Read Beembe 1 Tim 3 Bible Online

1 Tim 3 - Beembe bible

1 Tim 3

¹Maampu mamama mayelemene mu kusiila kanyi. Mbuti muutu wuri na nzala kusala kisalu kya bukuutu bwa dibuundu, lo kisalu kyakibwete katiiri.

²Mukuutu dibuundu yelemini kuba wahele na di bamuseembele, mulumi wuri na mukasi mosi, wuri na ndiilu na nwiinu byayelemene, wasoongolo, wakiinsuma, mutaamburi-banzeense, wakuka mu kuyikisa;

³yaa kaba yaa-kinwi ko, yaa kaba se ngaa-bikiindu ko, ngo kasi kaba wadzuuna, wahele kweyumusa baatu, na wahele na ntiki-mboongo.

⁴Nde yelemini se kutwaalisaa nzo ya nde-meene kwa kubwete, wusuusaa baala kunsa lutumu na kunsa kibvumi kyokinso.

⁵Mukwongo, mbuti muutu wahele kuyaaba kutwaalisa nzo ya nde-meene, lo buri katsiitsa kutwaalisila dibuundu dya Nzaambi?

⁶Yaa kaba se wamoono mu dibuundu ko; mpisi heki masiiku mahele kumudzusa miisu, na kahele kubwa mu mutsuundu wu batsuundisila dyabulu.

⁷Yelemini kuba se na kimbaangi kyakibwete kimuteelile bari ku mbasi, mpisi kahele kufwa nsoni na kubwa mu siinga dya dyabulu.

⁸Bisari se bwobumosi, bayelemini kuba bakiinsuma, bahele na ndima dzoolo, bahele na nwiinunu malu ya makwa, na bahele kwebakila mboongo mu bumbabu.

⁹Bayelemini kukebe mpaanu dza kanyi mu mutima wa mutsiina.

¹⁰Bayelemini kutekesele kubafyoongokono; tumi basala kisalu kya dibuundu, mbuti bahele na mi babaseembele.

¹¹Bakyeetu se bwobumosi, bayelemene kuba bakiinsuma, bahele na makele, bari na ndiilu na nwiinu byayelemene, bakwiikama mu myominso.

¹²Bisari biyelemini kuba, balumi bari mukasi mosi, batwaalisa baala na manzo ma bo-meene kwa kubwete.

¹³Mukwongo, babo basala kisalu kya dibuundu kwa kubwete, bataambulaana lukiinsu lwalubwete bo-meene, na nsiitu dzadzinene kunsa kanyi mu Kiristo Yesu.

¹⁴Me nyikutinina misamu mimami, bu nyiri na nsiitu mu kwiisa kuri ye mu mawasu;

¹⁵mpisi heki, ti hayuku me nziingiri mu kwiisa, lo ye yaaba bunu bwa kudyaatila mu nzo ya Nzaambi, yiri dibuundu dya Nzaambi yamwooyo, kuunsi na kitsuku kya ngwanwa.

¹⁶Diri dyayabakana ti, mpaanu dza kinzaambi dziri dzadzinene: Kiristo, wamonikini mu muswinyi, Mpeeve wasoongiri kuri ti nde wasuunguma, bambasi bamumono, bamuyabikisa kuri makaanda, bamusiila kanyi mu nsi, bamunata ku yulu mu nkeembu.