Read Beembe 1 Tes 3 Bible Online

1 Tes 3 - Beembe bible

1 Tes 3

¹Hango, bu twakonini kukiingila, beetu twamono dyo ti bwabubwete mu kusaala beetu bakaka ku Atena,

²na kuheeke mpaangi yeetu Timoteho, nde wukwesala kintwaari na Nzaambi mu Musamu Wamubwete wa Kiristo, mu kulukumisa na kulusyaamisa mu kanyi dyeenu,

³mpisi heki muutu kahele kubwa mu ntoono manyoongi ma ntaangu yimayi. Mukwongo, beenu-meene luyaari ti mu bubwo turi mwooyo.

⁴Mu ntaangu yi twaba twakiri kuri beenu, beetu twaba kwelulubulaana ti, bee batumonisini manyoongi; ngo bunubwo se mimyo mi mwaakututubukila, na beenu luyaari.

⁵Hango-nkuumbu, me nkoonaa kukiinga, ha nyaheekiri Timoteho mu kwiisa kuyaaba bunu buri kanyi dya beenu, mu kubata kuri ti Musindukiri kakwiisa kulusindukila na kisalu kya beetu kihele kuba kya buunu.

⁶Ngo mu lumalu, Timoteho bu kabeeri kuri beenu mwaakwiisa bvutuka kuri beetu, na watuyaabisiri musamu wamubwete mu ntoono kanyi na ntiilu yeenu, na ti, beenu bunu luri lwakebe bitsimi byabibwete mu beetu, na luri na nzala beetu kumono, bunu bu turi na beetu se nzala kulumono.

⁷Mu didyo, bampaangi, kunsa mpasi dzeetu na manyoongi meetu, beetu twabakiri mboondulu mu beenu mu ntoono kanyi dyeenu.

⁸Ngo mu lumalu, beetu turi mwooyo bukuri beenu lwakwiikama mu Mfumu.

⁹Nkya matoondo beetu tutsiitsa kubvutula kuri Nzaambi, mu ntoono beenu, mu kiminu kyokinso ki turi mu kumono mu dyaambu dya beenu, ha busu bwa Nzaambi yeetu?

¹⁰Butsuku na mwiini, beetu turi mu kwesaambilaana kwalaka mpisi tubweese kulumono na kukukisila mari mu kuhele mu kanyi dyeenu.

¹¹Hemese Taayi dyeetu Nzaambi nde-meene na Mfumu yeetu Yesu batudzibukila nzila mu kwiisa kuri beenu.

¹²Hemese Mfumu kabuukisa na kabweese ntiilu yi luri na yo beenu na beenu, na mu baatu bobanso, bunu bu tulutiiriri beetu seenee.

¹³Hemese nde kakumisa mitima myeenu, mpisi heki beenu luba bangisi na bahele maseembu ha busu bwa Taayi dyeetu Nzaambi, mu ntaangu ya nyisulu Mfumu yeetu Yesu kintwaari na bangisi baandi bobanso. [Amene].