Read Beembe Heb 3 Bible Online

Heb 3 - Beembe bible

Heb 3

¹Hango, bampaangi bangisi, beenu luri kintwaari mu mbila ya ku yulu, siilee mutima mu wunde wuri ntumu, na mukuutu bangaanga-nzaambi, wu turi twasiila kanyi, ngo Yesu.

²Nde wakwiikama kuri wunde wamusooriri, «bunu bwaba Moose mu nzo yaandi yoyinso.»

³Mukwongo, munkeembu wa nde bvuriri bunene ti na wa Moose, bukuri mutuungi-nzo, wubvulaa kubaka lukiinsu ti na nzo yo-meene.

⁴Mukwongo, mpisi nzo yiri yatuungu kuri muutu, ngo watuunga byobinso Nzaambi.

⁵Moose waba wakwiikama mu nzo yaandi yoyinso, bunu kisari mu kuta kimbaangi mu misamu mi baketi kuleele.

⁶Ngo Kiristo, wuri bunu Mwaana mu nzo, na nzo yiyo ngo beetu, mbuti tukebiri kifiki na kimweese kya nsiitu.

⁷Hango-nkuumbu, bunu buleele Mpeeve Yangisi: «Lolo di, mbuti luyukiri mbeembu yaandi,

⁸lo yaa lukubisa mitima myeenu ko, bunu mu ntaangu ya tungu, mu kiluumbu kya nsiitsulu ku nsi yankatu,

⁹kuri bataayi ba beenu, baholaa, bakotisiri me mu nsindukulu, mu kutsiitsa me, na bo bamwiini biyiriki bya me,

¹⁰mu mibvu makuumi mana. Hango-nkuumbu, me nyabakiri kiseendu kikyo nkesi, na me nyaleeriri ti: "Bo bakwewumuka mu mitima mpisi ntaangu, na bahele kuyaaba manzila maami."

¹¹Mu bubwo, me nyalabiri kunsa nkesi dzaami ti: bo ka bakoto mu mpuumunu yaami ko.»

¹²Seenee madyeele, bampaangi, mpisi kuhele kuba mu beenu muutu ti mosi, wuba na mutima-bubi, wahele na kanyi, wutatuka na Nzaambi yamwooyo,

¹³ngo kasi, syamisineenu beenu na beenu mpisi kiluumbu, mbuti nyabusulu ya «lolo di» bunu yiri, mpisi heki ti mosi mu beenu kahele kukubisa mutima, bu kabwiiri mu mpumukunu ya masumu.

¹⁴Bukuri beetu turi bakweyeende kintwaari na Kiristo, mbuti tukebiri na keketee kibeendu kyeetu ku mbandukulu natee ku manunu.

¹⁵Bunu bu diri dyaleele ti: «Lolo di, mbuti luyukiri mbeembu yaandi, lo yaa lukubisa mitima myeenu ko, bunu mu ntaangu ya tungu.»

¹⁶Mukwongo, ba na bari bayukaana mbeembu bayitungukiri? Buri kari bobanso babo bapariri mu Ngipiti, mu ntwalusulu ya Moose ko?

¹⁷Ba na nde kabakiri nkesi mu makuumi mana ma mibvu? Buri kari babo bayirikiri masumu, bari baholaa bafwiiri mu nsi yankatu ko?

¹⁸Kuri ba na nde kalabiri ti: «Bo ka bakoto mu mpuumunu yaandi ko», mbuti ka kuri babo basiiri nko ko?

¹⁹Na beetu tumono ti bo basii kubangisina kukoto ko, mu ntoono kuhele kwa kanyi.