Read Beembe Heb 11 Bible Online

Heb 11 - Beembe bible

Heb 11

¹Kanyi ngo nsiitu mu bitotolo bi bakookiingaa, bitotolo bya nsiitu, nkangumunu yangwanwa mu bitotolo bi bahele kumono.

²Mu kanyi didyo, bari ba bateelele bankaaka kimbaangi.

³Mu kanyi, beetu tukoobakalaa ti mansi mayirimini mu maampu ma Nzaambi, kuri lo bitotolo byamonokono, byayirimina mu bitotolo byahele kumonokono.

⁴Mu kanyi, Abele kaheeri kuri Nzaambi kikabu kya kudzusa kibvuriri bubwete ti na kya Kayini. Mu kanyi didyo, nde bari bamuteelele kimbaangi ti nde wasuunguma, Nzaambi nde-meene wata kimbaangi mu bikabu byaandi. Mu kanyi didyo nde kakiri mu kwedzoonso ti bukuri wayeki wafwa.

⁵Mu kanyi, Enoki bamunata ku yulu mpisi kahele kumono lufwa, na basii bweese kumumono ko, bukuri Nzaambi wamuneti, ngo tekesele bamunata, nde bamuteeriri kimbaangi ti wabweeye kuri Nzaambi.

⁶Ngo mbuti kanyi dyo pe, lo kuri muutu wubweeye kuri Nzaambi ko; bukuri wunde wukokosolo kuri Nzaambi, yelemini kutaambula ti Nzaambi wuri, na nde koohaanaa museendu kuri babo bamusakaa.

⁷Mu kanyi, Nowa wataambula ndubululu kuri Nzaambi, mu ntoono bitotolo byaba byakiri kumonokono pe, mu mutima wa kinzaambi nde watuunga nzo ya kiluungu, mu kubvuukisa nzo yaandi; mu kanyi nde kari kabwiisa nsi, na mu kanyi nde kayeki mukondiri saala dya nsungumunu.

⁸Mu kanyi, Abalaami katumumini mu mbila yi kayukiri, mu kweende ku nsi yi kaba kayelemene kutaambula bunu saala, na wayende kwahele kuyaaba ku kaba kweende.

⁹Mu kanyi, nde wayende kwedzakala ku nsi ya lusiilulu, buni ku nsi ya bunzeense, nde waba dzakalaana kunsa musaampu bunu ba Isaki na Yakobe, bari bakondiri ba saala dya lusiilulu lwo lumosi na nde.

¹⁰Bukuri nde waba kiingaana bvula diri na lufulu lwamakwa, diri Nzaambi ngo muteesi na mutuungi.

¹¹Mu kanyi, Sara nde se, ti bukuri waba kisita na mibvu myaba myeki myaluta, nde wabangusini kusa busoombi, bukuri nde wamwiini ti wunde wasa nsiilulu wakwiikama.

¹²Hango-nkuumbu, mu muutu mosi, wuri weki wayaaba lufwa, mwabutuka biseendu biri kufuna bunu bambwetete ku yulu, na bunu munyeenge mu simu dya mubu wuri bwa kutaangula pe.

¹³Bobanso babo bafwiila mu kanyi, kwahele kutaambula bitotolo bya nsiilulu, ngo kasi, babitariri ku la na bamono kiminu mu byo, bo babakuri ti banzeense bari, na bidyeengi ha butoto.

¹⁴Mu nzoonsulu dza bubwo, bo baba soongaa ti bakwesaka nsi.

¹⁵Ngo mbuti baba kwetsimaana nsi yi basiisiri, nkani baketi kubaka ntaangu ya kubvutuka;

¹⁶kasi mu lumalu, bo bari mu musoongo mu nsi yibvuriri bubwete, haho lo ti nsi ya ku yulu. Hango-nkuumbu, Nzaambi wahele na nsoni mu bo, kuri ti bamuteele Nzaambi bo, bukuri nde wayeki wabayirikila bvula.

¹⁷Mu kanyi, Abalaami ba mutsiitsa, kari lo heeri mwaana mu kikabu, na nde waha Isaki, mwaana waandi ndemosi, bukuri wataamburi nsiilulu

¹⁸mu nde dzileele ti: «Mu Isaki, ye wubaka baala.»

