Read Beembe 1 Pet 2 Bible Online

1 Pet 2 - Beembe bible

1 Pet 2

¹Ngo looseenu momanso mamabi, momanso mamawunu, bumpitu-bumpyoongo, musoki, na makele.

²Bunu mwaa-baala bansoombo, dilileenu beene dyadibwete, dya maampu ma Nzaambi, mpisi heki mu nde beenu lubuuka mu kubaka mvuukulu,

³mbuti lwabiimbiri ti Mfumu wuri wa mubwete.

⁴Kokosolee kuri nde, tari dyamwooyo dyaloosu kuri baatu, ngo kasi dyasoolu na dyantalu kuri Nzaambi,

⁵na beenu-meene se, bunu matari mamwooyo, beene batuunguma mu nzo ya kimpeeve, mu kuyirika kingaanga kyangisi, mu kuha bikabu byayoku byakimpeeve, byataambulu kuri Nzaambi mu Yesu Kiristo.

⁶Hango-nkuumbu, mu Matinu muri ti: «Monee, me nyisuusa mu Syoni tari dya ha kuumbu dyasoolu na dyantalu, na mpisi wusiila kanyi mu dyo, lo kafwa nsoni ko.»

⁷Hango, lukiinsu luba kuri beenu lwasa kanyi; ngo kasi kuri babo bahele kusa kanyi, «Tari dyaloosiri batuungi, dyeki dyanguri ha kuumbu.»

⁸Na dyeki: «Tari dya mbumukunu makya, na dya mbwiilulu makubu.» Bo bari mu kubuminaa makya mu dyo, bukuri bahele kusa kanyi mu maampu, na mu bubwo bari babataasila.

⁹Ngo kasi beenu, luri kitsuumbu kyasoolu, kabu dya bangaanga-nzaambi ba mbyaasi, kaanda dyangisi, baatu babakama kuri Nzaambi, mu kweyaabisa mamabwe, ma wunde waluteele mbila, mu kupala mu mampimbisi na kukoto mu buungi bwaandi bwansisi.

¹⁰Beenu bari, mu ntaangu yayikulu, lwasii ba mukaangu baatu ko, kasi mu lumalu beenu lweki mukaangu baatu ba Nzaambi. Mu ntaangu yayikulu, Nzaambi kasii kulumwiinina ngebe ko, kasi mu lumalu nde wulumonono ngebe.

¹¹Banduku ba mutima, me nyilusyaamisa bunu minzakikiri miri ku bunzeense, mu kukaanga mutima, mu kuhele kubwa mu nyiimunu dza muswinyi, dzikwenwaanisa muheebulu.

¹²Beenee na ndyaatulu yayibwete ha kakati dya bangooyi, mpisi heki ti hayuku bakwelufutukila misamu, bunu bayiriki ba mamabi, lo bo bamono biyiriki byeenu byabibwe, na bakeembise Nzaambi mu kiluumbu ki kakwiisa kulumono.

¹³Beenee batumuma kuri mpisi lutumu lwa baatu, mu ntoono Mfumu, ti hayuku kuri mbyaasi wubvuriri lutumu,

¹⁴ti hayuku kuri batumi, bakari kaheeke mu kweseembe bayiriki ba mamabi, bunu pe mu kwesiika bayiriki ba mamabwe.

¹⁵Bukuri kutya kwa Nzaambi bumabu kuri: mu nyirikulu mamabwe, beenu lukaanga minwa mya baatu ba madzeeke, bahele na nyaabulu.

¹⁶Beenee bunu baatu bari na bunsaalisi, na bunsaalisi bubwo, yaa buba bunu nsaanda mu kwefuka bubi ko; ngo beenee bunu bankutu ba Nzaambi.

¹⁷Kiinseenu baatu bobanso, tyeeneenu bampaangi ba luri mu dibuundu, bvuminee Nzaambi, kiinseenu mbyaasi.

¹⁸Bisari bya mu nzo, biba byatumuma mu kibvumi kyokinso, kuri bamfumu baaku; kari kunu kuri bari na mutima wamubwete, na bari na bundeembu ko, ngo se na kuri bari mutima wamubi.

¹⁹Bukuri bweese buri, mbuti mu ntoono kibvumi mu Nzaambi, muutu wukuundaa mpasi mu kubama kwahele kibila.

²⁰Mukwongo, nkya mvuumfu yiri, mbuti beenu lukuunda nseembulu, dza mamabi ma luyirikiri? Ngo mbuti luyirika mamabwe na lukuundiri mpasi, lo bubwo bweese ha busu bwa Nzaambi.

²¹Mukwongo, mu bubwo bari baluteele mbila, bukuri Kiristo se wabamini mu ntoono beenu; nde walusisikila kifwaani, mpisi heki beenu lunama mu bitaambi byaandi.

²²Nde wuri kasii yirika masumu ko, na mu munwa waandi mwasii ba mawunu ko.

²³Nde bamutuka, ngo kasii bvutula kitari ko; wamono mpasi, ngo kasii ŋaŋa ko, kasi wayekiri nyutu kuri mutsuundisi wasuunguma.

²⁴Mu nyutu yaandi, nde wanata masumu meetu ha yulu muti, mpisi heki bu tufwiiri mu masumu, tuba mwooyo mu ntoono nsungumunu. Mu biwa byaandi beenu luri lwatsinukusu.

²⁵Mukwongo, beenu lwaba bunu bimeeme bikweyiima; ngo kasi mu lumalu, lumwaabvutuka kuri mutari na mukebi miheebulu myeenu.