Read Beembe Yak 5 Bible Online

Yak 5 - Beembe bible

Yak 5

¹Haheki, mu lu kuri beenu bisina, dileenu, fulee misaakulu mu mpasi dzeenu dzi lubwilikila.

²Busina bwa beenu bwasumuka, na binkuta byeenu byeki byadya kuri bansyelisi,

³woolo na mboongo dzeenu byeki byabwilikila nkaa-nkaala, na nkaa-nkaala yiyo sa yalufuunda, na sa yayoko manyutu meenu bunu mbaawu. Beenu lwakutukisi busina mu biluumbu bya mpotulu.

⁴Monee, mufutu bisari byatoriri manseke meenu, wu lwakweeti beenu, wuri mu kufula misaakulu, na nyayulu dza batori dzayukukuni mu makutu ma Mfumu ngaa-mikaangu.

⁵Beenu lwaneti kidziingu kyaluwu ha butoto, na kidziingu mu lwambwe, lwadiisiri manyutu meenu mu kiluumbu kya nzusulu bibulu.

⁶Beenu lwakesiri mukanu, lwadzusiri muutu wahele ntoono, wahele kulutuungukila.

⁷Ngo bampaangi, kiinduseenu mitima, natee nyisulu Mfumu. Monee muhati-manseke, nde wukiingila bimbutu bya butoto bya ntalu, wukiindisaa mutima natee ku katoriri bimbutu bitekesele na bisyeelele.

⁸Beenu se kiindusee mitima, kumisee mitima myeenu, bukuri nyisulu Mfumu yeki bebele.

⁹Bampaangi, yaa lwesilisina minyoongi beenu na beenu ko, mpisi luhele kuba batsuundusu. Monee mutsuundisi telemini ha mweelu.

¹⁰Bampaangi, holeenu kifwaani mu mpasi na mu nkindusulu-mutima ya babikiri badzoonsiri mu nkuumbu ya Mfumu.

¹¹Monee, beetu tuleelaa kuri babo bakuundaa mpasi, ti bari mu lwambwe. Beenu lwayukiri kifiki ka Yobi, na lwamwiini nsukulu yaba yitiiri Mfumu, ti Mfumu waluula mu bundeembu na wubakila ngebe.

¹²Bampaangi baami, tekesele momanso, yaa lwelaba maalu ti mu yulu, ti mu butoto, ti mu maalu makimi ko. Ngo kuri beenu, heehe diba heehe, pele diba pele, mpisi luhele kubwa mu mutsuundu.

¹³Muutu mu beenu kubama kari mu kubama? Kasaambila. Muutu mu kiminu kari? Kayimbila mikuunga.

¹⁴Muutu mu beenu kubeele kari kabeele? Katumisa bakulu ba babakala ba dibuundu, mpisi bamusambikila, na bamukila maasi mu nkuumbu Mfumu.

¹⁵Lusaambulu lwa kanyi sa lwabvuukisa mubeeru, na Mfumu sa kamutelemese; na mbuti beeri wayirika masumu, lo sa kataambula mpemisi.

¹⁶Lomboseneenu mampemisi beenu na beenu, na sambisineenu beenu na beenu, mpisi lutaambula butsiina. Lusaambulu lwa muutu wasuunguma, luri na makwa malaka na lukoosalaa.

¹⁷Eliya waba muutu wuri bitsimi bunu buri beetu. Nde wasaambila mu kukaandika bvula, na bvula yasii kunoko ha butoto ko, mu mibvu mitatu na mangoondo masaamunu.

¹⁸Tumi, nde wabweese kusaambila, na yulu dyanokoso bvula, na butoto bwaha bimbutu byaandi.

¹⁹Bampaangi baami, mbuti mosi mu beenu dziimbiri, na weki la na ngwanwa, na muutu wumubvuturi,

²⁰lo kayaaba ti: wunde wubvutula ngaa-masumu mu nzila yasuunguma, lo sa kabvuukisa muwuumunu nde mu lufwa, na sa kafuka fundu-fundu dya masumu.