Read Beembe Heb 12 Bible Online

Heb 12 - Beembe bible

Heb 12

¹Mu didyo, beetuneenu se, bukuri bambaangi balaka batudyengekele, tuloosee mpisi kilemu na masumu mahele na mpasi mu kutunzungukila, na tudzumunee ntiinu mu kifiki, mu kiteesu ki bari batutakala.

²Tusyeetulee kisoosi kuri Yesu, mubaandiki na mukukisi kanyi, nde wuri, ha kibeendu kya kiminu ki bamusoongiri, wakuunda mpasi dza kuruwa, bu ka nyaafuna nsoni, na wadzakala ha lubakala lwa Nzaambi na lwa mboloko yaandi.

³Beenee na bitsimi mu wunde wakuunda nwanusunu dza bangaa-masumu, mpisi luhele kuholo-bito, na bitsimi byeenu bihele kubvutuka mambisa.

⁴Beenu lwakiri kutanda mpe mu kunwaanisa masumu, natee mu kiteesu kya makila.

⁵Beenu lwadzimikini nsyamusunu dzi bari baluha bunu ti kuri baala: «Mwaana waami, yaa nyaafunaa nseembulu dzi kuseembele Mfumu ko, na yaa holo-bito ko mbuti nde wukuŋaŋana.

⁶Mukwongo, Mfumu kooseembaana wu katiiri, nde wulataa mpisi mwaana wu Kakootaambulaa.»

⁷Mu nsungukulu ya beenu-meene, beenu luri mu kwekuunda mpasi, Nzaambi wuhololo beenu buni baala baandi. Mukwongo, nkya mwaana wuri taayi kamuseembaa ko?

⁸Mbuti beenu bakooluseembaa bunu bu baseembelaa baala bobanso ko, lo beenu luri baala bangwanwa ko, ngo baala bari taayi wahele kubayaaba.

⁹Beetuneenu twaba na bataayi ba muswinyi, baba kwetuseembaana, na twaba babvuminaana; ngo dyaburi tuhele kubvula kutumuma kuri Taayi dya mampeeve, mpisi tuba mwooyo?

¹⁰Bo baba kwetuseembaana mu mwaa-ntaangu yantele, bunu bu baba kwemwiinaa bo, ngo kasi Nzaambi kutuseembe mu ndaandu ya beetu-meene, mu kuri ti katuha bungisi.

¹¹Mpisi nseembulu hatete dzikoomonokaa bunu ntoono ya kiminu ko, ngo bunu ya ngebe, kasi ku mankula dzikoobutaa kimbutu kya kiyeengi na kya nsungumunu kuri babo bataamburi nyikusulu.

¹²Hango-nkuumbu, kumisee myooko myeenu myahele makwa, na maboongo meenu makwetekete.

¹³Suungukee manzila ma lukwedyaatila mu miilu myeenu, mpisi heki mubeeru kuulu kahele kusuumbuka ngo katsiinika.

¹⁴Namitinee kwesa kiyeengi na bobanso, na kweba kunsa bungisi, buri, mbuti buheriri, lo kuri muutu ti mosi ko wumono Mfumu.

¹⁵Seenee madyeele, mpisi muutu kahele kubisa bweese bwa Nzaambi, na kuhele kuba mwaansi wankari wumene mu kukotoso kisaangila, na kubiyisa baatu balaka.

¹⁶Yaa kuba muutu ti mosi, wakiyala bunu pe, wahele kwebvumina bitotolo byangisi, bunu Esawu wayarikiri bukuutu bwaandi mu kilaambu kimosi.

¹⁷Mukwongo, beenu luyaari ti, ha mambisa haho, nde bu katiiri kutaambula lusakumunu bunu saala, bamuwuungula. Nde kasii baka mpwaani ti mosi ko, ya kuyiinga kitsimi kya taayi, ti bukuri wasaka lusakumunu lulwo mu mansangasa.

¹⁸Beenu lwasii kokosolo bebele na kitotolo, kiri lo bakikweeti ko, kiri mu kuya mbaawu, kunsa butsuku na mampimbisi, na kiteembu kya makwa,

¹⁹na mbeembu ya mvumvuri, na lusuku lwa makwa lwa bitoolo kuri babo baba yukaana, bayingukila kuri bahele bweese kubaleele ntoono ti mosi ha yulu haho.

²⁰Bukuri baba bahele kubangisina kukuunda lutumu lumalu: «Mpisi wubelemene mulaandu, ti hayuka kibulu, lo kumudzusila mu matari.»

²¹Mi bamwiini myaba mibvuriri nsiisi, na Moose waleele ti: «Me nyiri na kinkuukulu na nyiri mu kutekete.»

²²Ngo kasi beenu lwakokosiri bebele na mulaandu wa Syoni, na bvula dya Nzaambi ya mwooyo, Yerusalemi dya ku yulu, na mafuunda ma bambasi makutukina mu munkeembu,

²³bebele na dibuundu dya babutuka batete, batinuma ku mayulu, na Nzaambi mutsuundisi wa bobanso, na biluunsi bya basuunguma batubuka ku nyirimunu,

²⁴bebele na Yesu munkabu-kati wa lulelusunu lwamoono, na makila ma nyakunu mabvuriri kudzoonso kwakubwe, ti na makila ma Abele.

²⁵Seenee madyeele, mu kuhele kubisa kuyuka wunde wudzoonso. Bukuri mbuti, babo babisiri kuyukula wunde waba balubulaana ha butoto, basii bvuuka mu nseembulu ko, lo beetuneenu se, tubvuuka mu nseembulu ko, mbuti tubisiri kuywiila wunde wudzoonso ku mayulu.

²⁶Mu ntaangu yayikulu, mbeembu yaandi yatembisiri butoto; ngo mu lumalu nde wasa lusiilulu, wuleele ti: «Me sa nyabweese kuteembese lukimi, kari bunu butoto ko ngo na yulu se.»

²⁷Ntoono yiri ti: «Nde wubweese kuteembese lukimi», yisoongo kuri ti, bitotolo bi bayirikiri sa byanyingina na kukituka, mpisi heki bibyo biri byanyingina ko binamitina kuba.

²⁸Ngo bukuri sa twataambula kimfumu kiri kyaningina ko; tubvutulee matoondo na tusalilee Nzaambi bwayelemene, kunsa kinzaambi na mu kibvumi.

²⁹Mukwongo, Nzaambi yeetu, nde mbaawu yikoonyengisaa.