumukunu, mantiilu mamabi, nyiimunu dzadzibi, na ntiki-mboongo yiri nsambukulu-biteki.

⁶Mu ntoono mimyo, nkesi dza Nzaambi dzibwaanaa ha yulu baala ba tungu.

⁷Beenu se mu ntaangu yayikulu, lwaba kwedyatilaana mu bifu bibyo, bu lwaba mwooyo mu byo.

⁸Ngo mu lumalu, bwoongoleenu byobinso bibyo: nkesi, kituunsi, mutima-bubi, bitari, dzoonsolo dza nsoni mu minwa myeenu.

⁹Yaa lwesilisina mpya ko beenu na beenu, bu lwayeki lwapala mu muutu wa mukulu, na mu biyiriki byaandi,

¹⁰na bu lwayeki lwalwaata muutu wamoono, wubweese kukituka wamoono, mu kubaka nyaabulu mu kifwaani kya wamuyirika.

¹¹Mu didyo, kwasaala Muhelene na Muyudayo ko, wateendu bubakala na wahele kuteende bubakala ko, munzeense, Musikite, nkutu, muutu wuri bunsaalisi ko; ngo Kiristo wuri byobinso na wuri mu bobanso.

¹²Ngo bu luri lwasoolu kuri Nzaambi, luri bangisi, na lwatya kuri nde, beeneenu na mutima wa ngebe, wa mbweeyulu, wa nkulukulu, wa bundeembu na wa nkindusulu.

¹³Yendeenu lwekuunda bambaasi beenu na beenu, na kwehemesene beenu na beenu. Mbuti mosi mu beenu wuri na mwaa munyoongi mu mbaasi, lo bunu bwaluhemesene Mfumu, beenu se seenee bubwo.

¹⁴Ha yulu momanso mamo, salilee ntiilu ngo musiinga wa nyirimunu yakuka.

¹⁵Hemese kiyeengi kya Kiristo, ki bari baluteelele mbila mu nyutu mosi, kituma mitima mya beenu. Beeneenu bayaari kubvutula matoondo.

¹⁶Hemese maampu ma Kiristo madzakala mu beenu mu busina. Mu madyeele momanso, yikisineenu na lubusineenu beenu na beenu, mu mikuunga mya ndoombulu, mya ndumusu na mya kimpeeve. Yimbikilee Nzaambi mikuunga mya matoondo mu mitima myeenu.

¹⁷Na momanso ma lutsiitsa kuyirika mu nzoonsulu, bunu pe mu biyiriki, yirikilee momanso mu nkuumbu ya Mfumu Yesu, mu mvutukulu matoondo mu nde, kuri Taata Nzaambi.

¹⁸Bakasi, beenee batumuma kuri balumi beenu, bunu bwayelemene mu Mfumu.

¹⁹Balumi, tyeenee bakasi beenu, na yaa lwebanyokono ko.

²⁰Baala, tambukilee mu momanso kuri bataayi na banguri beenu, bukuri buri bwabubwete mu Mfumu.

²¹Bataayi, yaa lwebakisa baala beenu nkesi ko, mpisi bahele kuholo-bito.

²²Bankutu, tambukilee mu momanso, kuri bamfumu beenu ba muswinyi, kari hani ha busu bwa bo ko, mu nzala kubweeye kuri baatu, ngo mu nkulukulu na mu kibvumi kya Mfumu.

²³Mamo ma lutsiitsa kuyirika, yirikilee mo mu mutima wamutsiina, bunu ti kuri Mfumu, nkani ka kuri baatu ko,

²⁴bu luyaari ti, sa lwataambula kuri Mfumu museendu ngo saala. Beenee bakwesalila Mfumu Kiristo.

²⁵Mukwongo, wunde wusalila bubayi sa kataambula mamo ma kari kayirika ma bubayi; ka kuba munsoori mu baatu ko.