Read Beembe 2 Tes 2 Bible Online

2 Tes 2 - Beembe bible

2 Tes 2

¹Ngo mu mitariri nyisulu Mfumu yeetu Yesu Kiristo, na kukutukuna kuri nde, bampaangi, beetu tululoombo ti:

²yaa luwasula kumono mutima mambaawu ko, na yaa luba na boomo ko mu mbikululu, mu nyikusulu, bunu pe mu mukaanda wu baleele ti wafumuna kuri beetu; bunu ti kiluumbu kya Mfumu ki mwaakwiisa.

³Muutu yaa kaluwuna mu ntoono ti mosi ko. Kiteesu kya nyekululu kanyi mu Nzaambi kyakiri kutekesele kwiisa, na muutu wahele na mangisi wakiri kumonokono, mwaana wa mfukusulu.

⁴Wunde wutelemese kitaatu, na wudzaangama ha busu bwa mpisi ki baleeriri ti Nzaambi bunu pe ki basaambilaana, natee mu kiteesu kya kudzakala mu nzo Nzaambi, na kuleele nde-meene ti nde ngo Nzaambi.

⁵Beenu lwahele kubaambuka mwooyo ti me nyaluyaabisiri dyo, ha nyaba nyakiri kuri beenu?

⁶Ngo mu lumalu beenu luyaari kikyo kyamukangikila, mpisi nde kaba kumonokono munu mu kilookolo kya nde-meene.

⁷Mukwongo, mpaanu ya mamabi yeki mu kwesala; ngo kasi wunde wamukangikila yelemini kuba wayisila.

⁸Tumi, wahele na mangisi kaba wamonokono, na hanaho Mfumu [Yesu] kamudzusula mu muheebulu wupala mu munwa waandi, na kamudziimbisila mu kumonokono kwa nyisulu yaandi.

⁹Nyisulu wahele na mangisi sa yayirimina mu makwa ma Saatana, mu biyiriki bya mpinu, na bidiimbu, na bimaangu byampya,

¹⁰na kunsa mawunu momanso, ma bubayi kuri babo bari mu kudziimbila, bukuri bahele kutaambula ntiilu ya ngwanwa mu kuba babvuuka.

¹¹Hango-nkuumbu, Nzaambi wuri mu kubaheekele makwa ma kuwumuka, mpisi basiila kanyi mu mpya.

¹²Mpisi heki, bobanso bahele kusa kanyi mu ngwanwa, ngo bamono kiminu mu bubayi, baba batsuundisa.

¹³Beetu ngo bari, tuyelemini kubvutula matoondo kuri Nzaambi mpisi ntaangu, mu ntoono beenu bampaangi batya kuri Mfumu, bukuri Nzaambi walusoolo bunu mintekesele, mu kuba babvuuka kunsa bungisi buluha Mpeeve, na kanyi mu ngwanwa.

¹⁴Mu didyo, Nzaambi kari kaluteele mbila mu Musamu Wamubwete wu turi twaluyikisa, mu kubaka nkeembu ya Mfumu yeetu Yesu Kiristo.

¹⁵Hango-nkuumbu, bampaangi, beenee bakwiikama na kebeenu kikulu ki lwataamburi kuri beetu, mu ndzonsulu bunu pe mu mukaanda.

¹⁶Hemese Mfumu yeetu Yesu Kiristo nde-meene, na Taayi dyeetu Nzaambi, watutya na watuha mu bweese bwaandi, mboondulu ya bibvu ngo bibvu na nsiitu yayibwete,

¹⁷kaboondo mitima myeenu, na kalukumisa mu biyiriki byobinso, na mu nzoonsulu dzadzibwete.