Read Beembe 2 Tim 1 Bible Online

2 Tim 1 - Beembe bible

2 Tim 1

¹Me Pawulo, ntumu Kiristo Yesu, mu kutya kwa Nzaambi, bunu buri lusiilulu lwa kidziingu kya mu Kiristo Yesu,

²kuri Timoteho, mwaana wa mutima: bweese, ngebe na kiyeengi bifumunaana kuri Taata Nzaambi, na kuri Mfumu yeetu Kiristo Yesu biba na ye.

³Me nkoobvutulaa matoondo kuri Nzaambi, yiyo yi nyisaambilaa mu mutima watsyeemeke, bunu bwaba saambilaa bakuutu. Nyisalilaa bubwo, mu ntaangu yi nyibambukilaa ye mwooyo, mu nsaambulu dzaami butsuku na mwiini kwahele kuhoto.

⁴Bu nyibaambuka mwooyo mu mansangasa maaku, nyibaana na musoongo walaka wa kumono ye, mpisi mba nyaluula mu kiminu.

⁵Me nyibaambuka mwooyo mu kanyi dyangwanwa diri mu ye, kanyi didyo dyatekisiri kuba mu Lowisi, mwankaaka yaaku ya mukyeetu, na mu nguri yaaku Enike, me nyirikiri kuyaaba ti diri mu ye se.

⁶Mu didyo, me nyikubaambula mwooyo ti: bweese kulula mbaawu mu kikabu kya Nzaambi kiri mu ye, ki wuri wataambula mu ntetukulu myooko mya me.

⁷Mukwongo, Nzaambi kasii kutuha mpeeve ya boomo ko, ngo ya mpinu, ya ntiilu na ya bundeembu.

⁸Yaa ba na nsoni ko mu kuta kimbaangi mu Mfumu yeetu, bunu pe mu me nyiri mu bikonyi mu ntoono nde. Kasi mono mpasi ha kimosi na me mu ntoono Musamu Wamubwete, bunu buri mpinu dza Nzaambi.

⁹Nde watubvuukisa, na watuteele mbila yangisi, kari mu ntoono biyiriki byeetu ko, ngo kasi bunu buri bitaasi bya nde-meene na bweese bu kari katuha mu Kiristo Yesu, tekesele mantaangu mahela kuwa.

¹⁰Bweese bubwo bwayabakana mu lumalu, mu monokunu Mubvuukisi weetu Kiristo Yesu, wunde wasukisa lufwa, na wasa kuri ti mu Musamu Wamubwete bumwooyo buseme na mbolulu yihele kubweese kuba.

¹¹Mu ntoono Musamu Wamubwete wunde, me bayeki bansa mubikisi, ntumu na muyikisi.

¹²Mu ntoono yiyo se, me nyiri mu kumono mpasi dzimadzi, ngo nyahele na nsoni, bukuri me nyaari mu nani me nyiri nyasa kanyi, na nyabakula ti, nde wakuka mu kukebe maampu ma kari kampa, natee mu kiluumbu kikyo.

¹³Holo kifwaani mu maampu mangwanwa ma wuri wayuka kuri me, mu kanyi na ntiilu bya mu Kiristo Yesu.

¹⁴Kebe maampu mamabwete mawuunguku mu ye, kuri Mpeeve Yangisi yidzakalaa mu beetuneenu.

¹⁵Ye yaari dimadi ti bobanso bari ku Asya banyekele; mu bo kuri Fingelo na Eremongene.

¹⁶Hemese Mfumu kasa mpemisi mu nzo Onesiforo, bukuri nde wasyaamisini me mu mantaangu momanso, na kasii ba na nsoni ko mu bikonyi bya me,

¹⁷ngo nde katubukaana ku Loma, nde wasaka me mu kuheme, na wanzuukila.

¹⁸Hemese Mfumu kamuha miswa mya kutaambula mpemisi kuri Mfumu, mu kiluumbu kikyo. Na kisalu kyokinso ki kari kasala nde ku Efeso, ye-meene bvuriri kuyaaba.