Read Beembe Heb 10 Bible Online

Heb 10 - Beembe bible

Heb 10

¹Mangisi ma Moose mahele kusoongo bunu buri bitotolo, ngo kasi kini kifwaani kya bitotolo bikwiisa; na nzusulu bibulu byaha mu kikabu, mpisi mubvu, kwahele manunu, yahele kubangisina kunata ku nyirimunu yakuka, babo bakokosolaa kuri Nzaambi.

²Mbuti babo basambukila mu kiteesu kikyo, bakotaambulaa nsyemukunu ya masumu mbala mosi, nkani lo bahele bweese kuba kunsa kibila mu nsimunu yaaku, na nkani bayeki bahoto kuha bikabu.

³Ngo nzusulu bibulu byaha mu kikabu yiyo, yikoohaanaa mbambukulu mwooyo mu masumu, mpisi mubvu.

⁴Bukuri kuri ti bele ko ti, makila ma bangoombo na ma bantaba mayusula masumu.

⁵Hango-nkuumbu, bu kayisa ha nsi nde waleele: «Ye wasii tya kuri ti bakudzusula kibulu na bakuha kikabu ko, ngo kasi ye wampa nyutu.

⁶Ye wasii mono kiminu ko, mu nzusulu na nyokulu bibulu, na mu bikabu mu ntoono masumu.

⁷Ngo me nyaleele ti: "Ho! Nzaambi, mono, me nyiisiri, mu kuyirika kutya kwa ye, bunu bu diri dyatinu mu nkwaala mukaanda, mu ntoono me."»

⁸Tekesele mamo nde waleele ti: «Ye wasii tya na wasii mono kiminu ko, mu nzusulu ya bibulu na mu bikabu, mu nyokulu bibulu na mu bikabu, mu ntoono masumu.» Bikabu bibyo babihaanaa bunu bu loombolo mangisi.

⁹Hango nde wubweese kuleele ti: «Mono, me nyiisiri mu kuyirika kutya kwa ye.» Mu didyo, nde yisiri nsambukulu yatete na suusiri nsambukulu yamoolo.

¹⁰Mu kutya kukwo, beetu turi twataambula bungisi, mu Yesu Kiristo waheeri nyutu yaandi bunu kikabu lwo lumosi.

¹¹Mpisi ngaanga-nzaambi wutelemaa mpisi kiluumbu mu kusa kisalu kyaandi, na mu kudzusa bibulu byaha mu kikabu mbala dzalaka, ngo byo byahele kubangisina kuyusula masumu.

¹²Ngo kasi, nde bu kaheeri kikabu kya kudzusa mu ntoono masumu, wadzakala ha lubakala lwa Nzaambi kwakinkulu.

¹³Mu lumalu, nde wuri mu kukiinga, natee ku basuusiri bataatu baandi, kuri baba nkata-miilu myaandi.

¹⁴Mukwongo, mu kikabu kyokimosi, nde kari kanata ku nyirimunu yakuka kwakinkulu, babo ba kari kaha bungisi.

¹⁵Mpeeve Yangisi se yiri mu kutuswikisila dyo. Nde wuleele ha mambisa haho ti:

¹⁶«Lumalu ngo lulelusunu lu nyikaanga me beetu na bo, ha mambisa ma biluumbu bibyo, bu leele Mfumu: me sa nyabaha mangisi maami mu mitima, na me sa nyamatina mu bitsimi bya bo.»

¹⁷Na ti: «Me mbweese kubambukila mwooyo, mu masumu ma bo, na mu lumvuki lwa bo, ti mu mwaa-ntaangu mosi ko.»

¹⁸Ngo haho hari mpemisi, lo babweese kuha kikabu mu ntoono masumu ko.

¹⁹Hango bampaangi, beetuneenu turi na nsiitu ya kukoto mu nzo yangisi mu makila ma Yesu.

²⁰Nde watudzibukila nzila yamoono na yamwooyo, ha lumbisa lwa nsaanda yiri nyutu yaandi,

²¹na turi na ngaanga-nzaambi yayinene, mu nzo ya Nzaambi.

²²Ngo hemese tukokosoleenu mu mutima wa mutsiina, na kanyi dyakuka, kuri mutima watsyeemese mu bitsimi byabibi, na nyutu yaswaaku mu maampa matsyeeme.

²³Hemese tukebeenu nsiitu yi turi mu kweyaabisa, kwahele mpololo-bito, bukuri wunde wasa lusiilulu wakwiikama.

²⁴Hemese tukebesenee manyutu beetu na beetu, mu kubaka nsyamusunu mu ntiilu na mu biyiriki byabibwete.

²⁵Yaa tuyekelee dibuundu dyeetu ko, buri kifu kya babamosi, ngo tusyaamisineenu beetu na beetu, bu tuyaari kuri ti kiluumbu kikokisiri.

²⁶Bukuri mbuti tunamitini mu kweyirika masumu, mu kutya kwa beetu-meene, ha mambisa ma kuyaaba ngwanwa, lo kusii nzusulu bibulu mu ntoono masumu ko,

²⁷ngo bisiiri lo kunu kukiinga mutsuundu wansisi na mbaawu ya makwa, mbasi-tsuku yiyoko bangaa-tungu.

²⁸Mpisi wusinina mangisi ma Moose, lo kusa kumudzusa kwahele kyaari, mbuti kuri baatu boolo bunu pe batatu, bata kimbaangi mu ma kayirikiri.

²⁹Heki lo buri beenu lutsima bubeele bunene bwa maseembu, ma baha kuri wunde wusaana Mwaana Nzaambi, wunyaafuna makila ma lulelusunu ma kari kabakala bungisi, na kutuka Mpeeve ya bweese?

³⁰Mukwongo, beetu tuyaari wunde waleele ti: «Me nyibvutula kitete, me nyiha museendu», na wabweese kuleele ti: «Mfumu sa katsuundisa baatu baandi.»

³¹Diri dyansisi mu kubwa mu myooko mya Nzaambi yamwooyo.

³²Baambukeenu mwooyo mu biluumbu byatete, biri beenu lumanaa kutaambula buungi, beenu lwakuunda kikiindu kyakinene na kya mpasi.

³³Mu mantaangu mamosi, baba kwelutuka na kwelukwaamisa ha busu bwa baatu; mu mantaangu makaka beenu lwaba mu kibari kya babo ba baba yirikila ma bubwo.

³⁴Mukwongo, beenu lwakabula mpasi dza babo baba mu boroko, na beenu lwataambula mu kiminu, ti baluhosono na bitotolo byeenu, bu lwaba luyaari kuri ti luri na busina bubvuriri bubwete, na buri bwawaana ko.

³⁵Ngo yaa luyekele nsiitu yeenu ko, mu yo muri museendu wamunene.

³⁶Mukwongo, beenu luri na nzala kuba na kifiki, mu kukukisa kutya kwa Nzaambi, na kutaambula bi kari kasa lusiilulu.

³⁷Bukuri dyatinu ti: «Hasiiri hantele, mwaa ntaangu yantele, na wunde wukwiisa sa kiisa, kadziingila ko.

³⁸Ngaa-kusuunguma waami sa kaba mwooyo mu kanyi, ngo mbuti yekiri, lo muheebulu waami kamono kiminu mu nde ko.»

³⁹Beetu turi babo bakooyekelaa mu kudziimbila ko, ngo turi babo bari na kanyi mu kukala miheebulu myeetu.