Read Beembe 1 Yow 2 Bible Online

1 Yow 2 - Beembe bible

1 Yow 2

¹Mwaa-baala baami, me nyilutinina mamama, mpisi luhele kubwa mu masumu. Ngo mbuti muutu bwiiri mu masumu, lo turi na Nkariri kuri Taata, ngo Kiristo Yesu, ngaa-kusuunguma.

²Nde ngo kikori mu ntoono masumu meetu, kari munu mu masumu ma beetu ko, ngo se mu masumu ma nsi yansiina.

³Mu dimadi beetu tubakulaa ti twayeki twamuyaaba, mbuti tukebaa ntumu dzaandi.

⁴Mpisi wunde wuleelaa ti: «Me nyayeki nyamuyaaba», ngo wahele kukebe ntumu dzaandi, lo nde ngaa-mpya, na mu nde ngwanwa yo pe.

⁵Wunde wukebaa maampu maandi, lo ngwanwa mu nde, ntiilu ya Nzaambi yayeki yakuka. Mu didyo, beetu tuyaabilaa ti turi mu nde.

⁶Wunde wuleelaa ti wasa kikuundi mu nde, lo yelemini kudyaatila se, bunu bu kadyaatiri nde.

⁷Banduku ba mutima, me nyahele kulutinina lutumu lwamoono; ngo kasi lutumu lwalukulu lu lwataamburi beenu, kuholosono kunu mbandukulu. Lutumu lwalukulu lulwo ngo maampu ma luri lwayuka.

⁸Mukwongo, lutumu lwamoono me nyiri mu kulutinina; didyo diri dyangwanwa mu nde na mu beenu, bukuri mampimbisi mari mu kuluta, na buungi bwangwanwa bweki mu kuseme.

⁹Wunde wuleelaa ti wuri kunsa buungi, ngo wubelaa mpaangi yaandi, lo natee lu nde wuri kunsa mampimbisi.

¹⁰Wunde wutyaanaa mpaangi yaandi, lo wasa kikuundi kunsa buungi, na mu nde mpwaani ya kubwa mu masumu yo pe.

¹¹Wunde wubelaa mpaangi yaandi, lo wuri kunsa mampimbisi, wukwedyaatila kunsa mampimbisi, na wahele kuyaaba ku kakweyende, bukuri mampimbisi mamudzusa miisu.

¹²Me nyitinina kuri beenu mwaa-baala, bukuri masumu ma beenu mayeki mahemusunu, mu ntoono nkuumbu yaandi.

¹³Me nyitinina kuri beenu bataata, bukuri beenu lwayeki lwamuyaaba kuholosono kunu mbandukulu. Me nyitinina kuri beenu bituuti, bukuri beenu lwabwiisiri Ngaa-bubi.

¹⁴Me nyatinini kuri beenu mwaa-baala, bukuri beenu lwayeki lwayaaba Taata. Me nyatinini kuri beenu bataata, bukuri beenu lwayeki lwamuyaaba kuholosono kunu mbandukulu. Me nyatinini kuri beenu bituuti bukuri beenu luri bangaa-makwa, na maampu ma Nzaambi masa kikuundi mu beenu, na beenu lwabwiisiri Ngaa-bubi.

¹⁵Yaa lutya nsi ko, ti bitotolo biri mu nsi. Mbuti muutu tiiri nsi, lo kutya kwa Taata kwahele mu nde;

¹⁶bukuri byobinso biri mu nsi, nyiimunu dza muswinyi, nyiimunu dza miisu na masiiku mu bya kidziingu, biri bya Taata ko, ngo kasi bya nsi.

¹⁷Nsi yiri mu kuluta na nyiimunu dzaandi; ngo wunde wuyirikaa kutya kwa Nzaambi, lo wuri na kidziingu mantaangu momanso.

¹⁸Mwaa-baala, ki ngo kilookolo kya mpotulu, bunu bu lwayukiri ti mutaatu Kiristo wuri mu kwiisa, mu lumalu bataatu ba Kiristo balaka bamwaakwiisa; mu didyo beetu tuyaari ti ki ngo kilookolo kya mpotulu.

¹⁹Bo bapariri ha kakati dya beetu, ngo basii kuba ba beetu ko; bukuri mbuti ngo, baba ba beetu, nkani baketi kudzakala na beetu. Bo bapariri mpisi diba dyayabakana ti bobanso bari ba beetu ko.

²⁰Beenu lwataambula nkilulu kuri Wangisi, na beenu bobanso luyaari.

²¹Me nyalutinini kari bukuri ti beenu lwahele kuyaaba ngwanwa ko, ngo bukuri beenu luyiyaari, na bukuri kuri mpya ti dzimosi ko, dzifumunaa kunsa ngwanwa.

²²Na wuri ngaa-mpya, mbuti ka wunde wutunaa ti Yesu kari Kiristo ko? Wunde ngo mutaatu Kiristo, wutunaa Taata na Mwaana.

²³Mpisi wunde wutunaa Mwaana, lo kari na Taata ko. Wutaambulaa Mwaana, lo wuri na Taata se.

²⁴Mamo ma lwayukiri kuholosono kunu mbandukulu, hemese masa kikuundi mu beenu. Mbuti mamo ma lwayukiri kuholosono kunu mbandukulu, masii kikuundi mu beenu, lo beenu se sa lwasa kikuundi mu Mwaana na mu Taata.

²⁵Na lu ngo lusiilulu lu kari kalusiila, kidziingu kya mantaangu momanso.

²⁶Me nyalutinini mamo mu dyaambu dya bakweludziimbisa.

²⁷Ngo beenu, nkilulu yi luri lwataambula kuri nde yasa kikuundi mu beenu, na lwahele na nzala kuri ti muutu kaluyikisa; kasi nkilulu yaandi yiri mu kuluyikisa mu momanso, na yiri yangwanwa, ka yiri yampya ko, bunu bu yiri mu kuluyikisa, seenee kikuundi mu nde.

²⁸Na mu lumalu, mwaa-baala, seenee kikuundi mu nde. Mpisi heki, mbuti nde monikini, lo tubeeneenu na nsiitu, na tuhelee kufwa nsoni la na nde, mu ntaangu ya nyisulu yaandi.

²⁹Mbuti beenu luyaari ti nde wasuunguma, lo yabee se ti mpisi wunde wusalilaa nsungumunu, lo wabutuka mu nde.