Read Beembe Heb 1 Bible Online

Heb 1 - Beembe bible

Heb 1

¹Mu ntaangu yayikulu, Nzaambi wadzoonso kuri bataayi beetu mu babikiri, mu dzoonsolo dzalaka na dza bitsuumbu-bitsuumbu.

²Mu biluumbu bya mpotulu bimabi, nde wadzoonso kuri beetu mu mwaana wu kari kasa mukondiri bitotolo byobinso, mu nde se kari kayirika nsi.

³Nde wuri kuseme kwa nkeembu yaandi, na kifwaani kya nzelu yaandi, nde wakwaata nsi mu mpinu dza maampu maandi; bu kamana kutsyeemese baatu mu masumu, nde wadzakala ha lubakala lwa Mwa-mpuungu kunu kinsongi-yulu.

⁴Mwaana wayeki nkati bvuriri na bambasi, ngo kari kakondolo nkuumbu yibvuriri bubwete na bo.

⁵Mukwongo, Nzaambi wahele kuleele ti kuri mosi mu bambasi ti: «Ye wuri Mwaana me, lumalu me nyikubutiri.» Na wahele bweese kuleele ti: «Me sa nyaba Taayi kuri nde, na nde sa kaba Mwaana kuri me.»

⁶Na mu ntaangu yi kabweese kusuusa Mwaana watete mu nsi, nde waleele ti: «Bambasi ba Nzaambi bobanso bamutsukumina.»

⁷Mu ntoono bambasi, nde waleele ti: «Nde wusaa bambasi baandi bunu biteembu, na wusaa bisari byaandi bunu milaka mya mbaawu.»

⁸Ngo kasi mu ntoono Mwaana, nde waleele ti: «Ho! Nzaambi, mboloko yaaku yiri ya bibvu ngo bibvu. Na lutumu lwa Kimfumu kyaaku, lutumu lwa nsungumunu.

⁹Ye watya nsungumunu, na wabele bubayi, mu didyo Nzaambi, Nzaambi yaaku, kari ka kukila maasi ma kiminu, na kubvula kutya ye ti na bambaasi baaku.»

¹⁰Na wabweese kuleele ti: «Mfumu, ye wuri, kunu mbandukulu, wayirika butoto, mayulu ngo biyiriki bya myooko myaaku;

¹¹byo sa byaluta, ngo kasi ye, bunu wuri, na byobinso sa byafuuka bunu binkuta;

¹²na ye sa wabifutuka bunu kiyuunga, na sa byakituka bunu bu kituka kinkuta, ngo kasi ye wuri bwobumosi, na mibvu mya ye miwa ko.»

¹³Nde wahele kuleele kuri ti mosi mu bambasi ti: «Dzakala ha lubaka lwa me, natee ku nyisuusa me, bataatu baaku, baba nkata-miilu myaaku.»

¹⁴Bambasi bobanso, mampeeve ma bari baheeke mu kisalu mu ntoono babo bakondolo mvuukulu.