Read Beembe Heb 9 Bible Online

Heb 9 - Beembe bible

Heb 9

¹Lulelusunu lwatete lwaba na mikele mya lusaambulu, na nzo yangisi ya ha butoto.

²Mukwongo, mu musaampu watete wu batelimisi, wu baba leelaana ti nzo yangisi, mwaba kitetukulu kya mwiinda, taabala, na mampa maha mu kikabu.

³Ku mbisa nsaanda yamoolo, kwaba kihekiri ki baba teelaana ti kibeendu kyangisi na ngisi.

⁴Mumwo mwaba dziku dya woolo, di baba yokilaana mananaasi, na sanduku dya lulelusunu dyalata woolo mpele na mpele, munsa dyo mwaba kisa kya woolo kyaba na maana, mwaba se luboto lwa Aaloni, lwaba na bifulu, na matari ma lulelusunu.

⁵Ha yulu sanduku haba bakeluba ba biteki bya nkeembu, basa mposi ha kibeendu ki bayiitulaa makila ma ndoombulu mpemisi mu masumu. Kwahele kwaandi mufunu mu kunonono mutatu.

⁶Bitotolo bibyo byaba byasuusa mumwo, na bangaanga-nzaambi, mu mpisi ntaangu, baba kotaana mu musaampu watete, mu kusa kisalu kyaaku.

⁷Mu musaampu wamyoolo, wunu mukuutu bangaanga-nzaambi, waba kotaana mbala mosi mu mubvu, na makila ma kuha kikabu mu ntoono lumvuki lwa nde-meene, na lwa baatu.

⁸Mpeeve Yangisi yaba soongaana bubwo ti, nzila ya nzo yangisi yakiri kudzibula pe, bukuri musaampu watete waba wakiri wateleme.

⁹Yiyo nkuma mu ntaangu ya lumalu, yisoongo ti bikabu, na bibulu byadzusu mu kikabu, byahele kukuka mu kunata mu nyirimunu yakuka, mu nsimunu yaandi, muutu wunde wukoosaambilaa.

¹⁰Mimyo mini mikele mya kimuutu, mu mitariri byandya, bya kunwa na nswaakulu nyutu ya bitsuumbu-bitsuumbu, mi bari baha mya kubvumina natee mu ntaangu ya nyiingulu misamu.

¹¹Kasi Kiristo wayisa bunu mukuutu bangaanga-nzaambi, mu bitotolo byabibwete byeki haaka. Nde wakoto mu musaampu wubvuriri bunene, na wubvuriri kuyirima, wahele kuyirima mu myooko mya baatu, haho lo ti wahele kuba wa biyiriki bya nsi yimayi.

¹²Nde wakoto mbala mosi mu nzo yangisi, kari na makila ma bantaba na ma bangoombo ko, ngo na makila ma nde-meene, mu kutamuna nkuululu yahele manunu.

¹³Bukuri, mbuti makila ma bantaba, na ma bangoombo, na lufutu lwa mukasi ngoombo, lu bayitila ha yulu basumuka, lubahaanaa bungisi mu ntoono nsyemusunu ya muswiini,

¹⁴lo makila ma Kiristo, waheeri nyutu yaandi yahele na kipfuumi, mu Mpeeve ya mantaangu momanso kuri Nzaambi, mabvuriri kutsyeemese nsimunu yeetu mu biyiriki byafwa, mu kusalila Nzaambi yamwooyo.

¹⁵Mu didyo, nde kari munkabu-kati wa lulelusunu lwamoono, mpisi heki lufwa lwaandi, bu lwayisa mu kukuula baatu mu lumvuki lu basiiri, mu lulelusunu lwatete, babo bayuka mbila, bataambula Saala dya mantaangu momanso, di bari babasiila.

¹⁶Bukuri haho hari misiku mya muutu mu masaala, diri mufunu mu kusoongo kuri ti muutu wunde wafwa.

¹⁷Mukwongo, misiku mya muutu mu masaala ndaandu kuri muutu wunde weki wafwa, ngo habaanaa muutu wakiri mwooyo, lo miri ndaandu ko.

¹⁸Mu didyo, lulelusunu lwatete, ka lwaketi kubaandika kwahele makila ko.

¹⁹Moose, kamanaa kutaanga ntumu lumosi-lumosi, bunu buri mu mangisi, ha busu bwa bobanso, ha keki holaana makila ma baala ba bangoombo na ma bantaba, mu kusaanga na maampa, na kuholo kimpaala kya isopi kyakaanga myoosi mya bibulu myabeenge; tumi ha kanyaka mo ha yulu mukaanda mangisi, na ha yulu baatu bobanso,

²⁰na waleele ti: «Mamama ngo makila ma lulelusunu lwatuma Nzaambi mu beenu.»

²¹Nde wanyaka se makila ha yulu musaampu na ha yulu bisalulu byobinso bya lusaambulu.

²²Byobinso mpaangi-pe biri byatsyeemusu mu makila, bunu bu loombolo mangisi, na ka kuri mpemisi ko, kwahele nsyamukunu makila.

²³Ngo mbuti bibyo byafwanikina na bitotolo bya ku yulu byatsyeemusu mu nzila yiyo, lo diri mufunu ti bitotolo bya ku yulu byo-meene, biba byatsyeemusu mu nzusulu bibulu bibvuriri bubwete byaha mu kikabu.

²⁴Mukwongo, Kiristo wahele kukoto mu manzo mangisi, matuungu mu myooko mya baatu, mari kini kifwaani kya nzo yangisi yangwanwa, ngo wakoto mu yulu dyo-meene, mu kumonokono lumalu ha busu bwa Nzaambi mu ntoono beetu.

²⁵Kari mu kuri ti kaha nyutu yaandi mbala dzalaka ko, bu koosaanaa mukuutu bangaanga-nzaambi wukotaa mu nzo yangisi Mpisi mubvu, na makila mahele kuba ma nde-meene.

²⁶Bukuri, lo nde keti kumonaa mpasi mbala dzalaka, kuholosono kwayirimini nsi. Ngo kasi mu lumalu, Kiristo wamonokono mbala mosi, ku manunu ntaangu, mu kuyaala masumu mu mpeelu nyutu ya nde-meene bunu kikabu.

²⁷Ngo bukuri dyadzeengu kuri ti, baatu bafwa mbala mosi kitsu, ha mambisa haho, mutsuundu wiisiri,

²⁸bunubwo se, Kiristo bamuha mu kikabu mbala mosi, mu kuyusula masumu ma fundu-fundu dya baatu, na kumonokono lwadzoolo kwahele masumu, kuri babo bamukiinga, mpisi kabaha mvuukulu.