Read Beembe 3 Yow 1 Bible Online

3 Yow 1 - Beembe bible

3 Yow 1

¹Me Mukulu-bakala, kuri Ngayo nduku ya mutima, yi ntiiri mu ngwanwa.

²Nduku ya mutima, me nyikutiisa ti ye baanguka mu myominso, na ba wamutsiina, bunu bwabaanguka se muheebulu waaku.

³Mukwongo, me nyankeembiri kwalaka, mu bampaangi bayisiri na mu kimbaangi ki bateeri mu ye mu ngwanwa, kuri ti ye wukwedyaatila mu ngwanwa.

⁴Kiminu kya me kibvuriri bunene, mu kuyuka ti baala ba me, ba kwedyaatila mu ngwanwa.

⁵Nduku ya mutima, ye wuri mu kwesala mu nkwikumunu, mu ma wuri mu kweyirika mu bampaangi, na bunubwo se mu banzeense.

⁶Bo bateeriri ye kimbaangi, ha busu bwa Dibuundu, mu ntiilu yi wuri na yo. Ye yelemini kubaha bi bari na nzala byo, mu budyeengi bwa bo, mu kiteesu kyayelemene mu Nzaambi.

⁷Mukwongo, bo bayensikiri mu nkuumbu, kwahele kutaambula kitotolo ti kimosi kuri makaanda.

⁸Mu didyo, beetu tuyelemini kutaambula ba bubwo, mpisi heki tuba bakwesala kintwaari mu ntoono ngwanwa.

⁹Me nyatinini mwaa mantoono kuri dibuundu; ngo kasi Dyotelefe, wutiiri kweba watete mu bo, wahele kututaambula.

¹⁰Hango-nkuumbu, mbuti me nyiisiri, lo sa nyamubaambula mwooyo, mu biyiriki byaandi, bi kari mu kweyirika: nzoonsulu dzadzibi, dzabudzeke mu beetu; kiminu bu kiheriri kukuka mu mamo, nde wubisa kutaambula bampaangi; na batiiri kwaaku kwetaambula bampaangi, nde wukwebakabukisa na wubapalisa mu dibuundu.

¹¹Nduku ya mutima, yaa wesombosolo mamabi ko; ngo sombosolo mamabwe. Wunde wusalilaa mamabwe wuri wa Nzaambi, na wunde wusalilaa mamabi, lo kamwii Nzaambi ko.

¹²Baatu bobanso bateeriri Demeteryo kimbaangi kyakibwe. Ngwanwa yo-meene se yiri mu kumuteele kimbaangi. Beetu se tumuteele kimbaangi, na ye yaari ti kimbaangi kyeetu kyangwanwa.

¹³Mbee kwaandi na myalaka mya kukutinina. Ngo nyahele kutya kusalila ntiinta na lusala.

¹⁴Me nyiri na nsiitu, ti kidzika kyantele mbee nyikumwiini, na sa twadzoonsono kuri tutalisina mu miisu na miisu.

¹⁵Hemese kiyeengi kiba na ye! Banduku bakuheekiri mboto. Ye se ha mboto kuri banduku, muutu-muutu mu nkuumbu yaandi.