Read Beembe 1 Tes 5 Bible Online

1 Tes 5 - Beembe bible

1 Tes 5

¹Mu ntoono ya mantaangu na bilookolo, bampaangi, beenu ka luri na nzala kuri ti balutinina ko.

²Mukwongo, beenu-meene luyirikiri kuyaaba ti, kiluumbu kya Mfumu sa kiisa bunu ngaa-kwiibi mu butsuku.

³Mbasi-tsuku haleele baatu ti: turi na kiyeengi, turi na kidzuunu, hanaho se mfukusulu yibabwilikila na sisuu, bunu bu kwiisikila misoongo mya mbutulu kuri mukyeetu wuri na yimi, ngo bo ka batsiitsa kubvuuka ko.

⁴Ngo kasi, bampaangi, beenu lwahele kunsa mampimbisi kuri heki kiluumbu kikyo kiisa kuri beenu na sisuu buni ngaa-kwiibi.

⁵Mukwongo, beenu-banso luri baala ba buungi na baala ba mwiini. Beetuneenu ka turi baatu ba butsuku bunu pe ba mampimbisi ko.

⁶Hango-nkuumbu, yaa tubweeneenu tolo bunu bakaka ko, ngo tubeenee naana na kuba na ndiilu na nwiinu byayelemene.

⁷Bukuri bangaa-tolo, butsuku bakoobwaana tolo, na binwi bya malu, butsuku bakookolaa malu.

⁸Ngo beetuneenu turi baatu ba mwiini, tubeeneenu na ndiilu na nwiinu byayelemene twahele kukolo malu, twalwaata kanyi na ntiilu bunu kinkuta kya mu ntulu kya mukaanda kibulu, na twalwaata nsiitu ya mvuukulu bunu mpu ya kitari.

⁹Bukuri Nzaambi kasiiri kututaasila mu kubwilikila nkesi ko, ngo kutaambula mvuukulu mu Mfumu yeetu Yesu Kiristo.

¹⁰Nde wafwa mu ntoono beetu, mpisi heki, ti hayuku turi naana ti hayuku twabwa tolo, lo tubeeneenu mwooyo kintwaari na nde.

¹¹Hango-nkuumbu, syamisineenu beenu na beenu, na tuungusineenu beenu na beenu bunu bu luri mu kwesalila.

¹²Bampaangi, beetu tululoombo mu kwebvumina babo bari mu kwesala ha kakati dya beenu, bakwelutwaalisa mu Mfumu na bakwelulubula.

¹³Namitineenu kubvula kwebasiila mutima na kwebatya, mu ntoono kisalu ki bari na kyo. Beeneenu na kiyeengi beenu na beenu.

¹⁴Beetu tulusyaamisa, bampaangi: seembeenu babo bari kunsa kisaangila, syaamiseenu bari na boomo, kumiseenu bari na bubolo, beeneenu na nkindusulu-mutima mu bobanso.

¹⁵Taleenu yaa kuba muutu wubvutula bubi mu bubi ko, ngo namitineenu kweyirika mamabwete, ha kakati dya beenu na beenu na kuri bobanso.

¹⁶Beeneenu na kiminu mpisi ntaangu.

¹⁷Saambileenu kwahele manunu.

¹⁸Bvutuleenu matoondo mu myominso, bukuri bubwo buri kutya kwa Nzaambi kuri beenu mu Yesu Kiristo.

¹⁹Yaa ludzimisa Mpeeve ko.

²⁰Yaa lusaana mbikululu ko,

²¹ngo fyongokineenu myominso, lukebe myamibwete.

²²Yaa luyirika ti dimosi dyadibi ko.

²³Hemese Nzaambi ya kiyeengi nde-meene, kalusa bangisi mu kiteesu kyakuka, na bumuutu bwa beenu bwobunso, kiluunsi, muheebulu na nyutu, biba byakebu kwahele maseembu, mu nyisulu Mfumu yeetu Yesu Kiristo.

²⁴Wunde wuri mu kuluteele mbila wakwiikama, sa kakukisa momanso.

²⁵Bampaangi, saambileenu se mu beetu.

²⁶Heeneenu mamboto kuri bampaangi bobanso mu nyumutunu yangisi.

²⁷Me nyiluyingukiri mu nkuumbu Mfumu: taangiseenu mukaanda wumawu kuri bampaangi bobanso.

²⁸Hemese bweese bwa Mfumu yeetu Yesu Kiristo buba na beenu.