Read Beembe 1 Yow 1 Bible Online

1 Yow 1 - Beembe bible

1 Yow 1

¹Mamo maba munu mbandukulu, ma turi twayuka, ma turi twamono mu miisu myeetu, ma turi twakengese na ma turi twabelemene mu myooko myeetu, mu ntoono maampu ma kidziingu,

²kidziingu kikyo kyamonikini, beetu twakimono, turi mu kuta kimbaangi, tuluyaabisa kidziingu kyahele manunu, kyaba kuri Taata na kyamonikini kuri beetu.

³Mamo ma turi twamono, ma turi twayuka, tuyaabisa mo se kuri beenu, mpisi heki beenu se luba mu kintwaari na beetu. Ngo kintwaari kyeetu, kintwaari na Taata na Mwaana waandi Yesu Kiristo.

⁴Beetu turi mu kutina mamama, mpisi heki kiminu kyeetu kiba kyakuka.

⁵Wumawu ngo mukeensu wu turi twayuka kuri nde, na wu turi mu kuyaabisa kuri beenu: Nzaambi ngo buungi, na mu nde, mwahele mampimbisi ti mamosi.

⁶Mbuti tuleelaa ti turi kintwaari na nde, ngo tudyaatila kunsa mampimbisi, lo tufuta mpya, na ka twasalilaa ngwanwa ko;

⁷mbuti beetu tudyaatila kunsa buungi, lo turi mu kintwaari beetu na beetu, na makila ma Yesu, Mwaana waandi, matutsyeemisaa mu mpisi sumu.

⁸Mbuti tuleeriri ti twahele na masumu, lo tuwunukunaa beetu-meene, na ngwanwa ka yiri mu beetu ko.

⁹Mbuti tutambukilaa masumu meetu, lo nde wuri wakwiikama na wasuunguma, mu kutuhemesene masumu meetu, na mu kututsyeemese mu mpisi lumvuki.

¹⁰Mbuti tuleelaa ti twahele na masumu, lo tusaanaa kuri ti Nzaambi kaba ngaa-mpya, na maampu maandi ka mari mu beetu ko.