Read Beembe Heb 6 Bible Online

Heb 6 - Beembe bible

Heb 6

¹Hango-nkuumbu, yaa tubeenee munu mu nyikusulu dzatete dza mu Kiristo ko, ngo tusakeenu nyikusulu dza baatu babuuka. Yaa tutuungee lufulu lukimi ko, mu kubweese kuyiinga madyeele, mu kusiisa biyiriki byafwa, na mu kusa kanyi mu Nzaambi;

²nyikusulu mu mitariri mbotokulu, ntetukulu myooko, mfulukulu ya bafwa, mutsuundu wa manunu.

³Mimyo beetu tuyirika, mbuti heki Nzaambi heeri miswa.

⁴Mukwongo, baatu bari, bamwaataambula buungi, bamwaabiimba kikabu kya ku yulu, bamwaataambula Mpeeve Yangisi,

⁵bamwaamono luwu lwa maampu ma mamabweete ma Nzaambi, na bamwaayaaba mpinu dza nsi yikwiisa,

⁶ngo babwiiri, lo diri dya mpasi kuri bo mu kubweese kuyiinga madyeele. Mu didyo, mu bo-meene lo babweese kukomono Mwaana Nzaambi, na kuha nzila mu kumutuka.

⁷Mukwongo, butoto bubaanaa bunokono mamvula mu ntaangu ngo ntaangu, lo bumenisaa bitiiti biri mufunu kuri bahati ba manseke. Butoto bubwo butaambulaa lusakumunu lwaandi kuri Nzaambi.

⁸Ngo mbuti bwo kubuta mpaanga na minkangi, lo bwahele na mufunu, na hasii hantele lo buri kunsa mpopi, na manunu kubuyoko mbaawu.

⁹Ngo banduku ba mutima, ti bukuri turi mu kudzoonsolo bubwo, beetu tuyirikiri kuyaaba mu mitariri beenu, ti luri mu kiteesu kibvuriri bubwete, na lwakwaata mvuukulu.

¹⁰Mukwongo, Nzaambi wahele na bubayi, mu kudzimbikina kisalu kyeenu, na ntiilu yi luri lwasoongo mu nkuumbu yaandi, bu lwasariri bangisi, na bu luri mu kunamitina kubasalila.

¹¹Beetu tutiiri ti mpisi muutu mu beenu, kasoongo kifiki kyokimosi, mu kutubula nsiitu mu kiteesu kyakuka, natee kumanunu,

¹²mpisi luhele kuba bilyeebe, ngo luba basombisiri ba babo bari mu kanyi na nkindusulu-mutima, bataambula saala dya nsiilulu.

¹³Mukwongo, Nzaambi kabaanaa wusa lusiilulu kuri Abalaami, bu kaba wahele na muutu wubvuriri bukuutu na nde wa kulaba, nde walaba mu nkuumbu ya nde-meene,

¹⁴waleele ti: «Ngwanwa, kusakumuna, me nyikusakumuna, na kufunusa, me nyikufunusa.»

¹⁵Mu bubwo, Abalaami, bu kakiindisa mutima, wataambulaa mi bamusiiriri nsiilulu.

¹⁶Mukwongo, baatu babaanaa balaba maalu, lo mu nkuumbu ya wubvuriri bukuutu, mu kumana mpaka, na kutswiikisa maalu.

¹⁷Mu didyo, Nzaambi bu kaba watya kusoongo na pwelelee, kuri bakoondiri ba lusiilulu, bitaasi byaandi biri byayiingaa ko, nde walaba maalu,

¹⁸mpisi heki mu misamu myoolo miri myayiingaa ko, miri lo Nzaambi wahele kusa mpya, tutaambuleenu nsyamusunu dzalaka, mu kukwaata na keketee nsiitu dzi bari batutaasila;

¹⁹dziri bunu kinko kya kidziingu kyeetu, kyakomono mu makwa na keketee, kyakaanga natee mu nsaanda Nzo-nzaambi ya ku yulu.

²⁰Mumwo mwatekisiri kukoto Yesu mu ntoono beetu, nde wayeki mukuutu bangaanga-nzaambi mu mantaangu momanso mu kiteesu kya Melekisedeke.