Read Beembe Heb 7 Bible Online

Heb 7 - Beembe bible

Heb 7

¹Mukwongo, Melekisedeke yimayi, waba mbyaasi Saleme, ngaanga-nzaambi ya Mwa-yulu; nde wayende mu kubwaana Abalaami, wanangukini ku mudziingu wu kabwiisiri bambyaasi, na wamusakumuna.

²Abalaami, kuri nde kaheeri kikuuku kyakuumi, mu byobinso bi kabakiri. Ngo mbuti mu kubaangula nkuumbu Melekisedeke, lo dyatete nde «mbyaasi ya nsungumunu» tumi se mbyaasi Saleme, haho lo ti «mbyaasi ya kiyeengi.»

³Nde wahele na taayi, wahele na nguri, wahele na muloongo kinkaaka, wahele na mbandukulu biluumbu, wahele na manunu kidziingu, wafwanikina na Mwaana Nzaambi, nde ngaanga-nzaambi mu mantaangu momanso.

⁴Monee buri bunene bwa wunde wuri, Abalaami, nkaaka, kaholaa wumuheeri kikuuku kyakuumi, mu bibvuriri bubwete bi kabakiri.

⁵Baala ba Levi bo se, bataambula kisalu, bari na ntumunu mu kuyisila kikuuku kyakuumi kuri baatu, bunu buri mangisi, haho lo ti, kuri bampaangi ba bo-meene, bari bo se bapalila mu Abalaami.

⁶Melekisedeke, wuri waba wahele mu muloongo kinkaaka kya bo, wataambula kikuuku kyakuumi kuri Abalaami, na wasakumuna wunde wataamburi nsiilulu.

⁷Ngo, kwahele nkalikisi, wa mukuutu koosakumunaa wa kilesi.

⁸Hamaha, kikuuku kyakuumi, baatu bari lo bafwiiri bakookitaambulaa, ngo kunii muutu wu bari baleele ti wuri mwooyo.

⁹Lo tutsiitsiri kuleele ti, ku kimbisa kya Abalaami, Levi mutaamburi kikuuku kyakuumi, nde se waheeri kikuuku kyakuumi.

¹⁰Mukwongo, nde waba wakiri mu mwooyo Abalaami nkaaka, mu ntaangu ya ba kweemubwaana Melekisedeke.

¹¹Ngo mbuti nyirimunu yakuka yaba kubakila mu kisalu kya bungaanga bwa Nzaambi mu baala ba Levi, bunu buloombolo mangisi ma baatu, lo nkya mufunu baketi kumono, mu kuba na kisari kikimi mu kiteesu kya Melekisedeke, nkani ka mu kiteesu mu kya Aaloni ko wu bari basoolo?

¹²Mukwongo, kisalu kya bungaanga bwa Nzaambi kiyiingana, lo mangisi se mayelemini kuyiinga.

¹³Bukuri wunde wu bari mu kudzoonsolo mu misamu mimami, wa mu kitsuumbu kikimi, kyahele na muutu wasariri kisalu kya dziku.

¹⁴Mukwongo, diri dyayabakana ti Mfumu yeetu wapalila mu Yuda, kitsuumbu, kiri Moose kasii leele musamu ti mosi ko, mu mitariri bangaanga-nzaambi.

¹⁵Didyo dyamonoko na pwelelee, habaanaa ngaanga-nzaambi yikimi, yiri bunu Melekisedeke, yitelemini.

¹⁶Nde wuri lo weki ngaanga-nzaambi, ngo kari bunu buri ntumunu dza mangisi ma kimuutu ko, kasi bunu buri mpinu dza kidziingu kyahele manunu.

¹⁷Bukuri diri dyaleele ti: «Ye wuri ngaanga-zaambi mu mantaangu momanso, mu kiteesu kya Melekisedeke.»

¹⁸Mukwongo, lutumu lwalukulu lwayeki lwayisulu, bukuri lwaba lwahele na makwa, na lwahele mufunu.

¹⁹Bukuri mangisi mahele kunata kitotolo ti kimosi, ku nyirimunu yakuka, ngo beetu twakoto mu nsiitu yibvuriri bubwete, mu yo beetu tukokisilaa kuri Nzaambi.

²⁰Mimyo myayirimini mu ndabulu maalu, ngo kasi bakaka bayeki bangaanga-nzaambi, kwahele kulaba maalu.

²¹Ngo nde wayeki ngaanga-nzaambi mu ndabulu maalu ma wunde waleeriri kuri nde ti: «Mfumu wayeki walaba, kabweese kuyiinga bitsimi ko: "Ye wuri ngaanga-nzaambi mu mantaangu momanso."»

²²Mu kiteesu kikyo, Yesu wayeki mutamuni lulelusunu lubvuriri bubwete.

²³Ngo bakaka bamaba, bari balaka mu kuba bangaanga-nzaambi, bukuri lufwa lukoobakabukisa mu kunamitina kisalu.

²⁴Ngo nde bukuri wanamitina kuba mwooyo mu mantaangu momanso, wuri na kingaanga-nzaambi kiri kyawaanaa ko.

²⁵Hango-nkuumbu, nde wakuka mu kubvuukisa kwa kinkulu, babo bakookokosolaa mu nde kuri Nzaambi, bukuri nde wuri mwooyo mu mantaangu momanso, mu kusaambila mu bo.

²⁶Mukwongo, kuri beetu mukuutu bangaanga-nzaambi waba wayelemene ngo wabubwo. Nde wangisi, wahele na mamabi, wahele na masumu, wahaambuka na bangaa-masumu, na bamunaakisa ku nkati yulu.

²⁷Nde wahele na nzala kusa busaanaa bakuutu ba bangaanga-nzaambi bakaka, mu kudzusa bibulu bya kuha mu kikabu mpisi kiluumbu, dyatete mu masumu ma nde-meene, tumi mu ma baatu. Bukuri mimyo nde wayirikiri mbala mosi, bu kaheeri nyutu ya nde-meene.

²⁸Mukwongo, mangisi mabyaalisaa baatu bari na buyonsi, mu kuba bakuutu ba bangaanga-nzaambi; ngo kasi maampu ma ndabulu maalu mayisa ha mambisa ma mangisi, mabyaalisa Mwaana, watubuka mu nyirimunu yakuka, mu mantaangu momanso.