Read Beembe Heb 13 Bible Online

Heb 13 - Beembe bible

Heb 13

¹Hemese ntiilu ya kimpaangi yinamitina kuba.

²Yaa ludzimikina ntambukulu banzeense ko, bukuri mu yo, baatu babamosi bataamburi bambasi kwahele kuyaaba.

³Tsiminee bari mu boroko, bunu ti beenu se luri kintwaari na bo mu boroko, tsiminee babo ba bakwekwaamisa, bunu ti beenu se luri nyutu mosi na bo.

⁴Hemese makweele maba makiinsa kuri bobanso, na mbuka ya makweele yaa yiba yasumunu ko, bukuri Nzaambi sa katsuundisa biyala na bangaa-kimpala.

⁵Ndyaatulu yeenu, yaa yiba yatwaalusu mu ntiki-mboongo ko, monee kiminu mu bini bi luri na byo. Bukuri nde-meene Nzaambi waleele ti: «Me nyikupatila ko, me nyikuyekele ko.»

⁶Mu didyo, beetu turi na nsiitu mu kuleele ti: «Mfumu ngo mubakisi waami, me nyiba na boomo ko; muutu lo nki kasa me?»

⁷Tsiminee babo bakwelutwaalisa, bo baluyaabisa maampu ma Nzaambi. Monee bwaba nsukulu kidziingu kya bo, na namee kifwaani kya kanyi dya bo.

⁸Yesu Kiristo wuri bwobumosi dzoono, lumalu na na mu mantaangu momanso.

⁹Yaa lutala ko ti, baluwumuna mu nyikusulu dza bitsuumbu-bitsuumbu dzanzeense. Bukuri buri bwabubwete, ti mutima kaba wasyaamusu mu bweese, nkani ka mu mangisi ma byandya, mari babo bakoomabvuminaa, babakilaa mo ndaandu ko.

¹⁰Beetuneenu turi na dziku, diri bisari bya musaampu, byahele na miswa mu kudiila byandya haho.

¹¹Mukuutu bangaanga-nzaambi koonataa makila ma bibulu mu nzo yangisi, mu ntoono mpemusunu masumu, ngo byo-meene bibulu kubiyokolo ku mbisa bula.

¹²Mu didyo se Yesu, mu kuri ti kaha bungisi kuri baatu mu makila ma nde-meene, nde wamono mpasi ku mbisa bvula.

¹³Hango, tupaleenu ku mbisa bula mu kwemubwaana, na kutaambula kuri ti tuba basaanu bunu nde.

¹⁴Bukuri ka turi na bula bwakinkulu ko, ngo turi mu kwesaka bula bwa ntaangu yikwiisa.

¹⁵Mu nde, tuhenee kikabu kya ndumusu ya mpisi ntaangu kuri Nzaambi, haho lo ti, mikuunga misiika nkuumbu yaandi.

¹⁶Yaa ludzimikina nyirikulu mamabwe ko, na kwebakisina beenu na beenu, bukuri Nzaambi wumonaa kiminu mu bikabu bya bubwo.

¹⁷Beenee na bintambukulu kuri babo bakwelutwaalisa, na beenee batumuma kuri bo. Mukwongo, bo bakwekebe miheebulu mya beenu, bukuri bo sa batambikisa mabuungu. Seenee bubwo mpisi bo besala kisalu mu kiminu, nkani ka mu kwekuuma ko, bukuri babaa bakwekuuma, lo mimyo myahele ndaandu kuri beenu.

¹⁸Saambileenu mu beetu. Mukwongo, beetu tuyirikiri kuyaaba ti turi na nsimunu yayibwete, mu nzala kuba na ndyaatulu yayibwete mu myominso.

¹⁹Me nyiluyingukila kwalaka ti saambileenu, mpisi heki me mwasula na kubvutuka kuri beenu.

²⁰Hemese Nzaambi ya kiyeengi, wafulukisi mu bafwa Mfumu yeetu Yesu, mutari wamunene, mu ntoono makila ma lulelusunu lwa na mu mantaangu momanso,

²¹kaluha makwa ma kuyirika myominso myamibwete, mu kukukisa kutya kwaandi, kayirika mu beetu mamo mamabwete, ha busu bwa Yesu Kiristo, kuri nde kuba nkeembu mu bibvu ngo bibvu. Amene!

²²Bampaangi, me nyiluloombo ti kuundeenu maampu mamama ma nsyamusunu, bukuri mwaa-myantele me nyiri na myo mya kulutinina.

²³Yaabee ti mpaangi yeetu Timoteho bamupalisiri mu boroko, mbuti wasiri na kwiisa kuri me, lo sa twiisa beetu na nde mu kulumono.

²⁴Heenee mamboto kuri batwaalisi beenu bobanso, na kuri bangisi bobanso. Bampaangi bari Italya ba luheekiri mboto.

²⁵Bweese buba na beenu-banso!