Read Beembe 2 Pet 1 Bible Online

2 Pet 1 - Beembe bible

2 Pet 1

¹Simehoni Petelo, nkutu na ntumu Yesu Kiristo, kuri babo bataambula kanyi diri ntalu yo yimosi na dya beetu, mu nsungumunu ya Nzaambi yeetu, na ya Mubvuukisi Yesu Kiristo.

²Bweese na kiyeengi biba byafunusu kuri beenu, mu nyaabulu yangwanwa ya Nzaambi, na ya Yesu Mfumu yeetu.

³Mpinu dza kinzaambi kyaandi, dzatuha byobinso biri mufunu mu kidziingu na kinzaambi, mu nyaabulu ya ngwanwa ya wunde watuteele mbila, mu nkeembu yaandi na mu makwa maandi.

⁴Mu byo bari bamusiila nsiilulu dzantalu na dzibvuriri bunene, mpisi heki mu dzo, beenu luba kintwaari mu nzelu ya kinzaambi, mu kubata nyiimunu dzadzibi dziri mu nsi.

⁵Mu didyo, bvuleenu kusalila makwa momanso. Bweeseenu ha yulu kanyi dyeenu, nzelu yayibwete, ha yulu nzelu yayibwete, nyaabulu,

⁶ha yulu nyaabulu, nkebulu nyutu, ha yulu nkebulu nyutu, kifiki, ha yulu kifiki, kinzaambi,

⁷ha yulu kinzaambi, nzala-baatu, ha yulu nzala-baatu, ntiilu.

⁸Mukwongo, lubaanaa luri na mamo, na mabuukila mu beenu, lo maluha bubolo ko, na malusa bisita ko, mu nyaabulu Mfumu yeetu Yesu Kiristo;

⁹ngo muutu wahele na mamo, lo wafwa miisu, bunu pe wahele kwemono biri ku la, wayeki wadzimbikina nsyemukunu mu masumu maandi mamakulu.

¹⁰Hango-nkuumbu, bampaangi, bvuleenu kusalila makwa mu kukumisa mbila yi bari baluteele, na nsoolulu yibari balusoolo, bukuri lubaana luyirika mamo, lo luri mbwiilulu mu mamabi ko.

¹¹Mukwongo, mu bubwo, nkotulu mu Kimfumu kyahele manunu, kya Mfumu na Mubvuukisi weetu Yesu Kiristo, yiba yaha kuri beenu mu bunsaalisi.

¹²Hango-nkuumbu, me nyelemini kwelubaambula mwooyo mu misamu mimyo mpisi ntaangu, ti bukuri lumiyaari kwaandi, na lwayeki lwakaangama mu ngwanwa ya lumalu.

¹³Me nyitsima ti diri dyadibwete, ti me nyilubaambulaa mwooyo mpisi luba naana, mu ntaangu yoyinso yi nyakiri me mu musaampu wumawu,

¹⁴bu nyaari ti ntaangu ya kuyekele musaampu waami yeki bebele, bunu bwa nsoongiri Mfumu yeetu Yesu Kiristo.

¹⁵Me sa nsalila makwa, mpisi heki, ha mambisa ma mfwiilu yaami, beenu lubambukilaa misamu mimyo mwooyo, mu mpisi mpwaani yi lubaka.

¹⁶Mukwongo, kari mu kwenama bimpa byabalu mu madyeele ko, beetu turi twaluyaabisila mpinu na monokunu ya Mfumu yeetu Yesu Kiristo, ngo beetu-meene, twaba bambaangi bamono mu miisu bunene bwaandi.

¹⁷Mukwongo, nde wataamburi lukiinsu na nkeembu kuri Taata Nzaambi. Mbeembu yayukukuna kuri nde mu nkeembu yayinene ti: «Wumawu ngo mwaana waami wa mutima, mu nde me nyimonaa kiminu.»

¹⁸Mbeembu yiyo, beetu twayiyuka yafumuna ku yulu, bu twaba na nde ha yulu mulaandu wangisi.

¹⁹Na beetu turi na maampu ma mbikululu mabvuriri nsiitu. Beenu luri mu kuyirikaa bwabubwe mu kusa madyeele mu mo, bunu mu mwiinda wukoohaanaa buungi ha kibeendu kya mampimbisi, natee kukya bwiisi, na kupalila mbwetete ya kipari mu mitima myeenu.

²⁰Tekeseleenu kuyaaba dyo ti: mpisi mbikululu ya Matinu, ka yitsiitsa kuba yabaangulu bunu bu tiiriri muutu ko.

²¹Mukwongo, mbikululu kari mu ntiilu ya baatu dziri dzayisa ko, ngo kasi mu ntwalusulu ya Mpeeve Yangisi, baatu bari badzoonsolo mu nkuumbu ya Nzaambi.