Read Beembe Heb 2 Bible Online

Heb 2 - Beembe bible

Heb 2

¹Hango-nkuumbu, beetu tuyelemini kuhololo mu bunkete bwalaka, mamo ma turi twayuka mpisi tuhele kuwumuka.

²Mukwongo, mbuti maampu mayaabisiri bambasi mayende mu mana, na mbuti bobanso basinini mangisi, na basii nko bataamburi museendu wayelemene.

³Ngo dyaburi beetu tubvuukila, mbuti tunyaafuni mvuukulu yayinene yiyo, yiri Mfumu wabaandikiri kuyaabisa, tumi babo bayukiri beki tswiikisa kuri beetu,

⁴mu kusiingisa kimbaangi kya Nzaambi mu bidiimbu, mu bimaangu, na biyiriki bya mpinu bya bitsuumbu-bitsuumbu, na mu bikabu bya Mpeeve Yangisi, bunu buri kutya kwaandi.

⁵Mukwongo, kari kuri bambasi ko, nde kari kaha lutumu lwa nsi yikwiisa, yi turi mu kudzoonsolo.

⁶Ngo mu Matinu, muutu mosi wata kimbaangi waleele ti: «Muutu, na kari, kuri ye wumubambukila mwooyo? Bunu pe, mwaana muutu na kari, kuri ye wumutsimina?

⁷Ye wamukulula mwaa-kiteesu kibvuriri buntele na kya bambasi, ye wamulwiika lukoongolo lwa nkeembu na lwa lukiinsu,

⁸ye wasuusa byobinso kunsa bitaambi byaandi.» Mukwongo, bu kasuusa byobinso kunsa lutumu lwaandi, lo kuri kitotolo ti kimosi ko kyahele kuba kunsa lutumu lwaandi. Mu lumalu, beetuneenu twakiri kumono pe, ti byobinso biri kunsa lutumu lwaandi;

⁹ngo kasi tumono kuri ti, Yesu, wunde wubakuriri mu mwaa-kiteesu kibvuriri buntele, ti na kya bambasi, mu ntoono mpasi dza lufwa, nde bamulwiika lukoongolo lwa nkeembu na lwa lukiinsu, mpisi heki mu bweese bwa Nzaambi, nde kabiimba lufwa mu ntoono baatu bobanso.

¹⁰Mukwongo, bwaba bwayelemene kuri wunde wuri, byobinso biri mu ntoono ya nde, na byayirimina kuri nde, mu kunata baala balaka mu nkeembu, na kukukisa mvuukulu ya bo, mu mpasi dza wunde wabaandikiri mvuukulu yiyo.

¹¹Bukuri muhe bungisi, na bataamburi ba bungisi bobanso, bafumuna mu muutu mosi. Mu ntoono yiyo, nde wahele kumono nsoni mu ku bateele ti bampaangi baandi,

¹²na wuleele ti: «Me sa nyayaabisa nkuumbu yaaku kuri bampaangi baami, me sa nyakusiika ha kakati dya dibuundu.»

¹³Na wubweese kuleele ti: «Me sa nsa nsiitu mu nde.» Wubweese kuleele ti: «Me ndewu, na baala ba mpa zaambi.»

¹⁴Ngo bukuri baala babo bari na nyutu ya muswinyi na makila, na nde se wabaka nyutu ya bubwo, mpisi heki mu lufwa lwaandi, nde kamana makwa ma wunde waba na lutumu mu lufwa, ngo dyabulu,

¹⁵na kukuula, babo bari mu ntoono boomo bwa lufwa, baba kunsa bunkutu mu kidziingu kyaaku kyokinso.

¹⁶Mukwongo, diri dyangwanwa ti, nde wahele kwiisa mu kubakisa bambasi ngo mu kubakisa bapalila mu Abalaami.

¹⁷Mu didyo, nde kaba kafwanikina na bampaangi baandi mu myominso, mpisi kaba mukuutu bangaanga-nzaambi, ngaa-ngebe na wakwiikama mu kisalu kya Nzaambi, mu kufuta masumu ma baatu.

¹⁸Bukuri, nde-meene bu kamono mpasi, mu nsindukulu, lo wakuka mu kubakisa babo bakotaana mu nsindukulu.