Read Beembe Yud 1 Bible Online

Yud 1 - Beembe bible

Yud 1

¹Yuda, nkutu Yesu Kiristo, mpaangi Yakobo, kuri babo ba bari bateele mbila, batya mu Taayi Nzaambi, na ba bari bakebe mu Yesu Kiristo.

²Hemese ngebe, kiyeengi na ntiilu bya Nzaambi, biba kuri beenu na fundu-fundu.

³Banduku ba mutima, me mbeeri kwaandi na musoongo walaka mu kulutinina, mu dyaambu dya mvuukulu yeetu ya kintwaari, ngo mwiini mufunu mu kulutinina, mpisi nyilusyaamisa mu kunwaana mu ntoono kanyi, di bari bayakisa kwakinkulu kuri bangisi.

⁴Mukwongo, baatu babamosi bayolomikini mu nsweeki, bari kuholosono na kidzika, batekesele kubatina mankuumbu mu mutsuundu wunde. Bo ngo bangooyi, bakwekitula bweese bwa Nzaambi yeetu mu buyala, na bakwetuna wunde wuri ndemosi Mutumi na Mfumu yeetu, Yesu Kiristo.

⁵Me ntiiri kulubaambula mwooyo mu momanso ma luyaari ti, Mfumu kamanaa kubvuukisa lwo lumosi, kaanda ku nsi ya Ngipiti, ha lumbisa haho, nde wafuukisa bari basii kusa kanyi ko.

⁶Bambasi bari basii kebe kibeendu kya bo-meene ko, ngo basisiri kikuundi kya bo-meene, nde wabawuunguka mu bikonyi bya bibvu ngo bibvu, kunsa mampimbisi, mu kiluumbu kyakinene kya mutsuundu.

⁷Bunu buri Sodoma na Ngomora na mabvula ma badyengekele, masariri buyala bunu bo, mu kiteesu kyokimosi, na banemi bari na manyutu ma kinzeri kikimi, bo bari mu kifwaani kya baatu babwiilikila maseembu ma mbaawu ya mantaangu momanso.

⁸Baatu bamaba se bwobumosi, bakwesa biwobiri, hamosi bakwesumuna manyutu, hakaka bakwenyaafuna lutumu, na bakwesaana bambasi bankeembu.

⁹Ngo kasi, Mikaheli mbasi ya yikuutu, ha baba kalakanaa bo na dyabulu, mu kukaangina nyutu Moose, kasii tya kumuteesele mya nsaanunu ko, ngo nde bu kamuleeriri ti: "Mfumu kakuseembe!"

¹⁰Ngo bamaba, hamosi bakwesaana myominso miri bahele kuyaaba, hakaka bakwefuuka mu myominso mi bakweyaabila mu kimuutu, bunu bibulu byahele na madyeele.

¹¹Kyaari kuri bo, bukuri banemi nzila ya Kayini, bo bayekimini mu mpumukunu ya Balaami mu ntoono mufutu, na bafuukiri kunsa tungu dya Kore.

¹²Bamaba ngo bo, bangaa-kisaangila, kunsa ndiilu yeenu ya kimpaangi, bakwekeembe mu ndiilu ya mawaamba kwahele boomo, bakwebuungula manyutu ma bo-meene, bo ngo matuti mahele maampa, makweheembeke mu kiteembu, miti mya manunu ndoolo, myahele na bimbutu, myafwa mfwa dzoolo, myataabuka.

¹³Bo ngo mipaku mya mubu mya kibakala, mitoombolaa fula dya nsoni dzaaku, bambwetete bakweyiima, ba bari bawungukila, mampimbisi ma bubokoro mu mantaangu momanso.

¹⁴Mu bo, Enoki, wansaamu kubandikila mu Adami, kaba leele ti: «Mono, Mfumu wayisiri na fundu-fundu dya bangisi baandi,

¹⁵mu kutsuundisa baatu bobanso, na kusa kuri ti babakula biyiriki byaaku bya bungooyi, mu ntoono misamu mikolo, mya muteesele bangooyi bangaa-masumu.»

¹⁶Bo ngo bakwemunguta, bahele kumono kiminu mu kiteesu kyaaku, bakwedyaatila bunu buri nyiimunu dzaaku, na minwa mikwedzoonsolo mu masiiku, na bakwesiikila baatu mu ndaandu.

¹⁷Ngo kasi, beenu banduku ba mutima, baambukee mwooyo, mu maampu matekisiri kuleele bantumu, ba Mfumu yeetu Yesu Kiristo.

¹⁸Bo baba leelaa kuri beenu ti: «Kumanunu ntaangu, sa kwaba bangaa-munsiku bakwedyaatila bunu buri nyiimunu dzaaku, dza bangooyi.»

¹⁹Babo ngo bakwekotoso nkabunu, bakwedyaatila bunu bibulu, na bahele na Mpeeve.

²⁰Ngo beenu, banduku ba mutima, tuungumeenu beenu-mee ha yulu kanyi dyeenu dyangisi na ngisi, na saambileenu mu Mpeeve Yangisi.

²¹Beenu-meene kebee manyutu kunsa ntiilu ya Nzaambi, bu luri mu kwekiingila ngebe dza Mfumu yeetu Yesu Kiristo, mu kubaka kidziingu kyahele manunu.

²²Na beenu hamosi, bakilee bari na maketi-keti ngebe,

²³hakaka, bvuukisee babamosi mu kubapalisa kunsa mbaawu, bakilee se bakaka ngebe mu boomo, mu kubele se na kinkuta kyasumunu kuri muswinyi.

²⁴Kuri wunde wakuka mu kulukebe kwahele kubumuna makya, na kulutelemese ha busu bwa nkeembu yaandi, kwahele maseembu, kunsa nyeense,

²⁵kuri Nzaambi yomosi, Mubvuukisi weetu mu Yesu Kiristo, Mfumu yeetu, kuba nkeembu, bumfumu, makwa na lutumu, tekesele mantaangu momanso na mu lumalu natee bibvu byobinso, bunubwo! Amene.