Read Beembe Film 1 Bible Online

Film 1 - Beembe bible

Film 1

¹Me Pawulo, boroko dya Kiristo Yesu, na mpaangi Timoteho, kuri Filemone, mbaasi yeetu ya mutima na ya kisalu,

²kuri kibusi Afya, kuri Arkipo, mbaasi yeetu ya binwaanunu, na kuri dibuundu dikutukunaana mu nzo yaaku.

³Bweese na kiyeengi bifumunaana kuri Taayi dyeetu Nzaambi, na kuri Mfumu Yesu Kiristo, biba na beenu.

⁴Me nyibvutulaana matoondo, mantaangu momanso, kuri Nzaambi yaami, bu nyikutoolaana mu nsaambulu dzaami,

⁵bu nkooyukaana badzoonsolo mu ntiilu na kanyi bi wuri na byo mu Mfumu Yesu, na mu ntoono bangisi bobanso,

⁶kuri heki kintwaari kya kanyi dyaaku, kiba na keketee mu nyaabulu mamabwe momanso, mari mu beetu mu ntoono Kiristo.

⁷Me nyamwii kiminu kyalaka na nyataamburi mboondulu, mu ntoono ntiilu yaaku; bukuri mu ye mpaangi, mitima mya bangisi myadzuunini.

⁸Mukwongo, bu nyiri na nsiitu dzalaka mu Kiristo, mu kukutuma mamo ma yelemene,

⁹nyibweese kukuyingukila, mu ntoono ya ntiilu, bunu bu nyiri, me Pawulo mu lumalu kinuni, na se boroko dya Kiristo Yesu,

¹⁰me nyikuyingukila mu ntoono mwaana me wa mubakala, Onesimo, wu nyiri nyabuta kunsa bikonyi.

¹¹Mu ntaangu yaluta, nde waba wahele mufunu; ngo mu lumalu, weki mufunu kuri ye na me.

¹²Me mbweesiri kumuheeke kuri ye, nde makila ma me-meene.

¹³Me mbeeri ntiiri kumukebe hari me-meene, mpisi heki, ha kibeendu kya ye, nde kansalila mu ntaangu yi nyiri mu bikonyi, mu ntoono Musamu Wamubwete.

¹⁴Ngo me nsiiri kutya kuyirika ntoono kwahele kitsimi kya ye ko, mpisi kiyiriki kyaaku kyakibwete, kihele kuba mu kukwiikisa, ngo bunu buri nyukulu yaaku.

¹⁵Kampe mu ntoono yiyo Onesimo kabeeri wahaambuka na ye mu mwaa ntaangu, mpisi heki, ye wumutaambula kwakinkulu,

¹⁶kari bunu nkutu ko; ngo bu bvuriri bubwete ti na nkutu, mpaangi ya mutima; mbiki ti mu me, ngo bvula-bvula mu ye, mu kimuutu na mu Mfumu.

¹⁷Hango-nkuumbu, mbuti ye wuhololo me bunu mbaasi yaaku, lo mutaambula bunu me.

¹⁸Mbuti nde wakuyirikila mamabi, bunu pe wuri na kibiimbu kya ye, lo ntetikele myo.

¹⁹Meme Pawulo, ntinini mu kooko kwa me-meene, me sa nyafuta, mu kuhele kuleele kuri ye ti, ye-meene wuri kibiimbu kuri me.

²⁰Heehe, mpaangi, nyirikila mamo mu Mfumu. Dzuunisa mutima waami mu Kiristo.

²¹Mu nsiitu mu bintambukulu bya ye, me nyikutinini bu nyaari ti, sa yirika mabvuriri kiteesu ti na ma nyikuleeriri.

²²Mu ntaangu yo yimosi, yirikila me se kibeendu ki wuntambukila; me nyiri na nsiitu ti mu ntoono nsaambulu dzeenu, me sa bamvutula kuri beenu.

²³Epafale, mbaasi yaami mu Kiristo Yesu, wu turi mu boroko wukuheekiri mboto;

²⁴Malako, Aristarako, Dema, Luka, bakwesala kintwaari na me, se ba kuheekiri mboto.

²⁵Hemese bweese bwa Mfumu Yesu Kiristo buba na kiluunsi kya beenu.