Read Beembe Kol 4 Bible Online

Kol 4 - Beembe bible

Kol 4

¹Bamfumu, yirikeenu kuri bankutu beenu ma suunguma na mayelemene, bu luyaari ti beenu se luri na Mfumu ku mayulu.

²Syaamee mu lusaambulu, beenee naana mu lwo, mu mvutukulu matoondo.

³Mu ntaangu yo yimosi, saambilee se na mu beetu, mpisi heki Nzaambi katuha mpwaani ya kuyikisa maampu, na kuyaabisa mpaanu dza Kiristo, bukuri mu ntoono mpaanu dzidzo me nyiri mu boroko.

⁴Saambilee mpisi heki me mbaangula mpaanu dzidzo, bunu bunyelemini kuyikisa.

⁵Dyaatilee mu madyeele ha busu bwa baatu ba ku mbasi; salilee ntaangu.

⁶Ma lukwedzoonso beenu maba ma bweese mu mantaangu momanso, matwa mungwa, mu kuyaaba bunu bwayelemene kuha mvutu kuri mpisi muutu.

⁷Mu misamu mitariri me, Tikiko sa kaluyaabisa, nde wuri mpaangi ya mutima, kisari kyakwiikama na mbaasi ya kisalu mu Mfumu.

⁸Me nyamuheekiri kuri beenu mu ntoono yiyo, mpisi heki beenu luyaaba misamu mitariri beetu, na kasyaamisa mitima myeenu.

⁹Nde bo na Onesimo, mpaangi yakwiikama na ya mutima, wuri mosi mu beenu, sa baluyaabisa misamu myominso miri kumaku.

¹⁰Aristarako, mbaasi yaami yi turi mu boroko, wuluheekiri mboto. Malako, mpaangi Barnaba, nde se wuluheekiri mboto. Mu ntoono ya nde, beenu lwataamburi ntumunu; mbuti wiisiri kuri beenu, lo mutaambuleenu.

¹¹Yesu, wubateelaa ti Yusto, nde se wuluheekiri mboto. Mu bateende bubakala, banabo kitsu bakwesala kintwaari na me mu ntoono Kimfumu kya Nzaambi; bo ngo babeeri mboondulu ku nyiri me.

¹²Epafara, wa beenu-meene wuluheekiri mboto. Nde nkutu Kiristo Yesu, wukwelunwanikina mpisi ntaangu mu nsaambulu, mpisi heki beenu luteleme nangwii, luba bakuka mu kuyirika momanso matiiri Nzaambi.

¹³Mukwongo, me nyimuteele kimbaangi ti, nde wuri mu kwebama kwalaka mu ntoono beenu, na mu bari ku Lahodikya, na mu bari ku Yerapoli.

¹⁴Luka, mubuki-babeeru, nduku yeetu ya mutima, bo na Dema baluheekiri mboto.

¹⁵Henee mamboto, kuri bampaangi ba ku Lahodikya, kuri Nimfa na kuri dibuundu dikutukunaa mu nzo nde.

¹⁶Bu lumeeni kutaanga mukaanda wumawu, lo seenee kuri ti kaba wataangu se kuri dibuundu dya bari ku Lahodikya; na mukaanda wa bari ku Lahodikya beenu se lumutaanga.

¹⁷Leeleenu kuri Arkipo ti: Sa madyeele mu kisalu ki wuri wataambula mu Mfumu, mpisi sala kyo kwakubwete.

¹⁸Taambuleenu mboto ya mu kooko kwa me-meene Pawulo. Baambukeenu mwooyo ti me nyiri mu boroko. Bweese buba na beenu!