Read Beembe 1 Yow 5 Bible Online

1 Yow 5 - Beembe bible

1 Yow 5

¹Mpisi wunde wusa kanyi ti Yesu ngo Kiristo, lo nde wabutuka kuri Nzaambi, na mpisi wunde wutiiri mubuti, lo katya se wabutuka kuri nde.

²Beetu tuyaaba ti tutiiri baala ba Nzaambi, mu ntaangu yi tukootyaanaa Nzaambi, na yi tusalilaa ntumu dzaandi.

³Mukwongo, ntiilu ya Nzaambi yiri kuri ti, tukebee ntumu dzaandi; ngo ntumu dzaandi dzahele kuleme,

⁴bukuri mpisi wabutuka kuri Nzaambi, lo waluuluka mu nsi, na ndulukulu ya kuluuluka mu nsi, ngo kanyi dyeetu.

⁵Na waluuluka mu nsi, mbuti ka wunde wasiila kanyi, ti Yesu ngo Mwaana Nzaambi ko?

⁶Yesu Kiristo ngo wunde wayisiri na maampa na makila, kari na mani maampa kitsu ko, ngo na maampa na makila; Mpeeve ngo muteeri kimbaangi, bukuri Mpeeve ngo ngwanwa.

⁷Bambaangi batatu bari:

⁸Mpeeve, maampa na makila, na bo batatu bari kintwaari mu kimbaangi kyokimosi.

⁹Mbuti tutaambulaa kimbaangi kya baatu, lo kimbaangi kya Nzaambi kibvuriri bunene; bukuri kimaki ngo kimbaangi kya Nzaambi, ki kari kata mu Mwaana waandi.

¹⁰Wunde wusiilaa kanyi mu Mwaana Nzaambi, wuri na kimbaangi mu nde-meene. Wunde wuhelaa kusiila kanyi mu Nzaambi, lo wusanaa kuri ti Nzaambi kaba ngaa-mpya, bukuri wahele kutaambula kimbaangi kya Nzaambi, ki kari kata mu Mwaana waandi.

¹¹Kimbaangi kikyo ngo ki: Nzaambi watuha kidziingu kya mantaangu momanso, na kidziingu kikyo kiri mu Mwaana waandi.

¹²Wunde wuri na Mwaana, wuri na kidziingu; wunde wahele na Mwaana Nzaambi, wahele na kidziingu.

¹³Me nyalutinini mamo mpisi luyaaba ti, beenu lusiila kanyi mu nkuumbu Mwaana Nzaambi, luri na kidziingu kya mantaangu momanso.

¹⁴Dzimadzi ngo nsiitu dzi turi na dzo mu nde, mbuti tumuloombiri kitotolo, bunu buri kutya kwaandi, lo nde wutuywiilaana.

¹⁵Na mbuti tuyaari ti nde wutuywiilaa, lo tuyaari se ti tutaambulaa bibyo bi tumuloombaa.

¹⁶Mbuti muutu wumono mpaangi yaandi, wuyirika masumu mahele kunata ku lufwa, lo kaloombo, na Nzaambi sa kaha kidziingu kuri mpaangi yiyo, kuri babo bayirikaa masumu mahele kunata ku lufwa. Kuri sumu dinataa ku lufwa; ngo kari mu didyo ko me nyituma ti kasaambila.

¹⁷Mpisi kuhele kwa nsungumunu masumu; ngo kuri masumu mahelaa kunata ku lufwa.

¹⁸Tuyaari ti mpisi wabutuka kuri Nzaambi, lo kayirikaa masumu ko, bukuri Mwaana Nzaambi wumukebaa, na Ngaa-bubi kari mbelemene nde ko.

¹⁹Tuyaari ti beetu turi baatu ba Nzaambi, na nsi yoyinso yiri kunsa bubi.

²⁰Ngo kasi tuyaari ti, Mwaana Nzaambi wayisa, na watuha madyeele mu kuyaaba Wangwanwa; na turi kunsa Wangwanwa, mu Mwaana waandi, Yesu Kiristo. Nde wuri Nzaambi yangwanwa, na kidziingu kya mantaangu momanso.

²¹Mwaa-baala, seenee madyeele beenu-meene mu ntoono biteki.