Read Beembe 1 Pet 1 Bible Online

1 Pet 1 - Beembe bible

1 Pet 1

¹Petelo, ntumu Yesu Kiristo, kuri babo basoolu, badzakala ku bunzeense, batsamukina mu mansi ma Ponto, Ngalatya, Kapadokya, Asya na Bitinya,

²bunu buri nyaabulu yatekesele ya Taata Nzaambi, mu mpeelu bungisi ya Mpeeve, mu ntumumunu na nyakunu makila ma Yesu Kiristo. Bweese na kiyeengi biba byafunusu kuri beenu!

³Nzaambi, Taayi dya Mfumu yeetu Yesu Kiristo kaba wasakumunu! Nde wuri, bunu buri bunene bwa ngebe dzaandi, watubuta mu mbutukulu yamoono, mu nsiitu dzamwooyo, mu mfulukulu ya Yesu Kiristo mu bafwa,

⁴mu ntoono saala diri dyabiiyaa ko, dyabviimfukaa ko, na dyakitukaa ko, di bari balusweekele mu mayulu,

⁵beenu luri lwakebu mu mpinu dza Nzaambi, mu kanyi, mu ntoono mvuukulu yayirima mu kuba yayabukusu mu ntaangu ya manunu.

⁶Mu didyo, beenu luri mu kiminu, ti hayuku mu lumalu, beenu luyelemini kubama mu mwaa-ntaangu yantele, mu ntoono nsindukulu dza bitsuumbu-bitsuumbu,

⁷Mpisi heki nsiitsulu ya kanyi dyeenu, yibvuriri ntalu, ti na woolo dyatsyeemese mu mbaawu kasi difuukaana, yibaka ndaandu ya nsiikulu, ya nkeembu na ya lukiinsu, mu ntaangu yiyabakana Yesu Kiristo.

⁸Beenu lutiiri wunde wuri lwasii kumumono ko, na mu lumalu kwahele kumumono lwasa kanyi mu nde. Beenu luri mu kutirimuka mu kiminu kyahele bwa kuleelele, kya nkeembu,

⁹mu kutaambula ndaandu ya kanyi, ngo mvuukulu ya miheebulu myeenu.

¹⁰Babikiri basaka kuyaaba na bafyongokono musamu wa mvuukulu yiyo, na babikula mu ntoono bweese bwa beenu.

¹¹Bo bafyongokono mu kuyaaba, mu nkya ntaangu bunu pe mu nkya kiteesu, misamu myatekisiri kubayaabisa Mpeeve ya Kiristo miyirima. Misamu mimyo mitariri mpasi dza Kiristo, na munkeembu wukwiisa ha mambisa.

¹²Babayaabisa kuri ti, dyaambu di baba kwesalilaana dyaba diri dya bo-meene ko, ngo dya beenu. Na mu lumalu bayikisi ba Musamu Wamubwete bamwaluyaabisa dyo, mu Mpeeve Yangisi yafumuna ku yulu. Bambasi se batiiri kuyaaba dyaambu didyo.

¹³Hango-nkuumbu, beeneenu balubuka, beeneenu bari na ndiilu na nwiinu byayelemene, sileenu nsiitu dzodzinso mu bweese bu balutwalikila, mu ntaangu yimonokono Yesu Kiristo.

¹⁴Bunu baala bari na bintambukulu, yaa lunama kifwaani kya nyiimunu dza ntaangu yayikulu ko, yi lwaba lwakiri kunsa lubu.

¹⁵Ngo bunu buri wunde waluteele mbila, wuri wangisi, beenu se beenee bangisi mu ndyaatulu yeenu yoyinso.

¹⁶Bukuri diri dyatinu ti: «Beenu sa lwaba bangisi, bukuri me nyiri wangisi.»

¹⁷Na mbuti beenu luteelaa mu lusaambulu ti Taata, wunde wahele na kimpengeki, wutsuundisa muutu-muutu bunu buri biyiriki byaandi, lo dyaatileenu mu kibvumi, mu ntaangu ya kidziingu kyeenu mu nsi ya bunzeense yi,

¹⁸bu luyaari kuri ti, kari mu bitotolo bifuukila ko, mboongo bunu pe woolo, beenu bari balukuula mu ndyaatulu yeenu yabuunu, yi luri lwakondolo kuri bataayi beenu,

¹⁹ngo mu makila mantalu ma Kiristo, mari bunu ma mwaana kimeeme, kyahele na kipfuumi na kyahele na mpita.

²⁰Nde wayabakana tekesele nyirikulu nsi, na wamumonokoso mu ntaangu ya manunu mu ntoono beenu.

²¹Mu nde, beenu lwasa kanyi mu Nzaambi, wamufulukisa mu bafwa, na wamuha nkeembu, kuri heki kanyi dyeenu, na nsiitu yeenu biba mu Nzaambi.

²²Beenu lwatsyeemese miheebulu myeenu mu kutumuma kuri ngwanwa, mu dyaambu dya ntiilu ya kimpaangi, yahele na bumpitu-bumpyoongo. Tilisineenu beenu na beenu kwalaka mu mutima watsyeemeke,

²³bu lwayeki lwabutuka mu mbutukulu yamoono, kari mu mumbutu wubolaa ko, ngo mu wuhelaa kubolo, mu maampu ma mwooyo ma Nzaambi mahelaa kusuka.

²⁴Bukuri «Mpisi muutu wuri bunu kitiiti, na nkeembu yaandi yoyinso yiri bunu kifulu kya kitiiti, kitiiti kikanaa, na kifulu kibwaanaa,

²⁵ngo kasi maampu ma Mfumu madziingulaa mu mantaangu momanso.» Mamo ngo maampu ma bari baluyaabisa bunu Musamu Wamubwete.