Read Beembe 2 Tim 3 Bible Online

2 Tim 3 - Beembe bible

2 Tim 3

¹Yaaba dyo ti: mu biluumbu bya nsukulu, mantaangu ma mpasi sa miisa.

²Mukwongo, baatu sa baba na kifu, batiiri mboongo, bangaa-nzala-kubila, bangaa-masiiku, bangaa-saana, bari na nko kuri bataayi na banguri, bari batoonda ko, bahele kubvumina bya Nzaambi,

³bahele na ntiilu, bahele na kyaari, bangaa-makele, bahele na mangisi, bangaa-bumfuna, bataatu ba mamabwete,

⁴bakweyarika bambaasi, bangaa-kituunsi kya nkesi, bangaa-masiiku mabuunu, babvuriri kutya minkeembu ti na Nzaambi;

⁵bamonokono ti bangaa-kinzaambi, kasi bakwetuna mpinu dza kinzaambi. Tekele ba bubwo mbisa.

⁶Bamosi mu bo bakwekoto mu manzo, na mu masiinga ma bo, bakwebangusina bakyeetu bahele kukiinsuma, bari na kilemu kya masumu, na bakwenama mantiilu ma bitsuumbu-bitsuumbu;

⁷mpisi ntaangu bakweyika, ngo kasi bahele kubangisina kutubuka ku nyaabulu yangwanwa.

⁸Bunu Yanese bo na Yamberese babanwaanisa Moose, bunubwo se baatu bamaba bakwenwaanisa ngwanwa, madyeele ma bo mabiiya, na bo babwa mu mitariri kanyi.

⁹Ngo bo bari nyeendekele la ko, bukuri budzeeke bwa bo, sa bwamonokono ha busu bwa baatu bobanso, bunu bwaba monokono budzeeke bwa Yanese bo na Yamberese.

¹⁰Ngo ye wanemi kwakubwete nyikusulu dzaami, ndyaatulu yaami, bitaasi byaami, kanyi dyaami, nkindusulu-mutima yaami, ntiilu yaami, kifiki kyaami,

¹¹nkwamusunu na mpasi dzi nyamono me ku Antyoke, ku Ikonyo, ku Listara. Nkya nkwamusunu me nyahele kumono! Ngo mu dzodzinso Mfumu wankuula.

¹²Ngo bobanso batiiri kunata kidziingu kunsa kinzaambi mu Kiristo Yesu, sa baba bakwaamusu.

¹³Ngo baatu bababi na bangaa-bumpitu-bumpyoongo, sa bahamisa kudyaatila kunsa mabvuriri bubi, mu kwewumuna baatu, bu bari bawumuka bo-meene.

¹⁴Ngo ye wasiila kanyi mu ma wuri wayika, na ma wuri wabakula ti mangwanwa, bu yaari kuri na, wuri wamayikila.

¹⁵Kuholosono bulesi bwaaku, Matinu Mangisi ye wumayaari, mo makuka mu kuha ye madyeele, mu kubaka mvuukulu mu kanyi mu Kiristo Yesu.

¹⁶Momanso matinu, mu ntwalusulu ya Mpeeve ya Nzaambi bari bamatinina, na mari mufunu mu kuyikisa, mu kuseembe, mu kusuungika, mu kutwaalisa mu nsungumunu,

¹⁷mpisi heki muutu Nzaambi kaba wayirima, na kabaka biri mufunu mu nyirikulu momanso mamabwete.