Read Beembe Heb 8 Bible Online

Heb 8 - Beembe bible

Heb 8

¹Musamu wubvuriri mufunu, mu mi turi mu kuleele, ngo wumawu: beetu turi na mukuutu bangaanga-nzaambi wa bubwo, wadzakala ha lubakala lwa mboloko ya bumbyaasi mu mayulu.

²Kisari mu nzo yangisi na mu musaampu wangwanwa, watuungu kuri Mfumu, nkani ka kuri muutu ko.

³Mukwongo, mpisi mukuutu bangaanga-nzaambi, bamubyaalisaa mu kuhaanaa bikabu na kudzusaa bibulu byaha mu kikabu; haho hari mufunu kuri nde se mu kuba na kitotolo, ki kaha.

⁴Mbuti nde waba ha butoto, nkani kaketi kuba ngaanga-nzaambi ko, bukuri kuri bakimi bakoohaanaa bikabu bunu buri mangisi.

⁵Bo bakoosalaa kisalu, mu kusombosolo kifwaani kya bitotolo bya ku yulu, bunu bwaba yaabisa Nzaambi kuri Moose, mu kutuunga musaampu. Nde wamuleele ti: «Yirika myominso, bunu buri kifwaani kya ma bakusoongiri ku yulu mulaandu.»

⁶Kasi mu lumalu, nde wabaka kisalu kyasoboko, kibvuriri mufunu, bukuri nde wuri munkabu-kati wa lulelusunu lubvuriri bubwete, lu basiiriri nsiilulu dzibvuriri bubwete.

⁷Mukwongo, mbuti lulelusunu lwatete lulwo, lwaba lwahele na mya maseembu, nkani baketi kusaka lwadzoolo ko.

⁸Ngo mu kubaŋaŋina, nde wabaleele ti: «Monee, biluumbu biri mu kukwiisa, bu leele Mfumu, me sa nyasa lulelusunu lwamoono na nzo Isaheli na ya Yuda.

⁹Lwo lubweese kuba bunu buri lulelusunu, lu nyasiiri na bataayi ba bo ko, mu kiluumbu ki nyabakweeti mu kooko, mu kubapalisa mu nsi ya Ngipiti. Me nyabayekiri, bukuri bo-meene, basii namitina kuba mu lulelusunu lwaami ko, bu leele Mfumu.

¹⁰Lulelusunu lu nyisa me na nzo ya Isaheli, luri bumabu: ha mambisa ma biluumbu bibyo, bu leele Mfumu: me sa nyabaha mangisi maami, me sa nyamatina mu mitima mya bo: me sa mba Nzaambi bo na bo sa baba baatu baami.

¹¹Ka kuba muutu ti mosi ko, wuyikisa mbaasi yi bari nsi mosi, bunu mpe wuleele kuri mpaangi yaandi ti: yaaba Mfumu! Mukwongo, bobanso sa bayaaba me, kuholosono bilesi natee bakuutu mu bo,

¹²bukuri me sa nyahemesene lumvuki lwa bo, na ka nyibweese kubaambukila mwooyo mu masumu ma bo ko.»

¹³Habaanaa wudzoonsolo mu lulelusunu lwamoono, lo nde sii kuri ti lwatete luba lwalukulu; ngo bibyo byeki byabikulu na byanuna, byeki bele mu kudziimbila.