Read Beembe Tit 3 Bible Online

Tit 3 - Beembe bible

Tit 3

¹Baambula mwooyo kuri bo ti, bayelemini kuba batumuma kuri baatu balukiinsu na kuri bari na lutumu; baba na bintambukulu, na baba bayirima mu mpisi kiyiriki kyakibwete.

²Muutu kutuka pe, kuba pe bangaa-bikiindu, baba na bumpoombo, basoongo bundeembu kuri baatu bobanso.

³Mukwongo, mu ntaangu yayikulu beetuneenu se twaba biwulu, bangaa-nko, badziimbila, twaba mu bunkutu bwa nyiimunu na biminu bya bitsuumbu-bitsuumbu, twaba kwelutisa ntaangu mu mamabi na mu musoki, twaba baatu bari babele na bakwebelesene bo na bo.

⁴Ngo mu ntaangu yamonokini mbweeyulu na ntiilu ya Nzaambi Mubvuukisi weetu mu baatu,

⁵nde watubvuukisa, kari mu ntoono biyiriki byansuungumunu, bi twaba twayirika ko, ngo mu ngebe dzaandi, mu muswaaka wa mbutukulu yamoono, na mu nkitukulu yamoono ya Mpeeve Yangisi.

⁶Mpeeve yiyo nde kari katsyaamuna ha yulu beetu, kwa mansaalisi mu Yesu Kiristo Mubvuukisi weetu,

⁷mpisi heki mu bweese bwaandi, tuba twalulukusu, na tuba bakondiri ba saala, bunu buri nsiitu dza kidziingu kya bibvu ngo bibvu.

⁸Maampu mamama mayelemene mu kusiila kanyi, na me ntiiri ti ye yirika kutswiikisa dyaambu didyo, mpisi heki bamwaasiila kanyi mu Nzaambi, batsimina na baheele mutima mu biyiriki byabibwete. Mimyo miri myamibwete na miri mufunu kuri baatu.

⁹Yelemini kwebata nkalikisi dza buwulu, miloongo mya kinkaaka, mayumu na kubakana mu mitariri mangisi: bibyo byahele mufunu na byabuunu.

¹⁰Muutu wukwekotoso nkabunu, wumanaa kumulubula lwatete na lwadzoolo, wumuwuungiri.

¹¹Ye yaari kuri ti, muutu wa bubwo wawumuka, wuyirikaa masumu, na wabwiisa nyutu yaandi nde-meene.

¹²Mu ntaangu yi nyisindika me Artema kuri ye, bunu pe Tikiko, lo salila makwa mu kwiisa ku nyiri me ku Nikopoli, bukuri kukwo, me nyiri nyatsima kulutisila ntaangu ya kyoosi.

¹³Ha kuri Dzena, nzoonsi, na Apolo bibari na nzala byo mu budyeengi bwaaku, mpisi heki baba ki bahelele pe.

¹⁴Baatu ba beetuneenu se, bayelemini kuyika kuheele mutima mu biyiriki byabibwete, mu kubaka bibari na nzala byo bya mufunu, mpisi heki bahele kuba baatu bahele na bimbutu.

¹⁵Bobanso bari na me hamaha, bakuheekiri mboto. Ha mboto kuri banduku baturi mu kanyi. Bweese buba na beenu-banso.