¹⁹Nde waba na kitsimi ti, Nzaambi wakuka mu kufulukisa muutu wafwa, mu didyo nde kabweesiri kubaka mwaana waandi, bunu ti nkuma.

²⁰Mu kanyi, Isaki se wasakumuna Yakobe na Esawu, mu ntoono kidziingu kikwiisa.

²¹Mu kanyi, Yakobe bu kaba mu kufwa, wasakumuna mosi mosi mu baala ba Yosefi, na nde watsukuma kuri wasikima mu nto luboto lwaandi.

²²Mu kanyi, Yosefi bu kaba weki ku nsukulu kidziingu kyaandi, wanzoonsolo mu mpalulu baala ba Isaheli, na waha ntumunu mu mitariri biyisi byaandi.

²³Mu kanyi, Moose kamana kubutuka, taayi na nguri bamusweekiri mu mangoondo matatu, bukuri bamwiini bubwe bwa mwaana, na basii ba na boomo ko mu musiku wa mbyaasi.

²⁴Mu kanyi, Moose kamana kubuuka, wabisiri bamuteele ti nde mwaana wa mwaana Falaho wa mukyeetu.

²⁵Nde wasooriri mu kumono mpasi kintwaari na baatu ba Nzaambi, ti na kukeembe mu masumu, mu mwaa-ntaangu yantele.

²⁶Nde wamwiini ti, kuba wasaanu bunu Kiristo, bubwo busina bubvuriri bunene ti na busina bwa ku Ngipiti. Bukuri nde waba talilaana museendu.

²⁷Mu kanyi, nde wasisa Ngipiti, kwahele kubata nkesi dza mbyaasi; bukuri nde waba wateleme na keketee, bunu muutu wuri mu kumono wunde wuri bamumonaa ko.

²⁸Mu kanyi, nde wayirika Paaka na nyakunu makila, mpisi heki mudzusi kahele kubelemene baala ba bo, babutuka batete.

²⁹Mu kanyi, bo basabukiri mubu wabeenge, bunu bakwedyaata ha butoto bwakana, kasi bari Ngipiti batsiitsaana kusabuka, bawii kudyaama mu maampa.

³⁰Mu kanyi, bibaka bya Yeriko byabwiiri, bamanaa kubidyengekele mu biluumbu nsaamu.

³¹Mu kanyi, Lakabi ngaa-buyala, kasii fwa ko, kintwaari na bangaa-tungu, bukuri nde wataamburi bakoondolo ba mansweeki mu kiyeengi.

³²Nki nyibweese kuleele? Mukwongo, ntaangu yo pe mu kudzoonsolo mu myominso mitariri Ngedehoni, Baraki, Samsoni, Yefeta, Davidi, Samweli, na babikiri,

³³bo bari mu kanyi, babwiisa bimfumu, basalila nsungumunu, bataambula bi babasiiriri nsiilulu, bakaanga minwa mya bankosi,

³⁴badzimisa mambaawu mamakwa, babvuuka mu lufwa lwa mu saabala, babweese kubaka makwa ha mambisa ma buyonsi, basoongo bunkanyi mu mudziingu, bayitikisa mikaangu mya bayongolo mya banzeense.

³⁵Bakyeetu babweese kutaambula mfulukulu baatu baaku baba bafwa. Bakaka babanyonyo manyutu, ngo babisiri kuri ti babakuula, mpisi babaka mfulukulu yibvuriri bubwete.

³⁶Bakimi, bamono mpasi dza munsiku na dza nkwaasulu, natee se na dza mu bikonyi na dza mu boroko;

³⁷babamosi babadzusula mu matari, babatabala mu kwaasa, bafwiila mu saabala, bani babakweyimaana kuri balwaata mikaanda mya bimeeme bunu pe mya bantaba, kwahele kuba na kitotolo, kuri babakwaamisa na bababamisa.

³⁸Nsi yaba yahele kuyelemene mu bo, babakweyimaana mu mansi mankatu, mu milaandu, mu mantari na miduku.

³⁹Bobanso babateeriri kimbaangi kya kyakibweete, mu ntoono kanyi dyaaku, kwahele kutaambula bi babasiiriri lusiilulu.

⁴⁰Nzaambi waba wataasila kitotolo kibvuriri bubwete, mpisi heki bo bahele kutubuka mu nyirimunu yakuka kwahele beetu.