Read Beembe Nya 1 Bible Online

Nya 1 - Beembe bible

Nya 1

¹Nyabukusu Yesu Kiristo ya muha Nzaambi, mu kusoongo kuri bisari byaandi, mamo makwiisa mu mawasu. Nde waheeke mbasi yaandi kuri kisari kyaandi Yowane, mu kuyaabisa yo,

²wunde wata kimbaangi mu Maampu ma Nzaambi, na kimbaangi kya Yesu Kiristo, momanso ma kari kamono.

³Kiminu kiri na muutu wunde wutaanga mukaanda wu, na kiri na bayuka maampu ma mbikululu, na bakebaa mari mu yo, bukuri ntaangu yeki bebele.

⁴Yowane, kuri mabuundu nsaamu mari mu nsi ya Asya: Bweese kuri beenu na kiyeengi bifumini kuri wunde wuri, waba, na wukwiisa, na kuri mampeeve nsaamu mari ha busu bwa mboloko yaandi,

⁵na kuri Yesu Kiristo, Mbaangi yakwiikama, watete wabutuka mu bafwa, na mwaana mfumu ya bambyaasi ba butoto. Kuri nde wututiiri, watukuula mu masumu meetu mu makila maandi,

⁶nde wasa beetu kimfumu kya bangaanga-nzaambi, mu kusalila Nzaambi wuri se Taayi dyaandi; kuri nde kuba nkeembu na makwa mu bibvu ngo bibvu! Amene!

⁷Mono, nde wuri mu kwiisa mu matuti, mpisi muutu sa kamumono, na babo bamutobiri dyoongi. Makaanda momanso ma ha butoto sa makoto mu manyoongi mu ntoono nde. Heehe! Amene!

⁸«Me ngo Alafa na Omenga», buleeriri Mfumu Nzaambi, wuri, waba, na wuri mu kwiisa, Mwa-mbete.

⁹Me Yowane, mpaangi yeenu, wu luri ntwaari mu nsiitsulu, mu kimfumu, mu nkwikumunu mu Yesu; me nyabeeri ku kibuma ki bateelaa ti Patomo, mu dyaambu dya Maampu ma Nzaambi na kimbaangi kya Yesu.

¹⁰Mpeeve yambaka mu kiluumbu kya Mfumu, na nyayuka ku mambisa ma me mbeembu yayinene yiri bunu mvumvuri,

¹¹yaleele ti: «Mamo ma wuri mu kumono, tina mo munsa mukaanda, na heeke nde ku mabuundu mo nsaamu: ku Efeso, ku Semirana, ku Peregamo, ku Tyatira, ku Saredeyi, ku Filadelefya, na ku Lahodikya.»

¹²Me nyabaluka mu kumono mbeembu yiyo yaba dzoonso kuri me; na bu nyabaluka, me nyamono bitetukulu bya miinda nsaamu byawoolo,

¹³na ha kakati dya Bitetukulu bya miinda, me nyamono wafwanikina na mwaana muutu, waba walwaata kinkuta kyakila natee ku miilu, na waba walwaata musweele wawoolo mu ntulu.

¹⁴Mutu waandi na mfu dzaandi byaba byahembeke bunu myoosi mya bimeeme, bunu midiingi, na miisu myaandi bunu mule mbaawu;

¹⁵miilu myaandi myafwanikina na nsoongo yayoku ku dziku dya mbaawu na mbeembu yaandi yafwanikina na kiyoomo kya maampa.

¹⁶Na wakwaata mu kooko kwaandi kwa lubakala bambwetete nsaamu, na mu munwa waandi mwaapala mbeesi yayila ya mabusu moolo, yasekusu kibari na kibari, na busu bwaandi, bunu ntaangu yiseme mu mpinu dzaandi.

¹⁷Me bu nyamumono, nyabwa ha miilu myaandi, bunu muutu wafwa, na nde wateeteke kooko kwaandi kwa lubakala ha yulu me, waleele: «Yaa ba na boomo ko, me nyiri watete na wampotulu,

¹⁸wamwooyo, me nyabee nyafwa, ngo mono me nyiri mwooyo mu bibvu ngo bibvu; me nyiri na mafungula ma lufwa na ma lubila.

¹⁹Hango, tina ma mwiini, mamo mari, na mari mu kwiisa ha lumbisa lwa mamo.

²⁰Mpaanu dza bambwetete nsaamu, ba mwiini mu kooko kwaami kwa lubakala, na bitetukulu bya miinda nsaamu byawoolo dziri bumabu: bambwetete nsaamu ngo bambasi ba mabuundu nsaamu, na bitetukulu bya miinda nsaamu ngo mabuundu mo nsaamu.»