Read Beembe 1 Tes 1 Bible Online

1 Tes 1 - Beembe bible

1 Tes 1

¹Pawulo, Silvano na Timoteho, kuri dibuundu dya Tesalonika, mu Taata Nzaambi na mu Mfumu Yesu Kiristo: bweese na kiyeengi biba na beenu.

²Beetu tubvutulaana matoondo mantaangu momanso kuri Nzaambi, mu beenu-banso, na twahele kuhoto kuluyekelaana mu nsaambulu dzeetu.

³Beetu tubaambukaana mwooyo mu biyiriki bya kanyi dyeenu, mu kisalu kya ntiilu yeenu, na mu kifiki kya nsiitu dzeenu mu Mfumu yeetu Yesu Kiristo, ha busu bwa Taayi dyeetu Nzaambi.

⁴Bampaangi batya kuri Nzaambi, beetu tuyaari nsoolulu yeenu.

⁵Mukwongo, Musamu beetu Wamubwete wahele kutubuka kuri beenu, munu mu nzoonsulu kitsu, ngo se mu mpinu, mu Mpeeve Yangisi na mu nyukusulu ya musundu, bunu bu luyaari bu twaba beetu ha kakati dya beenu, mu ntoono beenu.

⁶Na beenu lwayeki minsombisiri mya beetu na mya Mfumu, bu lwataamburi Maampu kunsa mpasi dzalaka, mu kiminu kya Mpeeve Yangisi.

⁷Mu didyo, beenu lwayeki kifwaani kuri bobanso basiila kanyi, bari ku Makedonya na bari ku Akaya.

⁸Bukuri, kuholosono kuri beenu, kari mani Maampu ma Mfumu mayukukuna, mu Makedonya na mu Akaya ko, ngo kanyi dyeenu mu Nzaambi se dyayabakana mwomunso, kuri lo beetu twahele kubweese kwaandi ti kudidzonsolo.

⁹Bukuri bobanso bakwedzoonsolo mu beetu, mu ntambukulu yi lwatutaamburi ha twayisiri kuri beenu, na bunu bu luri lwasiisila beenu biteki na kusyeeteke kuri Nzaambi, mu kusalila nde, Nzaambi ya mwooyo na ya ngwanwa,

¹⁰na mu kwekiingila Mwaana waandi wufumuna ku mayulu, wu kafulukisi mu bafwa, Yesu, nde wutukuula mu nkesi dzikwiisa.