Read Beembe Heb 5 Bible Online

Heb 5 - Beembe bible

Heb 5

¹Mukwongo, mpisi mukuutu bangaanga-nzaambi wasoolu ha kakati dya baatu, na bamusuusa mu kusala mu ntoono baatu mu mitariri Nzaambi, mpisi kaha bikabu na kadzusa bibulu byaha mu kikabu mu ntoono masumu.

²Nde wakuka mu kuba na nyukulu, mu bari kunsa lubu na mu badziimbila, bukuri nde-meene se wuri kunsa buyonsi.

³Mu ntoono buyonsi bubwo, nde yelemini kudzusa bibulu byaha mu bikabu mu ntoono masumu ma nde-meene na ma baatu.

⁴Kuri muutu wutaambula lukiinsu lulwo mu nde-meene ko, ngo wunu wataambula mbila Nzaambi, bunu Aaloni.

⁵Bunubwo se, Kiristo kasii holo mu nde-meene nkeembu ya kuba mukuutu bangaanga-nzaambi ko, ngo nde wayitaambula kuri wunde waleeriri ti: «Ye ngo mwaana waami, lolo di me nyikubutiri.»

⁶Bunu bu kari mu kuleele kwakaka ti: «Ye wuri ngaanga-zaambi mu mantaangu momanso, mu kiteesu kya Melekisedeke.»

⁷Nde wuri mu biluumbu bya kidziingu kya muswiini waandi, wasaambila na wayiingikila, mu misaakulu myamila na mansangasa, wunde waba wakuka mu kumubvuukisa mu lufwa, na nde wataambula mvutu mu ntoono kutumuma kwaandi.

⁸Ti bukuri waba Mwaana, nde wayika kuba na bintambukila mu mi kamwiinini mpasi.

⁹Bu kakukisa kiteesu kyaandi, nde wayeki, wunde wuhaanaa mvuukulu ya mantaangu momanso, kuri bobanso bamutambukilaa.

¹⁰Nzaambi waleele mu nde ti, mukuutu bangaanga-nzaambi mu kiteesu kya Melekisedeke.

¹¹Mu ntoono yiyo beetu turi na myalaka mya kuleele, na miri mpasi mu kubaangula, bukuri beenu lwayeki na lunzingu mu kubakula misamu.

¹²Beenu nkani lwayeki bayikisi na kidzika, kasi beenu, kubweese kusaka ti nkani muutu kaluyikisa misamu, nkati mya mbandukulu mya maampu ma Nzaambi, na lweki mu kiteesu kya kutya beene, nkani ka byandya byakuba ko.

¹³Mukwongo, mpisi wunde wakiri mu kwenwa beene, lo wakiri kuyaaba pe kusobokoso maampu ma nsungumunu, bukuri nde wakiri mwaa-mwaana wansoombo.

¹⁴Ngo byandya byakuba bya baatu babuuka, bo bari mu nsalulu yaaku bayeki bayaaba kusobokoso mamabwe na mamabi.