Read Beembe Yak 3 Bible Online

Yak 3 - Beembe bible

Yak 3

¹Bampaangi baami, yaa luba balaka mu kweyikisa ko, yabeenu ti mutsuundu wa beetu bayikisi sa kabvulila makwa.

²Mukwongo, beetu-banso turi mu kwebwa kwalaka. Mbuti muutu wahele kubwa mu nzoonsulu, lo wunde muutu wakuka, wubangisina kutwaalisa nyutu yaandi yoyinso.

³Mbuti tukaangaana kisuunguki mu minwa mya makavaalu, lo mu kuri ti batumuma kuri beetu, na tutwaalisaa manyutu ma bo momanso.

⁴Monee se mabwaatu, bwooso mabeele mu bunene, masindukulu mu biteembu bya makwa, lo mo mari matwaalusu mu mwaa kisuunguki kyantele, kunu kutiiri munati.

⁵Bunubwo se, ludima mwaa-kinamu kyantele, ngo kikwebilika mu bitotolo byabinene. Monee meti! Mwaa-mbaawu yantele yikooyokaa musitu bwooso kabeele mu bunene

⁶Ludima se luri bunu mbaawu, nsi ya bubayi; ludima lwasuusu ha kakati dya binamu byeetu, lusumunaa nyutu yoyinso, na luyokaa kidziingu kyokinso, bu luri lwanamuku mu mbaawu lubila.

⁷Mukwongo, mpisi kitsuumbu kya bibulu bya ku bitiiti, kya banoni, kya banyoko, na kya bibulu bya mu maampa, kyayukusu na kyayeki kyayukusu kuri kitsuumbu kya muutu;

⁸Ngo ludima, kuri ti mosi mu baatu, wubangisina kuluyukusu ko, bubi buri bwakubwiisila pe, lwaluula mu misya midzusaana.

⁹Mu lwo, tusakumunaa Mfumu wuri Taata; na mu lwo se tubulilaa baatu mampopi, bari mu kifwaani kya Nzaambi.

¹⁰Mu munwa ndemosi mupala lusakumunu na mampopi. Bampaangi baami, bwahele kuyelemene ti buba bubwo.

¹¹Buri mu nto yomosi, lo mukeri palisiri maampa madzuuna na mankari?

¹²Bampaangi baami, buri mungenge lo butiri mfilu, bunu pe mubviinya lo butiri ngenge? Pele, nto ya maampa ma mungwa, ka yitsiitsa kupalisa maampa madzuuna ko?

¹³Nani mu beenu wuri ngaa-madyeele na wayika? Kasoongo dyo mu ndyaatulu yayibwete, na mu biyiriki byaandi bya kidzuunu na bya madyeele.

¹⁴Ngo mbuti beenu luri na musoki wankari, na mpeeve ya nwanusunu mu mitima myeenu, lo yaa luba na masiiku ko, na yaa lwekitula ngwanwa mu mpya ko.

¹⁵Madyeele ma bubwo, makoofumunaa ku yulu ko, ngo kasi ma nsi, ma kimuutu na ma mampeeve mamabi.

¹⁶Mukwongo, haho hari musoki na nwanusunu, hanaho se hari kisaangila, na nsalulu yoyinso yayibi.

¹⁷Ngo kasi madyeele ma ku yulu, hatete mari nkati matsyeemeke, tumi ma kiyeengi, madzuuna, matumuma, maluula mu ngebe na mu bimbutu byabibwete, mahele na munsoori na mahele na bumpitu-bumpyoongo.

¹⁸Kimbutu kya nsungumunu kiri kyakunu mu kiyeengi, kuri babo basalila kiyeengi.